ନୂଆଦିଲ୍ଲୀ,୨୨।୪: ଦୁଇ ଦିନିଆ ଭାରତ ଗସ୍ତରେ ଆସିଥିବା ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନ୍ସନ୍ଙ୍କ ଶୁକ୍ରବାର ଏକ ବଡ଼ ବୟାନ ସାମ୍ନାକୁ ଆସିଛି। ପଳାତକ ବ୍ୟବସାୟୀ ନୀରବ ମୋଦି ଓ ବିଜୟ ମାଲ୍ୟାଙ୍କ ଉପରେ ସେ ଏକ ବଡ଼ ବୟାନ ଦେଇଛନ୍ତି। ସେ କହିଛନ୍ତି, ନୀରବ ମୋଦି ଓ ବିଜୟ ମାଲ୍ୟାଙ୍କୁ ବ୍ରିଟେନ ସରକାର ଭାରତକୁ ହସ୍ତାନ୍ତର କରିବାକୁ ଚାହୁଁଛନ୍ତି। କିନ୍ତୁ ସେଥିରେ କେତେକ ଲିଗାଲ ଆଇନ ରହିଥିବାରୁ ହସ୍ତାନ୍ତରରେ ବାଧକ ହେଉଛି। ବ୍ରିଟେନ କେବେବି କୌଣସି ପଳାତକ ବା ଆଇନ ଉଲ୍ଲଂଘନକାରୀଙ୍କୁ ଆଶ୍ରୟ ଦେବ ନାହିଁ ବୋଲି ବୋରିସ ଜନ୍ସନ୍ କହିଛନ୍ତି। ଏଥିସହ ୟୁକ୍ରେନ ଓ ରୁଷିଆ ଯୁଦ୍ଧ ମଧ୍ୟରେ ସେ ଏକ ବଡ଼ ଘୋଷଣା କରିଛନ୍ତି। ଆସନ୍ତା ସପ୍ତାହରେ କ୍ୱିଭ୍ରେ ପୁଣି ଥରେ ବ୍ରିଟେନର ଦୂତାବାସ ଖୋଲାଯିବ ବୋଲି ବୋରିସ କହିଛନ୍ତି। ଏତଦ୍ ବ୍ୟତୀତ ଶୁକ୍ରବାର ଆୟୋଜିତ ହୋଇଥିବା ଏକ ଖବରଦାତା ସମ୍ମିଳନୀକୁ ସମ୍ବୋଧିତ କରି ସେ କହିଛନ୍ତି, ଏହି କଷ୍ଟଦାୟକ ସମୟରେ ଭାରତ ସହ ବ୍ରିଟେନର ସମ୍ପର୍କ ଆହୁରି ମଜବୁତ ହୋଇଛି।