କୋଲକାତା,୫ ।୫: କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ତଥା ଭାରତୀୟ ଜନତା ପାର୍ଟି(ଭାଜପା) ନେତା ଅମିତ ଶାହ ପଶ୍ଚିମ ବଙ୍ଗ ଗସ୍ତରେ ଅଛନ୍ତି । ଗୁରୁବାର ସେ ସିଲିଗୁଡିର ରେଲୱେ ସ୍ପୋର୍ଟସ ପଡିଆରେ ଏକ ଜନସଭାକୁ ସମ୍ବାଧିତ କରିଛନ୍ତି । ଏହି ସମୟରେ ସେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉପରେ ଖୁବ୍ ବର୍ଷିଛନ୍ତି । ଶାହ କହିଛନ୍ତି ଆମେ ଲୋକତନ୍ତ୍ର ଉପରେ ଭରସା କରିଛୁ । ଆମେ ଭାବୁଥିଲୁ ମମତା ତୃତୀୟ ଥର ବଜୟୀ ହେବା ପରେ ସୁଧୁରି ଯାଇଥିବେ । ହେଲେ କିଛି ବଦଳି ନାହିଁ । ମମତା ଦିଦି ୩ ଥର ଜିତିବା ପରେ ବି ସୁଧୁରି ନାହାନ୍ତି । ଭାଜପା ଆପଣଙ୍କ ବିରୋଧରେ ଲଢେଇ ଜାରି ରଖିବ ।
ଶାହ ଆହୁରି ମଧ୍ୟ କହିଛନ୍ତି ଆମେ ମମତାଙ୍କୁ ସୁଧୁରିବାକୁ ଗୋଟିଏ ବର୍ଷ ଦେଇଥିଲୁ ହେଲେ ସେ ସୁଧୁରିଲେ ନାହିଁ । ଜନତା ଆଚ୍ଛା ଆଚ୍ଛା ଲୋକଙ୍କୁ ଠିକ୍ କରି ଦେଉଛନ୍ତି । ପଶ୍ଚିମବଙ୍ଗବାସୀଙ୍କୁ ଧନ୍ୟବାଦ ଦେଇ ଶାହ କହିଛନ୍ତି, ବିଧାନସଭା ନିର୍ବାଚନରେ ପଶ୍ଚିମବଙ୍ଗବାସୀ ଭାଜପାର ସଂଖ୍ୟାକୁ ୩ରୁ ୭୭କୁ ବୃଦ୍ଧି କରିଥିବାରେ ସହଯୋଗ କରିଥିବାରୁ ଧନ୍ୟବାଦ । ମମତାଙ୍କୁ ଟାର୍ଗେଟ କରି ଶାହ ଆହୁରି କହିଛନ୍ତି, ସାରା ଦେଶରେ କିଛି ଘଟଣା ଘଟିଲେ କେନ୍ଦ୍ର ପ୍ରତିନିଧିମଣ୍ଡଳ ପଠାଉଛି । ହେଲେ ବୀରଭୂମିକୁ ଆପଣ କାହିଁକି ପ୍ରତିନିଧି ମଣ୍ଡଳ ପଠାଇଲେ ନାହିଁ ବୋଲି ଶାହ ପ୍ରଶ୍ନ କରିଛନ୍ତି । ସୂଚନାଯୋଗ୍ୟ, ବୀରଭୂମିରେ ୮ ମହିଳା ଓ ଜଣେ ଶିଶୁଙ୍କୁ ଜିଅନ୍ତା ଜାଳି ଦିଆଯାଇଥିଲା । ଏମାନେ ସବୁ କ’ଣ ଆପଣଙ୍କ ଲୋକ ନୁହନ୍ତି ବୋଲି ଶାହ ଦିଦିଙ୍କୁ ପ୍ରଶ୍ନ କରିଛନ୍ତି ।
ଆଗକୁ ଶାହା କହିଛନ୍ତି ତ୍ରୁଣମୂଳ କଂଗ୍ରେସ ପ୍ରଚାର କରୁଛି ରାଜ୍ୟରେ ସିଏଏ ଲାଗୁ କରାଇ ଦେବନି । କିନ୍ତୁ କରୋନା ଶେଷ ହେଲେ ସିଏଏ ଲାଗୁ କରାଯିବ ବୋଲି ଶାହ କହିଛନ୍ତି । ଏହାଦ୍ୱାରା ପଶ୍ଚିମବଙ୍ଗରେ ଅନୁପ୍ରବେଶକୁ ରୋକି ହେବ ବୋଲି ସେ କହିଛନ୍ତି ।