କୋଲକାତା,୨୯।୬: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଗୋଡରେ ପୁଣି ଆଘାତ ଲାଗିଛି। ମଙ୍ଗଳବାର ଯେତେବେଳେ ତାଙ୍କ ହେଲିକପ୍ଟରକୁ ଏମରଜେନ୍ସି ଲ୍ୟାଣ୍ଡିଂ କରାଯାଇଥିଲା ସେହି ସମୟରେ ତାଙ୍କ ଗୋଡରେ ଆଘାତ ଲାଗିଥିଲା ଆଉ ସେ ଆହତ ହୋଇଥିଲେ। କଂଗ୍ରେସ ନେତା ଅଧିର ରଞ୍ଜନ ଚୌଧୁରି ଏବେ ମମତାଙ୍କୁ ଟାର୍ଗେଟ କରି କହିଛନ୍ତି ଲୋକଙ୍କ ସହାନୁଭୁତି ପାଇବାକୁ ମମତା ଏମିତି କରୁଛନ୍ତି। ପଞ୍ଚାୟତ ନିର୍ବାଚନ ସରିଲେ ସେ ପୁଣି ଠିକ ହୋଇଯିବେ ଆଉ ଗୋଡରେ ଠିକଭାବେ ଚାଲିବେ।
କଂଗ୍ରେସ ନେତା ଆହୁରି ମଧ୍ୟ କହିଛନ୍ତି, ଏହା ପୂର୍ବରୁ ରାଜ୍ୟରେ ବିଧାନସଭା ନିର୍ବାଚନ ଅନୁଷ୍ଠିତ ହେବାବେଳେ ସେ ଗୋଡରେ ପ୍ଲାଷ୍ଟର ବାନ୍ଧି ଏକ ହ୍ବିଲ ଚେୟାରରେ ଚାଲିବା ଆରମ୍ଭ କରିଥିଲେ। ବର୍ତ୍ତମାନ ରାଜ୍ୟରେ ପଞ୍ଚାୟତ ନିର୍ବାଚନ ଚାଲିଛି, ତେଣୁ ସେ ପୁଣି ଥରେ ନିରୀହ ଲୋକଙ୍କୁ ବୋକା ବନାଇବା ପାଇଁ ଏହା କରୁଛନ୍ତି।
ଅଧିର ରଂଜନ ଆହୁରି ମଧ୍ୟ କହିଛନ୍ତି ଯେ ମମତା ବାନାର୍ଜୀଙ୍କ ଭାବମୂର୍ତ୍ତି ଜଣେ ନେତାଙ୍କ ଚିତ୍ରରେ ପରିଣତ ହୋଇଛି ଯିଏ ଲୋକଙ୍କୁ ବିଭ୍ରାନ୍ତ କରେ। ସେ ଗଣମାଧ୍ୟମକୁ କହିଛନ୍ତି, ତୁମେ ମୋର ମତ ନିଅ ଯେ ସେ କେବଳ ନିର୍ବାଚନ ପାଇଁ ଏହା କରିଛନ୍ତି। ନିର୍ବାଚନ ଶେଷ ହେବା ମାତ୍ରେ ସେ ପୁଣି ପାଦରେ ଚାଲିବା ଆରମ୍ଭ କରିବେ।