କୋଲକାତା,୧୫।୩: ତୃଣମୂଳ କଂଗ୍ରେସରେ ଯୋଗଦେବା ପରେ ୟଶଓ୍ବନ୍ତ ସିହ୍ନାଙ୍କୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଗୁରୁଦାୟିତ୍ୱ ପ୍ରଦାନ କରିଛନ୍ତି। ୟଶଓ୍ବନ୍ତଙ୍କୁ ଦଳର ଉପାଧ୍ୟକ୍ଷ ଭାବେ ନିଯୁକ୍ତ କରାଯାଇଛି। ଏହା ସହିତ ସେ ରାଷ୍ଟ୍ରୀୟ କାର୍ଯ୍ୟ ସମିତିର ସଦସ୍ୟ ଭାବେ ମଧ୍ୟ କାର୍ଯ୍ୟ କରିବେ। ଏନେଇ ସୋମବାର ତୃଣମୂଳ କଂଗ୍ରେସର ମହାସଚିବ ସୁବ୍ରତ ବକ୍ସିଙ୍କ ପକ୍ଷରୁ ଏକ ନିର୍ଦ୍ଦେଶନାମା ଜାରି କରାଯାଇଛି। ୟଶଓ୍ବନ୍ତ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ କ୍ୟାବିନେଟ୍ରେ ଅର୍ଥମନ୍ତ୍ରୀ ଏବଂ ବହିର୍ବ୍ୟାପାର ମନ୍ତ୍ରୀ ଭାବେ ସଫଳତାର ସହିତ କାର୍ଯ୍ୟ କରିଛନ୍ତି। ଅଟଳଙ୍କ ସମୟରେ ଭାଜପା ସର୍ବସମ୍ମତି ମନୋଭାବ ରଖୁଥିବାବେଳେ ଏବେ ଦଳୀୟ ସ୍ଥିତି ବଦଳି ଯାଇଛି। ଏବେ ଭାଜପା କଳେବଳେ କୌଶଳେ କ୍ଷମତା ହାସଲକୁ ଗୁରୁତ୍ୱ ପ୍ରଦାନ କରୁଥିବା ସେ କହିଛନ୍ତି। ରାଜ୍ୟରେ ପ୍ରଚାର କରି ସେ ମମତାଙ୍କ ବିଜୟକୁ ସୁନିଶ୍ଚିତ କରିବେ ବୋଲି ପ୍ରକାଶ କରିଛନ୍ତି।
