ନୂଆଦିଲ୍ଲୀ,୩୦ା୪:ପଶ୍ଚିମବଙ୍ଗରେ ଶାସକ ତୃଣମୂଳ କଂଗ୍ରେସ(ଟିଏମ୍ସି) ହ୍ୟାଟ୍ରିକ୍ ବିଜୟ ହାସଲ କରି ପୁଣି ଥରେ ଶାସନ କରିପାରେ। ଏହାସହ ଟିଏମ୍ସି ସୁପ୍ରିମୋ ମମତା ବାନାର୍ଜୀ ତୃତୀୟ ଥର ପାଇଁ ମୁଖ୍ୟମନ୍ତ୍ରୀ ହୋଇପାରନ୍ତି। କେରଳରେ ମୁଖ୍ୟମନ୍ତ୍ରୀ ପିନାରାୟୀ ବିଜୟନ୍ ଲଗାତର ଦ୍ୱିତୀୟ ଥର ପାଇଁ ମୁଖ୍ୟମନ୍ତ୍ରୀ ଆସନ ଦଖଲ କରି ଇତିହାସ ରଚିବାକୁ ଯାଉଛନ୍ତି। ତାମିଲନାଡୁରେ କ୍ଷମତା ପରିବର୍ତ୍ତନ ହେବ। ଦକ୍ଷିଣ ଭାରତର ଏହି ପ୍ରମୁଖ ରାଜ୍ୟରେ ଦ୍ରାବିଡ ମୁନେତ୍ରା କାଜାଗାମ (ଡିଏମ୍କେ) ଅଧ୍ୟକ୍ଷ ଏମ୍.କେ. ଷ୍ଟାଲିନ୍ଙ୍କ ବହୁଦିନର ସ୍ବପ୍ନ ସାକାର ହେବାକୁ ଯାଉଛି। ଏଠାରେ ଆକସ୍ମିକ ମୁଖ୍ୟମନ୍ତ୍ରୀ ଇ.କେ. ପାଲାନିସ୍ବାମୀଙ୍କ ନେତୃତ୍ୱକୁ ଭୋଟର ପ୍ରତ୍ୟାଖ୍ୟାନ କରିଛନ୍ତି। ଅନ୍ୟପକ୍ଷେ ଆସାମରେ ଭାଜପା ପୁନର୍ବାର କ୍ଷମତାକୁ ଫେରିପାରେ। ଗୁରୁବାର ପଶ୍ଚିମବଙ୍ଗରେ ଅଷ୍ଟମ ତଥା ଅନ୍ତିମ ପର୍ଯ୍ୟାୟ ମତଦାନ ଶେଷ ହେବା ପରେ ବୁଥ୍ ଫେରନ୍ତା ଭୋଟରଙ୍କଠାରୁ ସଂଗୃହୀତ ମତକୁ ନେଇ ରାତି ପ୍ରାୟ ୭ଟାରେ ବିଭିନ୍ନ ସର୍ବେକ୍ଷଣ ସଂସ୍ଥା ପକ୍ଷରୁ ପ୍ରକାଶିତ ଏକ୍ଜିଟ୍ ପୋଲ୍ରୁ ଏହା ଅନୁମାନ କରାଯାଉଛି।
ବ୍ୟାପକ କୋଭିଡ୍ କଟକଣା ଓ ସୁରକ୍ଷା ବନ୍ଦୋବସ୍ତ ମଧ୍ୟରେ ଶେଷ ହୋଇଛି ପଶ୍ଚିମବଙ୍ଗ ବିଧାନସଭା ନିର୍ବାଚନ। ୨୯୪ ଆସନ ମଧ୍ୟରୁ ୨୯୨ ସିଟ୍ରେ ମାର୍ଚ୍ଚ ୨୭ରୁ ଏପ୍ରିଲ ୨୯ ମଧ୍ୟରେ ମତଦାନ ଶେଷ ହୋଇଥିବାବେଳେ ଅବଶିଷ୍ଟ ୨ ଆସନରେ ମେ’ ୧୬ରେ ଭୋଟ ଗ୍ରହଣ କରାଯିବ। ସମ୍ଶେରଗଞ୍ଜ ଓ ଜାଙ୍ଗିପୁର ଆସନର ୨ ପ୍ରାର୍ଥୀଙ୍କ କୋଭିଡ୍ ମୃତ୍ୟୁ ଯୋଗୁ ଉଭୟ ସିଟ୍ରେ ମେ’ ୧୬ରେ ଭୋଟ ଗ୍ରହଣ କରାଯିବ ବୋଲି ନିର୍ବାଚନ କମିଶନ ଘୋଷଣା କରିଛନ୍ତି। ସେହିପରି ଆସାମ ବିଧାନସଭାର ୧୨୬ ଆସନ ଲାଗି ଅନୁଷ୍ଠିତ ୩ ପର୍ଯ୍ୟାୟ (ମାର୍ଚ୍ଚ ୨୭ରୁ ଏପ୍ରିଲ ୬) ନିର୍ବାଚନରେ ୮୨.୪% ମତଦାନ ହୋଇଥିଲା। କେରଳ(୧୪୦ ଆସନରେ ୭୪.୨%), ତାମିଲନାଡୁ(୨୩୪ ଆସନରେ ୭୨.୭୮%) ଓ କେନ୍ଦ୍ରଶାସିତ ଅଞ୍ଚଳ ପୁଡୁଚେରୀ(୩୦ ଆସନରେ ୮୧.୭୦%)ରେ ଏପ୍ରିଲ ୬ରେ ଭୋଟ ଗ୍ରହଣ କରାଯାଇଥିଲା। ପଶ୍ଚିମବଙ୍ଗର ୩୫ ଆସନରେ ଗୁରୁବାର ୭୬.୦୭% ମତଦାନ ହୋଇଥିତ୍ବା ନିର୍ବାଚନ କମିଶନଙ୍କ ସୂତ୍ରରୁ ପ୍ରକାଶ। ୪ ରାଜ୍ୟ ଓ ଗୋଟିଏ କେନ୍ଦ୍ରଶାସିତ ଅଞ୍ଚଳର ୮୨୨ ଆସନରେ ଭୋଟ ଗ୍ରହଣ କରାଯାଇଥିବାବେଳେ ପଶ୍ଚିମବଙ୍ଗ ଉପରେ ସମସ୍ତଙ୍କ ନଜର କେନ୍ଦ୍ରୀଭୂତ ହୋଇଥିଲା। କାରଣ ପଶ୍ଚିମବଙ୍ଗ ନିର୍ବାଚନ ହ୍ୟାଟ୍ରିକ୍ ଆଶାରେ ଥିବା ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପାଇଁ ସମ୍ମାନ ରକ୍ଷାର ଆହ୍ବାନ ପାଲଟିଥିବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଲାଗି ମର୍ଯ୍ୟାଦାର ପ୍ରଶ୍ନ ରୂପେ ଛିଡ଼ା ହୋଇଥିଲା। ଏଠାରେ ଶାସକ ଟିଏମ୍ସିର ମୁଖ୍ୟ ଚ୍ୟାଲେଞ୍ଜର ଭାବେ ପ୍ରଥମ ଥର ପାଇଁ ଉଭା ହୋଇଛି ଭାଜପା। ସରକାର ଗଠନ ପାଇଁ ମ୍ୟାଜିକ୍ ନମ୍ବର ୧୪୯ ହୋଇଥିବାବେଳେ ଟିଏମ୍ସି ୧୫୪ ଆସନ ଦଖଲ କରିବ ବୋଲି ପୋଲ୍ ଅଫ୍ ଦି ପୋଲ୍ସ ଦର୍ଶାଉଛି। ଟାଇମ୍ସ ନାଓ ଏବଂ ସି-ଭୋଟର ପକ୍ଷରୁ ମିଳିତ ଭାବେ କରାଯାଇଥିବା ସର୍ବେକ୍ଷଣ ଅନୁସାରେ ଟିଏମ୍ସି ୧୫୮ ଆସନରେ ସଫଳତା ପାଇବ। ଭାଜପା ୧୧୫ରେ ସନ୍ତୁଷ୍ଟ ହୋଇ ବିରୋଧୀ ଆସନରେ ବସିବ। ଭାରତୀୟ କମ୍ୟୁନିଷ୍ଟ ପାର୍ଟି-ମାର୍କ୍ସବାଦୀ(ସିପିଆଇଏମ୍), କଂଗ୍ରେସ ଏବଂ ଇଣ୍ଡିଆନ ସେକ୍ୟୁଲାର ଫ୍ରଣ୍ଟ (ଆଇଏସ୍ଏଫ୍) ମେଣ୍ଟକୁ ୧୯ ଆସନରେ ସଫଳତା ମିଳିବ। ସେହିପରି ପିଏମ୍ଏଆର୍କ୍ୟୁର ଆକଳନ ହେଉଛି ଟିଏମ୍ସି ୧୫୮, ଭାଜପା ୧୨୦ ଏବଂ ବାମ-କଂଗ୍ରେସ-ଆଇଏସ୍ଏଫ୍ ମେଣ୍ଟ ୧୪ ଆସନ ଦଖଲ କରିବ। ଇଟିଜିର ଆକଳନ ଅନୁସାରେ ଟିଏମ୍ସି ୧୬୯, ଭାଜପା ୧୧୦ ଏବଂ ବାମ ନେତୃତ୍ୱାଧୀନ ମେଣ୍ଟ ୧୨ ସିଟ୍ରେ ବିଜୟୀ ହେବ। ସିଏନ୍ଏକ୍ସ-ରିପବ୍ଲିକ୍ର ଗଣିତ କହୁଛି ଟିଏମ୍ସି ୧୩୩ ଆସନରେ ସୀମିତ ରହି କ୍ଷମତାଚ୍ୟୁତ ହେବ। ଭାଜପା ୧୪୩ ଆସନରେ ବିଜୟୀ ହେବା ସହ ପଶ୍ଚିମବଙ୍ଗରେ ପ୍ରଥମ ଥର ପାଇଁ ଶାସନ କରିବାକୁ ଯାଉଛି ବୋଲି ଏହି ସର୍ବେକ୍ଷଣ ସଂସ୍ଥା ଭବିଷ୍ୟବାଣୀ କରିଥିବାବେଳେ ବାମ ନେତୃତ୍ୱାଧୀନ ମେଣ୍ଟକୁ ୧୬ ଆସନ ଦେଇଛି। ମତଦାନର ୧ ଘଣ୍ଟା ପରେ ଉପରୋକ୍ତ ସର୍ବେକ୍ଷଣ ସଂସ୍ଥା ଓ ଜାତୀୟ ଗଣମାଧ୍ୟମ ପକ୍ଷରୁ ଏହି ଏକ୍ଜିଟ୍ ପୋଲ ପ୍ରକାଶ ପାଇଛି। ବୁଥ୍ ଫେରନ୍ତା ଭୋଟରଙ୍କ ମତାମତକୁ ନେଇ ସାମଗ୍ରିକ ଭାବେ ଉକ୍ତ ଆକଳନ କରାଯାଇଛି। ତେବେ କେଉଁ ରାଜ୍ୟ ପାଇଁ କେଉଁ ସର୍ବେକ୍ଷଣ ସଂସ୍ଥାର ଭବିଷ୍ୟବାଣୀ ସତ ହେବ ତାହା ମେ’ ୨ରେ ଭୋଟ ଗଣତି ପରେ ସ୍ପଷ୍ଟ ହେବ। କାରଣ ଅନେକ ସମୟରେ ଏକ୍ଜିଟ୍ ପୋଲ୍ ଭୁଲ୍ ପ୍ରମାଣିତ ହୋଇଥିବା ପୂର୍ବ ଅଭିଜ୍ଞତାରୁ ଜଣାଯାଏ।