କୋଲକତା,୬।୨: ସୂରସାମ୍ରାଜ୍ଞୀ ଲତା ମଙ୍ଗେସକରଙ୍କ ପରଲୋକକୁ ନେଇ ସାରା ଦେଶରେ ଶୋକର ଛାୟା ଖେଳିଯାଇଛି। କେନ୍ଦ୍ର ସରକାର ଦୁଇ ଦିନିଆ ଜାତୀୟ ଶୋକ ଘୋଷଣା କରିଛନ୍ତି, ଦେଶର ଅନେକ ରାଜ୍ୟ ସରକାର ନିଜ ନିଜ ରାଜ୍ୟରେ ଶୋକ ଘୋଷଣା କରିଛନ୍ତି। ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଲତା ଦିଦିଙ୍କୁ ଏକ ଭିନ୍ନ ଢଙ୍ଗରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ମହାନ ଗାୟିକାଙ୍କୁ ସମବେଦନା ଜଣାଇ ଆସନ୍ତା ୧୫ ଦିନ ପାଇଁ ପଶ୍ଚିମବଙ୍ଗର ସର୍ବସାଧାରଣ ସ୍ଥାନ, ସରକାରୀ କୋଠା ଏବଂ ଟ୍ରାଫିକ ସିଗନାଲରେ ଲତା ମଙ୍ଗେସକରଙ୍କ ଗୀତ ବାଜିବ ବୋଲି ମମତା ବାନାର୍ଜୀ ଘୋଷଣା କରିଛନ୍ତି।
ଏହା ବ୍ୟତୀତ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ସୋମବାର ତାଙ୍କ ସମ୍ମାନାର୍ଥେ ଅଧା ଦିନ ଛୁଟି ଘୋଷଣା କରିଛନ୍ତି। ବାନାର୍ଜୀ ଟୁଇଟ୍ କରି କହିଛନ୍ତି, ମୁଁ ଦେଶର ମହାନ ବ୍ୟକ୍ତିତ୍ୱ ଭାରତ ରତ୍ନ ଲତା ମଙ୍ଗେଶକରଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛି। ତାଙ୍କ ପରିବାର ଏବଂ ବିଶ୍ୱର କୋଟି କୋଟି ପ୍ରଶଂସକଙ୍କୁ ମୋର ଗଭୀର ସମବେଦନା। ସେ ପ୍ରକୃତରେ ଭାରତର ସୂରସାମ୍ରାଜ୍ଞୀ ଥିଲେ। ସମସ୍ତଙ୍କ ପରି ମୁଁ ମଧ୍ୟ ତାଙ୍କ ଗୀତରେ ମନ୍ତ୍ରମୁଗ୍ଧ ଥିଲି ବୋଲି ସେ କହିଛନ୍ତି।
ରବିବାର ମୁମ୍ବାଇର ଏକ ଡାକ୍ତରଖାନାରେ ଲତା ମଙ୍ଗେସକର ୯୨ ବର୍ଷ ବୟସରେ ଦେହାନ୍ତ ହୋଇଛି। ସେ କରୋନା ସଂକ୍ରମିତ ଥିଲେ।
