ମୁମ୍ବାଇ,୬।୧୦: ମୁମ୍ବାଇର ରିଲାଏନ୍ସ ଫାଉଣ୍ଡେସନର ହସ୍ପିଟାଲ ଉପରେ ବୋମା ପକାଇ ଉଡାଇଦେବା ଏବଂ ଅମ୍ବାନୀ ପରିବାରର ସଦସ୍ୟଙ୍କୁ ହତ୍ୟା କରିବାକୁ ଧମକ ଦେଇଥିବା ବ୍ୟକ୍ତିଙ୍କୁ ବିହାରରୁ ଗିରଫ କରାଯାଇଛି। ଏହି ଧମକ ସମ୍ପର୍କରେ ମୁମ୍ବାଇ ପୋଲିସ ଅଭିଯୁକ୍ତଙ୍କୁ ଦରଭଙ୍ଗାରୁ ଗିରଫ କରିଛି। ତାଙ୍କୁ ମୁମ୍ବାଇ ଅଣାଯାଉଛି।
ସୂଚନାଯୋଗ୍ୟ, ବୁଧବାର ଅପରାହ୍ନରେ ଗିରଫ ବ୍ୟକ୍ତି ଜଣଙ୍କ ଏଚଏନ ରିଲାଏନ୍ସ ଫାଉଣ୍ଡେସନ ହସ୍ପିଟାଲର କଲ ସେଣ୍ଟରକୁ କଲ କରି ଉଡାଇଦେବାକୁ ଧମକ ଦେଇଥିଲେ। ମୁକେଶ, ନୀତା, ଆକାଶ ଏବଂ ଅନନ୍ତ ଅମ୍ବାନୀଙ୍କୁ ହତ୍ୟା କରିବାର ଧମକ ଦେଇଥିଲେ। ଏହି ଧମକପୂର୍ଣ୍ଣ କଲ ହସ୍ପିଟାଲର ଲ୍ୟାଣ୍ଡଲାଇନ ନମ୍ବରରେ ଆସିଥିଲା, ଯାହା ପରେ ଆତଙ୍କ ଖେଳିଯାଇଥିଲା। ଏହି ମାମଲାରେ ଏକ ମାମଲା ରୁଜୁ କରି ମୁମ୍ବାଇ ପୋଲିସ ତଦନ୍ତ ଆରମ୍ଭ କରିଛି।
