ମୁମ୍ବାଇ,୨୨।୧୨: ମହାରାଷ୍ଟ୍ରର ଜଣେ ବ୍ୟକ୍ତି ସ୍କ୍ରାପ ମେଟାଲରୁ ଏକ ୪ ଚକିଆ ଯାନ ନିର୍ମାଣ କରିଛନ୍ତି। ଏହି ସ୍ବତନ୍ତ୍ର ୪ ଚକିଆ ଯାନ ମହିନ୍ଦ୍ରା ଗ୍ରୁପ୍ ଚେୟାରମ୍ୟାନ ଆନନ୍ଦ ମହିନ୍ଦ୍ରାଙ୍କ ଦୃଷ୍ଟି ଆକର୍ଷଣ କରିଛି।
ୟୁଟ୍ୟୁବ ଚ୍ୟାନେଲ ହିଷ୍ଟୋରିକାନ ଅନୁଯାୟୀ, ଦତ୍ତାତ୍ରେୟ ଲୋହାର ଅଧିକ ଶିକ୍ଷା ଗ୍ରହଣ କରି ନ ଥିଲେ ମଧ୍ୟ ପୁଅର ଇଚ୍ଛା ପୂରଣ କରିବା ପାଇଁ ଅଦରକାରୀ ସ୍କ୍ରାପ ପାର୍ଟସରୁ ଗାଡ଼ି ନିର୍ମାଣ କରିଛନ୍ତି। ଏହି ଅଭିନବ ସୃଷ୍ଟି ଆନନ୍ଦ ମହିନ୍ଦ୍ରାଙ୍କୁ ପ୍ରଭାବିତ କରିଛି। ସେ ତାଙ୍କର ଅଫିସିଆଲ ଟୁଇଟର ହ୍ୟାଣ୍ଡେଲରେ ଭିଡିଓ ଶେୟାର କରିବା ସହ ଲେଖିଛନ୍ତି, ଏହା ସ୍ପଷ୍ଟ ଯେ, ଏହା କୌଣସି ମାନଦଣ୍ଡ ପୂରଣ କରୁନାହିଁ। କିନ୍ତୁ ମୁଁ ତାଙ୍କ ଚତୁରତାର ପ୍ରଶଂସା କରିବି। ଏହା ଆମ ଲୋକଙ୍କ ଦକ୍ଷତା ଏବଂ ଆଗ୍ରହକୁ ପ୍ରଦର୍ଶିତ କରୁଛି।
ମହାରାଷ୍ଟ୍ରର ଦେବରାଷ୍ଟ୍ରେ ଗ୍ରାମରେ ଲୁହା କାରିଗର ଭାବେ କାର୍ଯ୍ୟ କରୁଥିବା ଦତ୍ତାତ୍ରେୟ ଲୋହାର ୪୫ ସେକେଣ୍ଡ୍ର ଭିଡିଓରେ ଗାଡ଼ି କେଉଁଭଳି ଚାଲୁଛି, ତାହା ବୁଝାଉଛନ୍ତି। ମାତ୍ର ଏହି ଗାଡ଼ି ନିର୍ମାଣ କରିବାରେ ତାଙ୍କର ୬୦ ହଜାର ଟଙ୍କା ଖର୍ଚ୍ଚ ହୋଇଛି। ଗାଡ଼ିକୁ ଷ୍ଟାର୍ଟ କରିବା ପାଇଁ ସେ କିକ୍ ଷ୍ଟାର୍ଟ ମେକାନିଜିମ୍ ବ୍ୟବହାର କରିଛନ୍ତି, ଯାହାକି କେବଳ ଦୁଇ ଚକିଆ ଯାନରେ ଦେବାକୁ ମିଳେ।
ଆନନ୍ଦ ମହିନ୍ଦ୍ରା ଆଉ ଏକ ଟୁଇଟ୍ରେ ଲେଖିଛନ୍ତି, ଗାଡ଼ିଟି କୌଣସି ମାନଦଣ୍ଡ ପୂରଣ କରୁନାହିଁ। ଏଣୁ ସ୍ଥାନୀୟ ଅଧିକାରୀ ରାସ୍ତାରେ ଗାଡ଼ି ଚଲାଇବାକୁ ଅନୁମତି ଦେବେ ନାହିଁ। କିନ୍ତୁ ଅଭିନବ ସୃଷ୍ଟି ପାଇଁ ମୁଁ ବ୍ୟକ୍ତିଗତ ଭାବେ ଉକ୍ତ ଗାଡ଼ି ପ୍ରତିବଦଳରେ ବୋଲେରୋ ପ୍ରସ୍ତାବ ଦେଉଛି। ତାଙ୍କ ସୃଷ୍ଟିକୁ ମହିନ୍ଦ୍ରାରିସର୍ଚ୍ଚଭାଲିରେ ପ୍ରଦର୍ଶିତ କରାଯାଇପାରିବ, ଯାହାକି ଆମକୁ ପ୍ରେରିତ କରିବ।