ଆରମ୍ଭ ହୋଇଛି ପବିତ୍ର ଶ୍ରାବଣ ମାସ। ଶିବ ମନ୍ଦିରରେ ପାଣି ଢ଼ାଳିବା ଲାଗି କାଉଡିଆମାନଙ୍କ ପ୍ରବଳ ଭିଡ଼ ଦେଖିବାକୁ ମିଳୁଛି। ଏହି କ୍ରମରେ ଜଣେ ଶିବଭକ୍ତଙ୍କ ଏଭଳି ଭିଡିଓ ଭାଇରାଲ ହେଉଛି, ଯାହା ଲୋକଙ୍କ ହୃଦୟ ଜିତୁଛି। ତାଙ୍କୁ ଅନେକେ କଳିଯୁଗର ‘ଶ୍ରବଣ କୁମାର’ ବୋଲି ମଧ୍ୟ କହୁଛନ୍ତି।
ଭିଡିଓରେ ଶିବଭକ୍ତଜଣଙ୍କ ନିଜର ବୁଢ଼ା ମା’ବାପାଙ୍କୁ କାନ୍ଧରେ ବସାଇ କାଉଡି ଯାତ୍ରାରେ ବାହାରିଥିବା ଦେଖାଯାଇଛି। ସୋସିଆଲ ମିଡିଆରେ ଭିଡିଓ ଭାଇରାଲ ପରେ ଲୋକେ ତାଙ୍କର ପ୍ରଶଂସା କରୁଛନ୍ତି। ଆଇପିଏସ୍ ଅଫିସର ଅଶୋକ କୁମାର ନିଜର ଅଫିସିଆଲ ଟୁଇଟର ଆକାଉଣ୍ଟରେ ଏହାକୁ ଶେୟାର କରି , ଆଜିକାଲି ଲୋକେ ନିଜର ବୁଢ଼ା ମା’ବାପାଙ୍କୁ ତିରସ୍କାର କରୁଛନ୍ତି, ତାଙ୍କୁ ଘରୁ ବାହାର କରିଦେଉଛନ୍ତି ନଚେତ ନିଜ ସାଙ୍ଗରେ ରହିବାକୁ ଦେଉନାହାନ୍ତି… ହେଲେ ଏହାର ବିପରୀତ ଦୃଶ୍ୟ ଏଠାରେ ଦେଖିବାକୁ ମିଳିଛି। ଲକ୍ଷ ଲକ୍ଷ ଶିବଭକ୍ତଙ୍କ ମଧ୍ୟରେ ଜଣେ ଶ୍ରବଣ କୁମାର ଅଛନ୍ତି, ଯିଏ ପାଲିଙ୍କିରେ ନିଜ ବୁଢ଼ା ମା’ବାପାଙ୍କୁ ନେଇ କାଉଡି ଯାତ୍ରାରେ ବାହାରିଛନ୍ତି… ମୋର ପ୍ରଣାମ।