ଧର୍ମପୁରୀ,୧୯।୬: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ(ଆର୍ବିଆଇ) ପକ୍ଷରୁ ବିଭିନ୍ନ ମୁଦ୍ରା ଚଳୁ ନ ଥିବା ନେଇ ଘୋଷଣା ହୋଇନାହିଁ। ହେଲେ ଆଜିର ସମୟରେ ଅନେକ ସ୍ଥାନରେ କିଛି ମୁଦ୍ରାକୁ ନେବାଲାଗି ଲୋକେ ଅମଙ୍ଗ ହେଉଛନ୍ତି। ଏହା ଚଳିବ ନାହିଁ ବୋଲି କହୁଛନ୍ତି। ଏଭଳି ସ୍ଥିତିରେ ତାମିଲନାଡ଼ୁର ଧର୍ମପୁରୀରେ ଜଣେ ବ୍ୟକ୍ତି ଦଶ କିମ୍ବା କୋଡିଏ ନୁହେଁ ବରଂ ୬ ଲକ୍ଷ ମୂଲ୍ୟର ୧୦ ଟଙ୍କିଆ ମୁଦ୍ରା ଦେଇ ତାଙ୍କ ମନ ପସନ୍ଦର କାର୍ କିଣି ଚର୍ଚ୍ଚାରେ ଅଛନ୍ତି। ବ୍ୟକ୍ତିଜଣଙ୍କ ହେଉଛନ୍ତି ଭେଟ୍ରିଭେଲ୍। ସେ ଆରୋରର ବାସିନ୍ଦା। ତାଙ୍କର ଏକ ପ୍ରାଥମିକ ସ୍କୁଲ ଏବଂ ମେଡିସିନ୍ ସେଣ୍ଟର ରହିଛି। ଏହାଛଡ଼ା ତାଙ୍କ ମା’ ଏକ ଦୋକାନ ଚଳାଉଛନ୍ତି। ଉଭୟଙ୍କ ଦୋକାନକୁ କିଛି ଗ୍ରାହକ ଆସିଲେ ୧୦ ଟଙ୍କିଆ ଦିଅନ୍ତି। ହେଲେ ଅନେକ ଏହି ମୁଦ୍ରା ନେବାକୁ ମନା କରିଥାନ୍ତି। ଏଥିଯୋଗୁ ତାଙ୍କ ପାଖରେ ଧିରେ ଧିରେ ୧୦ ଟଙ୍କିଆ ମୁଦ୍ରାର ପରିମାଣ ବଢ଼ିବାକୁ ଲାଗିଥିଲା। ପରେ ସେ ଏହାକୁ ବଦଳାଇ ନୋଟ ଆଣିବାକୁ ବ୍ୟାଙ୍କକୁ ଯାଇଥିଲେ। ହେଲେ ଏତେ ମାତ୍ରାରେ ମୁଦ୍ରାକୁ ଗଣିବାକୁ ଲୋକ ନ ଥିବା କହି ବ୍ୟାଙ୍କ କର୍ମଚାରୀ ମନା କରିଥିଲେ। ଫଳରେ ନିରୁପାୟ ହୋଇ ସେ ମାସେ ଯାଏ ଏହି ମୁଦ୍ରା ଜମା କରିଥିଲେ। ତାଙ୍କ ନିକଟରେ ମୋଟ ମୁଦ୍ରା ୬ ଲକ୍ଷ ହେବା ପରେ ସେ ତାକୁ ନେଇ ଏକ ଶୋ’ ରୁମ୍ ପହଞ୍ଚିଥିଲେ। ଗାଡ଼ି ପସନ୍ଦ କରିବା ସହ ଶୋ’ ରୁମ୍ ମାଲିକଙ୍କୁ ସେ ମୁଦ୍ରାରେ ୬ ଲକ୍ଷ ଦେବେ ବୋଲି ପ୍ରସ୍ତାବ ରଖିଥିଲେ। ପ୍ରଥମେ ଶୋ ରୁମ୍ ମାଲିକ ତାଙ୍କୁ ମନା କରିଥିଲେ। ହେଲେ ପରେ ରାଜି ହୋଇଥିଲେ। ଗାଡ଼ି ଭର୍ତ୍ତି ମୁଦ୍ରା ନେଇ ସେ ନିର୍ଦ୍ଧାରିତ ଦିନ ପହଞ୍ଚିଥିଲେ। ଯେତେବେଳେ ସେ ଶୋ ରୁମ୍ରେ ମୁଦ୍ରା ଭର୍ତ୍ତି ଗଣ୍ଠିଲିମାନ ଖୋଲିଥିଲେ, ସେଠାରେ ଉପସ୍ଥିତ ଅନ୍ୟମାନେ ଆଶ୍ଚର୍ଯ୍ୟ ହୋଇଯାଇଥିଲେ। ଟଙ୍କା ଗଣାଯିବା ପରେ ସେ ତାଙ୍କ ମନପସନ୍ଦର ଗାଡ଼ି କିଣି ଘରକୁ ନେଇଥିଲେ। ତେବେ ପଚରାଯିବାରେ ଭେଟ୍ରିଭେଲ ଅନ୍ୟମାନଙ୍କୁ ୧୦ ଟଙ୍କା ବେକାର ନୁହେଁ ବୋଲି ଜଣାଇବାକୁ ଚାହୁଁଥିବା ପ୍ରକାଶ କରିଛନ୍ତି।