ଯାଜପୁର,୧୧ା୧: ଡାକ୍ତରଖାନାରେ ନବଜାତ ଶିଶୁପୁତ୍ର ଏବଂ ସ୍ତ୍ରୀକୁ ଛାଡି ପଳାଇଲେ ସ୍ୱାମୀ। ଏଭଳି ଏକ ଅଭାବନୀୟ ଘଟଣା ଘଟିଛି ଯାଜପୁର ଜିଲା ଚିକିତ୍ସାଳୟରେ। ମହିଳା ଏବଂ ତାଙ୍କ ନବଜାତ ଶିଶୁପୁତ୍ର ମେଡିକାଲ ବେଡରେ ଛାଡି ତାଙ୍କ ସ୍ୱାମୀ ଏବଂ ଶାଶୂଘର ଲୋକେ ପଳାଇଯାଇଥିବା ଅଭିଯୋଗ ହୋଇଛି। ପୀଡିତା ଜଣକ ଡଲି ମଲିକ ବୋଲି ଜଣାପଡିଛି ଯିଏ ବିଞ୍ଜରପୁର ଥାନା ଅନ୍ତର୍ଗତ ମଦୁସୁଦନପୁର ଗ୍ରାମ ପଞ୍ଚାୟତ ଅନ୍ତର୍ଗତ ଘାଟୁକୁଲା ଗାଁର ବାସିନ୍ଦା ଅଟନ୍ତି।
୨୦୨୧ ମସିହାରେ କେନ୍ଦ୍ରାପଡା ଜିଲ୍ଲାର ଅଲ୍ ବ୍ଲକ ଅନ୍ତର୍ଗତ ନାଗାମାଥା ଗାଁର ବାସିନ୍ଦା ଚନ୍ଦନ ମଲ୍ଲିକଙ୍କ ତାଙ୍କର ବିବାହ ହୋଇଥିଲା। ଜାନୁଆରୀ 1ରେ ଡଲୀଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା ଏବଂ ପରବର୍ତ୍ତୀ ସମୟରେ ସେ ଏକ ଶିଶୁ ପୁତ୍ରକୁ ଜନ୍ମ ଦେଇଥିଲେ। ତେବେ ପାରିବାରିକ ଝଗଡା ହେତୁ ଚନ୍ଦନ ଏବଂ ତାଙ୍କ ପରିବାର ସଦସ୍ୟ ଡଲି ଏବଂ ନବଜାତ ଶିଶୁକୁ ଛାଡି ଡାକ୍ତରଖାନାରୁ ପଳାଇଥିବା ଅଭିଯୋଗ ହୋଇଛି।
ଘଟଣାର କିଛି ସମୟ ପରେ ପୋଲିସକୁ ସୂଚନା ଦିଆଯାଇଥିଲା। ପୋଲିସର ହସ୍ତକ୍ଷେପ ପରେ ଉଭୟ ମା ଏବଂ ନବଜାତ ଶିଶୁକୁ ଏକ ଓସିଏସ ସେଣ୍ଟରକୁ ହସ୍ତାନ୍ତର କରାଯାଇଛି।
ଡଲି କହିଛନ୍ତି, “ମୋତେ ଡାକ୍ତରଖାନାରେ ଭର୍ତ୍ତି କରିବା ପରେ ମୋ ସ୍ୱାମୀ ଏବଂ ଶାଶୂଘର ଲୋକେ ପଳାଇ ଯାଇଥିଲେ। ଯେତେବେଳେ ମୁଁ ମୋ ସ୍ୱାମୀଙ୍କୁ ଫୋନ କରୁଛି, ସେ ମୋ କଲ୍ ଉଠାଉ ନାହାଁନ୍ତି। ଏହା ସହିତ ସେ ଅନ୍ୟ ଜଣେ ମହିଳାଙ୍କୁ ବିବାହ କରିଥିବା କହିଥିଲେ ଏବଂ ମୋତେ ଆଉ ଗ୍ରହଣ କରୁନାହାନ୍ତି, ଏବେ ମୁଁ ନ୍ୟାୟ ଚାହୁଁଛି ବୋଲି ଡଲୀ କହିଛନ୍ତି।
ସୂଚନାନୁସାରେ, ଉଭୟଙ୍କୁ ପରାମର୍ଶ ଦେବା ପରେ ପୋଲିସ ଏହି ଦମ୍ପତିଙ୍କ ସହ ଆଲୋଚନା କରିବାକୁ ଚେଷ୍ଟା କରୁଛି। ଶିଶୁ କଲ୍ୟାଣ କମିଟି (ସିଡବ୍ଲ୍ୟୁଡିସି) କହିଛି ଯେ ତାଙ୍କ ପତ୍ନୀ ଏବଂ ନବଜାତ ଶିଶୁକୁ ଅବହେଳା କରି ଡାକ୍ତରଖାନାରେ ଅସହାୟ ଅବସ୍ଥାରେ ଛାଡିଦେବା ଅଭିଯୋଗରେ ଚନ୍ଦନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।