ରାଞ୍ଚି,୨୭।୪: ଝାଡଖଣ୍ଡରେ ଏକ ଆଶ୍ଚର୍ଯ୍ୟଜନକ ଘଟଣା ଘଟିଛି। ପାକୁରର ଉମଡାପାଡା ଥାନା ନିବାସୀ ମହେଶ୍ୱର ଟୁଡୁଙ୍କ ସ୍ତ୍ରୀ ୫୦ ଦିନ ହେବ ସ୍ବାମୀଙ୍କ ମୃତଦେହ ଏବଂ ନ୍ୟାୟ ପାଇବାକୁ କୋର୍ଟରେ ଲଢୁଥିଲେ। କିନ୍ତୁ ସ୍ବାମୀଙ୍କୁ ଜୀବିତ ଅବସ୍ଥାରେ ଦେଖି ତାଙ୍କ ହୋଶ୍ ଉଡିଯାଇଛି। ସୂଚନାଯୋଗ୍ୟ, ଗତ ମାର୍ଚ୍ଚ ମାସରେ ମହେଶ୍ୱରଙ୍କୁ ହତ୍ୟା କରାଯାଇଥିବା ଥାନାରେ ଅଭିଯୋଗ ହୋଇଥିଲା। ସ୍ବାମୀଙ୍କୁ ସମ୍ପର୍କୀୟମାନେ ହତ୍ୟା କରିଥିବା ତାଙ୍କ ସ୍ତ୍ରୀ ଅଭିଯୋଗ କରିଥିଲେ। ଏପରିକି ଏହି ଘଟଣାକୁ ନେଇ ଗାଁ ଲୋକେ ମିଶି ରାସ୍ତାରୋକୋ ମଧ୍ୟ କରିଥିଲେ। ପୋଲିସ ଏହି ମାମଲାରେ ୩ ଜଣଙ୍କୁ ଗିରଫ କରିଥିଲା। ଦୀର୍ଘ ୫୦ ଦିନ ପରେ ଏହି ମାମଲାର ଗୁମର ଫିଟିଛି। ଏସ୍ପି ମଣିଲାଲ ମଣ୍ଡଳ କହିଛନ୍ତି, ଜମି ହଡପ କରିବା ଚକ୍କରରେ ମହେଶ୍ୱରଙ୍କୁ ତାଙ୍କ ସମ୍ପର୍କୀୟମାନେ ବେଙ୍ଗାଲୁରୁ ପଠାଇଦେଇଥିଲେ। କରୋନା ଯୋଗୁ ସେଠାରେ କାମ ନ ମିଳିବାରୁ ସେ ଗାଁକୁ ଫେରି ଅନ୍ୟ ଜଣେ ସମ୍ପର୍କୀୟଙ୍କ ଘରେ ଲୁଚି ରହିଥିଲେ। ପୋଲିସକୁ ଏନେଇ ସୁରାକ ମିଳିବା ପରେ ପୋଲିସ ତାଙ୍କୁ ସେଠାରୁ ଆଣି ପରିବାରକୁ ହସ୍ତାନ୍ତର କରିଥିଲା।
