ଲଳିତପୁର, ୨୮।୬- ଉତ୍ତର ପ୍ରଦେଶର ଲଳିତପୁର ଜିଲାରେ ଏକ ଅଭାବନୀୟ ଘଟଣା ଘଟିଯାଇଛି। ସ୍ତ୍ରୀକୁ ୧୦୦ ଟଙ୍କା ଦେଇ ନ ପାରିବାରୁ ନିରାଶ ହୋଇ ଜଣେ ଯୁବକ ଶେଷରେ ଆତ୍ମହତ୍ୟା କରିଛନ୍ତି। ଲଳିତପୁର ଜିଲାର ଜାଖଲୋନ ଅଞ୍ଚଳର ଜୟହିନ୍ଦ ସିଂ ଓ ତାଙ୍କ ସ୍ତ୍ରୀ ରୁହନ୍ତି। ଏକ ବିବାହ କାମରେ ଯୋଗଦେବା ପାଇଁ ସ୍ତ୍ରୀ ଓ ପୁଅଙ୍କ ସହ ଜୟହିନ୍ଦ ଶନିବାର ଶ୍ୱଶୁର ଘରକୁ ଯାଇଥିଲେ। କିନ୍ତୁ ସନ୍ଧ୍ୟାରେ ତାଙ୍କ ସ୍ତ୍ରୀ କୌଣସି କାମ ପାଇଁ ୧୦୦ ଟଙ୍କା ସ୍ବାମୀଙ୍କୁ ମାଗିଥିଲେ। ଜୟହିନ୍ଦ କିନ୍ତୁ ସ୍ତ୍ରୀଙ୍କୁ ୧୦୦ ଟଙ୍କା ଦେଇପାରି ନ ଥିଲେ। ଏହାକୁ ନେଇ ବନ୍ଧୁବାନ୍ଧବଙ୍କ ସାମ୍ନାରେ ସ୍ବାମୀ-ସ୍ତ୍ରୀଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଏଥିରେ ନିରାଶ ହୋଇ ଜୟହିନ୍ଦ ସମସ୍ତେ ଶୋଇଥିବାବେଳେ ରାତି ଅଧରେ ଶ୍ୱଶୁର ଘରୁ ଚାଲି ଆସିଥିଲେ। ଏହାପରେ ନିକଟସ୍ଥ ଟ୍ରେନ ଲାଇନକୁ ଯାଇ ସେଠାରେ ଟ୍ରେନ ଆଗକୁ ଡେଇଁ ଆତ୍ମହତ୍ୟା କରିଥିଲେ। ଏହାପରଦିନ ସକାଳେ ରେଳ ଲାଇନରୁ ପୋଲିସ ତାଙ୍କ ଖଣ୍ଡ ବିଖଣ୍ଡିତ ଶବ ଉଦ୍ଧାର କରିଥିଲା।