ନୂଆଦିଲ୍ଲୀ,୧୮।୧: ଗତ କିଛି ବର୍ଷ ଧରି ଅମିତାଭ ବଚ୍ଚନଙ୍କ ଫିଲ୍ମ ‘ସୂର୍ଯ୍ୟବଂଶମ୍’ ପ୍ରାୟ ପ୍ରତ୍ୟେକ ଦିନ ଟିଭି ଚ୍ୟାନେଲରେ ପ୍ରଦର୍ଶିତ ହେଉଛି। କିଛି ଦର୍ଶକ ଫିଲ୍ମର ଟେଲିକାଷ୍ଟକୁ ନେଇ ମଧ୍ୟ ବିରକ୍ତ ହୋଇଯାଇଛନ୍ତି। ଜଣେ ବ୍ୟକ୍ତି ‘ସୂର୍ଯ୍ୟବଂଶମ୍’ କ୍ରମାଗତ ଟେଲିକାଷ୍ଟ ଯୋଗୁ ଏତେ ବିବ୍ରତ ହୋଇଥିଲେ ଯେ, ସେ ଟିଭି ଚ୍ୟାନେଲକୁ ଏକ ଚିଠି ମଧ୍ୟ ଲେଖିଛନ୍ତି। ଏହି ବ୍ୟକ୍ତି ଟିଭି ଚ୍ୟାନେଲକୁ ଏକ ଚିଠି ଲେଖି କହିଛନ୍ତି, ଆମେ ‘ସୂର୍ଯ୍ୟବଂଶମ୍’ର ପୁରା କାହାଣୀ ଜାଣିଛୁ। ହେରା ଠାକୁରଙ୍କ ବିଷୟରେ ସମସ୍ତ ସୂଚନା ମଧ୍ୟ ଜାଣିଯାଇଛୁ। ଆଉ କେତେଥର ଏହି ଫିଲ୍ମଟି ଚ୍ୟାନେଲରେ ପ୍ରସାରିତ ହେବ ବୋଲି ସେ ପ୍ରଶ୍ନ କରିଛନ୍ତି।
ଟିଭି ଚ୍ୟାନେଲକୁ ଲେଖାଯାଇଥିବା ଏହି ଚିଠି ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଚିଠିରେ ବ୍ୟକ୍ତି ଲେଖିଛନ୍ତି, ତୁମର ଚ୍ୟାନେଲ ଫିଚର ଫିଲ୍ମ ‘ସୂର୍ଯ୍ୟବଂଶମ୍’ ପ୍ରସାରଣ ପାଇଁ ଚୁକ୍ତି ଗ୍ରହଣ କରିଛି, ତୁମର ଅନୁଗ୍ରହରେ ଆମେ ଏବଂ ଆମ ପରିବାର ହେରା ଠାକୁର ଏବଂ ତାଙ୍କ ପରିବାରକୁ ଭଲଭାବେ ଜାଣିଛୁ।
ପରବର୍ତ୍ତୀ ସମୟରେ, ଏହି ବ୍ୟକ୍ତି ତାଙ୍କ ଚିଠିରେ ଲେଖିଛନ୍ତି, ଆପଣଙ୍କ ଚ୍ୟାନେଲ ଏହି ଫିଲ୍ମକୁ କେତେଥର ଟେଲି ପ୍ରସାରଣ କରିଛି? ଭବିଷ୍ୟତରେ ଏହି ଫିଲ୍ମ ଆଉ କେତେଥର ଟେଲିକାଷ୍ଟ ହେବ? ଯଦି ଏହା ଆମର ମାନସିକ ସ୍ଥିତି ଉପରେ ପ୍ରତିକୂଳ ପ୍ରଭାବ ପକାଇଥାଏ ତେବେ ଏଥିପାଇଁ କିଏ ଦାୟୀ ରହିବ? ଦୟାକରି ଜଣାନ୍ତୁ।
ଅମିତାଭ ବଚ୍ଚନ ‘ସୂର୍ଯ୍ୟବଂଶମ୍’ ସବୁଠାରୁ ସଫଳ ଫିଲ୍ମ ମଧ୍ୟରୁ ଅନ୍ୟତମ। ୧୯୯୯ରେ ଏହା ମୁକ୍ତିଲାଭ କରିଥିଲା। ବିଗ ବି ହେରା ଠାକୁରଙ୍କ ଭୂମିକାରେ ଅଭିନୟ କରିଥିଲେ। ଏହି ଫିଲ୍ମରେ ତାଙ୍କର ଡବଲ ରୋଲ ମଧ୍ୟ ଦେଖିବାକୁ ମିଳିଥିଲା। ପ୍ରେକ୍ଷାଳୟ ପରେ ଏହି ଫିଲ୍ମ ଟିଭିରେ କ୍ରମାଗତ ଭାବରେ ପ୍ରସାରିତ ହେଉଛି।