ଜିନ୍ଦ, ୨୪।୭: ହରିୟାଣାର ଜିନ୍ଦ ସହରରୁ ଚକିତ କଲା ଭଳି ଏକ ଖବର ସାମ୍ନାକୁ ଆସିଛି। ବିଗତ ୪ ବର୍ଷରେ ନିଜର ୫ ଜଣ ପିଲାଙ୍କୁ ହତ୍ୟା କରିଥିବା ଅଭିଯୋଗରେ ପୋଲିସ ଜଣେ ବ୍ୟକ୍ତିଙ୍କୁ ଗିରଫ କରିଛି। ଗିରଫ ହୋଇଥିବା ୩୮ ବର୍ଷୀୟ ଏହି ବ୍ୟକ୍ତିଜଣଙ୍କ ନାମ ହେଉଛି ଜୁମ୍ମା। ସେ ଜଣେ ଶ୍ରମିକ ହୋଇଥିବାବେଳେ ପୋଲିସ ଆଗରେ ନିଜ ଦୋଷ ସ୍ବୀକାର କରିଛନ୍ତି। ଜୁମ୍ମାଙ୍କ ସ୍ତ୍ରୀ ବର୍ତ୍ତମାନ ଷଷ୍ଠ ଥର ପାଇଁ ଗର୍ଭବତୀ ରହିଥିବା ଜଣାପଡ଼ିଛି।
ଜିନ୍ଦର ସଫିଦୋ ଗ୍ରାମରେ ଘଟିଛି। ଏହି ଗ୍ରାମର ଜୁମ୍ମାଙ୍କର ୨ଟି ଝିଅ ନିକଟରେ ନିଖୋଜ ହୋଇଯାଇଥିଲେ। ଏହାପରେ ଜୁମ୍ମା ଝିଅ ନିଖୋଜ ଖବର ଥାନାରେ ଜଣାଇଥିଲେ। କିନ୍ତୁ ଗତ ୨୦ ତାରିଖରେ ପୋଲିସ ଜୁମ୍ମାଙ୍କ ଘର ପାଖ କେନାଲରୁ ନିଖୋଜ ଦୁଇ ଝିଅ ମୁସ୍କାନ (୧୧) ଓ ନିଶା (୭)ଙ୍କ ଶବ ଉଦ୍ଧାର କରିଥିଲା। ଏହାପରେ ପୋଲିସ ଯାଞ୍ଚ ସମୟରେ ଜୁମ୍ମାଙ୍କ ଉପରେ ସନ୍ଦେହ ପ୍ରକାଶ କରିଥିଲା। ଜୁମ୍ମା ବାରମ୍ବାର ନିଜର ବୟାନ ବଦଳାଇଥିଲେ। ତେଣୁ ପୋଲିସ ତାକୁ ଥାନାକୁ ନେଇ ଅଧିକ ପଚରା ଉଚରା କରିବାରୁ ଶେଷରେ ସେ ନିଜ ଦୁଇ ଝିଅଙ୍କୁ ହତ୍ୟା କରିଥିବା ସ୍ବୀକାର କରିଥିଲା। ଏଥିସହ ପୂର୍ବରୁ ମଧ୍ୟ ସେ ୫ ବର୍ଷ ତଳେ ଶୋଇଥିବା ଅବସ୍ଥାରେ ଗୋଟିଏ ପୁଅକୁ ଏବଂ ୨ ବର୍ଷ ପରେ ଗୋଟିଏ ଝିଅକୁ ଓ ଏହାର କିଛି ମାସ ପରେ ଆଉ ଏକ ପୁଅକୁ ମାରିଥିବା ମଧ୍ୟ ପୋଲିସ ସାମ୍ନାରେ କହିଥିଲା। ଏହି ଘଟଣାକୁ ନେଇ ଆଡିସନାଲ ଏସ୍ପି ଅଜିତ୍ ସିଂ ଶେଖାଓ୍ବତ୍ କହିଛନ୍ତି, କେନାଲରୁ ୨ ଝିଅଙ୍କ ଶବ ଉଦ୍ଧାର ପରେ ସେମାନଙ୍କୁ ହତ୍ୟା କରାଯାଇଥିବା ସନ୍ଦେହ କରାଗଲା। ଏବଂ ସେହି ଅନୁଯାୟୀ ତଦନ୍ତ ଆଗେଇଥିଲା। ଏହି ସମୟରେ ଆମର ଜୁମ୍ମା ଉପରେ ସନ୍ଦେହ ହୋଇଥିଲା ଏବଂ ସେ ନିଜ ଦୋଷ ମଧ୍ୟ ସ୍ବୀକାର କରିଥିଲା। ଜୁମ୍ମା ଝିଅ ୨ଜଣଙ୍କୁ କୌଣସି ବିଷାକ୍ତ ପଦାର୍ଥ ଖୁଆଇ କେନାଲରେ ଫିଙ୍ଗି ଦେଇଥିବା ଅନୁମାନ କରାଯାଉଛି। ସେହିଭଳି ଏହି ବିଷାକ୍ତ ପଦାର୍ଥରୁ ଅଳ୍ପ କିଛି ଜୁମ୍ମା ତା ସ୍ତ୍ରୀକୁ ଖୁାଆଇ ଦେଇଥିବା ଜଣାପଡ଼ିଛି। ଏହି ଘଟଣାରେ ପୋଲିସ ଅଧିକ ତଦନ୍ତ ଜାରି ରଖିଛି।