ମୁମ୍ବାଇ,୧୪।୩: ମହାରାଷ୍ଟ୍ରରେ ଏକ ହତ୍ୟାକାଣ୍ଡର ଅଜବ ମାମଲା ସାମ୍ନାକୁ ଆସିଛି। ସୋମବାର ପାଲଘର ଜିଲାର ନାଲାସୋପାରାଠାରେ ଜଣେ ବ୍ୟକ୍ତି ତାଙ୍କ ସ୍ତ୍ରୀଙ୍କୁ ଗଳା କାଟି ହତ୍ୟା କରିଥିବା ଅଭିଯୋଗ ହୋଇଛି। ସ୍ତ୍ରୀଙ୍କ ଚରିତ୍ର ଉପରେ ସନ୍ଦେହ କରି ସ୍ବାମୀ ଏଭଳି କାଣ୍ଡ ଘଟାଇଥିବା ପାଲଘର ପୋଲିସ ଷ୍ଟେଶନର ଜଣେ ଅଧିକାରୀ ସୂଚନା ଦେଇଛନ୍ତି। ସେ କହିଛନ୍ତି, ଉକ୍ତ ବ୍ୟକ୍ତି ଜଣଙ୍କ ସକାଳେ ତାଙ୍କ ସ୍ତ୍ରୀଙ୍କୁ ଗଳା କାଟି ହତ୍ୟା କରିଥିଲେ। ଏହା ପରେ ସେ ନିଜ ଅପରାଧ ଲୁଚାଇବାକୁ ଚେଷ୍ଟା କରି ନ ଥିଲେ। ସ୍ତ୍ରୀଙ୍କ ମୃତଦେହକୁ ଘରେ ଛାଡି ଅଫିସକୁ ଯାଇଥିଲେ। ଆଶ୍ଚର୍ଯ୍ୟଜନକ କଥା ହେଉଛି ଯେ, ଅଫିସରେ ପହଞ୍ଚିବା ପରେ ଏହି ବ୍ୟକ୍ତି ଦିନସାରା କାମ କରିଥିଲେ, ଏବଂ ହତ୍ୟା ବିଷୟରେ ତାଙ୍କ ସହକର୍ମୀଙ୍କୁ କିଛି କହି ନ ଥିଲେ। ପରେ ଅଫିସରୁ କାମ ସାରି ବ୍ୟକ୍ତି ଜଣଙ୍କ ପୋଲିସ ଷ୍ଟେଶନକୁ ଯାଇ ତାଙ୍କ ସ୍ତ୍ରୀଙ୍କୁ ହତ୍ୟା କରିଥିବା ସ୍ବୀକାର କରିଥିଲେ। ପୋଲିସ ଏହି ଘଟଣାରେ ଏକ ମାମଲା ରୁଜୁ କରି ପୋଲିସ ତଦନ୍ତ ଆରମ୍ଭ କରିଛି।