ଝାରସୁଗୁଡ଼ା ଅଫିସ,୨୨।୧୦: ସେପ୍ଟେମ୍ବର ୨୩ରୁ ଲୋକଶକ୍ତି ଓ ଜନ ଆନ୍ଦୋଳନଙ୍କ ରାଷ୍ଟ୍ରୀୟ ସମନ୍ବୟ (ଏନ୍ଏପିଏମ୍) ଓଡିଶା ତରଫରୁ ନଦୀ ଓ ଜଳ ଉତ୍ସ ସୁରକ୍ଷା ଅଭିଯାନ ଯାତ୍ରା ଆରମ୍ଭ ହୋଇଛି। ଏହାର ଆବାହକ ପରିବେଶବିତ୍ ପ୍ରଫୁଲ୍ଲ ସାମନ୍ତରା ଗୁରୁବାର ଝାରସୁଗୁଡ଼ାରେ ପହଞ୍ଚତ୍ ଇବ୍ ଓ ଭେଡେନ ନଦୀ ଆଦି ବୁଲି ଦେଖିବାପରେ ସ୍ଥିତି ଅନୁଧ୍ୟାନ କରିଥିଲେ। ପରେ ସେ ସହରର ଏକ ହୋଟେଲରେ ଖବରଦାତା ସମ୍ମିଳନୀ କରି କହିଥିଲେ, କେବଳ ଭାରତବର୍ଷ ନୁହେଁ ସାରା ବିଶ୍ୱରେ ନଦୀ, ନାଳ ଆଦି ଜଳଉତ୍ସ ପ୍ରଦୂଷିତ ହେବାରେ ଲାଗିଛି। ଏହା ମାନବକୃତ ହୋଇଥିବାବେଳେ ଏଥିପାଇଁ ସରକାରୀ ବିଧିବ୍ୟବସ୍ଥା ଦାୟୀ। ଦେଶରେ ଶିଳ୍ପନୀତି ରହିଥିଲେ ବି କାର୍ଯ୍ୟକାରୀ ହେଉନାହିଁ। କଳକାରଖାନାରୁ ନିର୍ଗତ ବର୍ଜ୍ୟବସ୍ତୁ ଠିକ୍ଭାବେ ପରିଚାଳନା ହେଉନାହିଁ। ଏହାର ପ୍ରଭାବରେ ଜଳବାୟୁ ପରିବର୍ତ୍ତନ ହେଉଛି। ଏଥିରେ ନଦୀଜଳ ପ୍ରଦୂଷିତ ହେବାରେ ଲାଗିଛି। ଏହାର ପ୍ରଭାବ ସିଧାସଳଖ ମାନବ ସମାଜ ଉପରେ ପଡୁଛି। ଏହାକୁ ନେଇ ଦେଶ ଓ ରାଜ୍ୟ ମଧ୍ୟରେ ନଦୀଜଳ ବିବାଦ ଦେଖାଦେଉଛି। ଏଥିମଧ୍ୟରେ କାବେରୀ ଓ ମହାନଦୀ ରହିଛି। ଏହାକୁ ନେଇ ସରକାର ଟ୍ରିବ୍ୟୁନାଲ ଗଠନ କରିଥିବାବେଳେ ଅଦ୍ୟାବଧି ଏହାର ସମାଧାନ ହୋଇପାରିନାହିଁ। ନଦୀର ନିରନ୍ତର ପ୍ରବାହ ହିଁ ତାହାର ଅତୁଟ ଜୀବନ। ଏହାକୁ ଯଦି ପ୍ରଭାବିତ କରାଯାଏ ତା’ହେଲେ ପ୍ରାକୃତିକ ପ୍ରବାହ ବାଧାପ୍ରାପ୍ତ ହୋଇଥାଏ ା ସେତେବେଳେ ନଦୀର ଅତୁଟ ଜୀବନର ଅପମୃତ୍ୟୁ ହୋଇଥାଏ। ତେଣୁ ନଦୀ ସୁରକ୍ଷା ନେଇ ସ୍ବତନ୍ତ୍ର ଆଇନ ପ୍ରଣୟନ କରିବାକୁ ସେ ଦାବି କରିଛନ୍ତି। ସେ ଆହୁରି କହିଛନ୍ତି, ବିଦ୍ୟୁତ୍ ଉତ୍ପାଦନ ପାଇଁ ଦେଶରେ ଛତୁ ଫୁଟିଲାପରି ତାପଜ ବିଦ୍ୟୁତ୍ କେନ୍ଦ୍ର ପ୍ରତିଷ୍ଠା ହୋଇଚାଲିଛି। ଏଥିରୁ ନିର୍ଗତ ଉତ୍ତପ୍ତ ଗ୍ୟାସ୍ ଓ ବର୍ଜ୍ୟବସ୍ତୁ ଜଳବାୟୁକୁ ପ୍ରଦୂଷିତ କରୁଛି। ଏହାର ବିକଳ୍ପ ଭାବେ ସୌରଶକ୍ତି ଉପତ୍ାଦନ ହୋଇପାରିଲେ ବହୁମାତ୍ରାରେ ପ୍ରଦୂଷଣ ରୋକାଯାଇପାରିବ। ଝାରସୁଗୁଡା ଜିଲାରେ ଅନେକ କଳକାରଖାନା ଗଢିଉଠିଛି। ଏଥିରୁ ନିର୍ଗତ ହେଉଥିବା ବର୍ଜ୍ୟବସ୍ତୁ ଠିକ୍ରେ ପରିଚାଳନା ନ ହୋଇ ଏଣେତେଣେ ପଡିରହୁଛି ା ଏହାର ପ୍ରଭାବ ସିଧାସଳଖ ହୀରାକୁଦ ଜଳଭଣ୍ଡାର, ମହାନଦୀ ଓ ଆଖପାଖରେ ଥିବା ନଦୀ ଉପରେ ପଡୁଛି। ଏଥିରେ ଜନଜୀବନ ପ୍ରଭାବିତ ହେଉଛି। ଏହାକୁ ନିୟନ୍ତ୍ରଣ କରିବାପାଇଁ ସରକାରଙ୍କ ଆଞ୍ଚଳିକ ପ୍ରଦୂଷଣ ନିୟନ୍ତ୍ରଣ ବୋର୍ଡ ରହିଛି। ହେଲେ ଏହା ସ୍ଥାଣୁ ପାଲଟିଯାଇଛି। ଏହାକୁ ନିୟନ୍ତ୍ରଣ କରା ନ ଗଲେ ପରିସ୍ଥିତି ଭୟାବହ ହେବ ବୋଲି ସେ କହିଛନ୍ତି। ଅନ୍ୟମାନଙ୍କ ମଧ୍ୟରେ ପରିବେଶବିତ୍ ସତ୍ୟନାରାୟଣ ରାଓ, ରତ୍ନାକର ପ୍ରଧାନ, ବିଜୟ ଦାସ ପ୍ରମୁଖ ସାମିଲ ହୋଇଥିଲେ ା