ଓ୍ବାଶିଂଟନ୍,୩।୨: ନିତ୍ୟ ବ୍ୟବହାର୍ଯ୍ୟ ଜିନିଷ ଭିତରେ ଖାଇବା, ପିନ୍ଧିବା ପରି ମୁଣ୍ଡ ଗୁଞ୍ଜିବା ପାଇଁ ଘରଟିଏ ଆବଶ୍ୟକ। ଦିନଯାକ ଯେତେ ବାହାରେ ବୁଲିଲେ ବି ରାତିରେ ଶାନ୍ତିରେ ଥକ୍କା ମେଣ୍ଟେଇବା ପାଇଁ ସମସ୍ତେ ଘରକୁ ଫେରିଥାନ୍ତି। ଲୋକ ନିଜର ଘରଟିଏ ତୋଳିବା ପାଇଁ ଜୀବନ ଯାକର ପରିଶ୍ରମ ସଞ୍ଚୟ ଭାବେ ରଖିଥାନ୍ତି। ଘର ତିଆରି ପାଇଁ ମାସ ସମୟ ଲାଗୁଥିବାବେଳେ ଏଥିପାଇଁ ଲକ୍ଷ ଲକ୍ଷ ଟଙ୍କା, ଲୋକ ଯୋଗାଡ କରିବାକୁ ପଡିଥାଏ। କିନ୍ତୁ ଆପଣ ଜାଣନ୍ତି କି, ଅନ୍ୟ ଜିନିଷ ପରି ଆପଣ ଘର ମଧ୍ୟ ଇ-କମର୍ସ ସାଇଟ୍ରେ ଅର୍ଡର କରିପାରିବେ। ଶୁଣି ଆଶ୍ଚର୍ଯ୍ୟ ହେଉଥିବେ, କିନ୍ତୁ ଏହା ସତ। ନିକଟରେ ଜଣେ ବ୍ୟକ୍ତି ଇ-କମର୍ସ ସାଇଟ ଆମାଜନରୁ ଘର ଅର୍ଡର କରିଛନ୍ତି ଯାହାର ଭିଡିଓ ସେ ଇନଷ୍ଟାରେ ଶେୟାର କରିଛନ୍ତି।
ନିକଟରେ ଜଣେ ଆମେରିକୀୟ ଆମାଜନ ଆପ୍ରୁ ରେଡିମେଡ ଘର ଅର୍ଡର କରିଛନ୍ତି। ସୂଚନାନୁସାରେ, ୧୬.୫x ୨୦ଫୁଟ୍ର ଏହା ଫୋଲ୍ଡ-ଆଉଟ ଫ୍ଲାଟ୍ ଘର ଅଟେ। ଏଥିରେ ରୋଷେଇ ଘର, ବୈଠକ ଘର, ବେଡରୁମ୍ ସମେତ ବାଥରୁମ୍ ମଧ୍ୟ ରହିଛି। ପ୍ୟାକିଂରେ ଆସିବାବେଳେ ବାଥ୍ରୁମରେ ପୂର୍ବରୁ ଶାବର ଓ ଟଏଲଟ ରହିଛି। ଏହାର ମୂଲ୍ୟ ପ୍ରାୟ ୨୬ହଜାର ଡଲାର(୨୧ ଲକ୍ଷ ଟଙ୍କା) ରହିଛି। ତେବେ ଭାରତରେ ଘର ଅର୍ଡର କରିବାର କୌଣସି ଅପ୍ସନ ଆମାଜନରେ ଦେଖାଉ ନାହିଁ। ଏହା କେବଳ ଆମେରିକାରେ ଉପଲବ୍ଧ ହେଉଥିବାର ଅନୁମାନ କରାଯାଉଛି।