ନିଜ ପ୍ରେମକୁ ପ୍ରକାଶ କରିବା ପାଇଁ ଯୁବତୀ, ଯୁବକ ବିଭିନ୍ନ ପ୍ରକାରର ପଦ୍ଧତି ଆପଣାଇଥାନ୍ତି। ଏହିପରି ଅଷ୍ଟ୍ରେଲିଆର ଜଣେ ପ୍ରେମିକ ନିଜ ପ୍ରେମିକାକୁ ବିବାହ ପ୍ରସ୍ତାବ ଦେବା ପାଇଁ ଏକ ପାରାର ସହାୟତା ନେଇଛନ୍ତି। ଯାହାକି ଏବି ଚର୍ଚ୍ଚାର ବିଷୟ ପାଲଟିଛି।
ଅଷ୍ଟ୍ରେଲିଆର ଏହି ପ୍ରେମିଯୁଗଳ ହେଲେ ଜେସେ (ପ୍ରେମିକ) ଏବଂ ଏରିନ୍(ପ୍ରେମିକା)। ଉଭୟ ପରସ୍ପରକୁ ବହୁତ ଭଲ ପାଆନ୍ତି, ବିବାହ ମଧ୍ୟ କରିବାକୁ ଚାହୁଁଥିଲେ। ଜେସେ ପ୍ରେମିକା ଏରିନ୍ଙ୍କୁ ବିବାହ ପାଇଁ ପ୍ରସ୍ତାବ ଦେଇଥିଲେ। ଏଥିପାଇଁ ସେ ଏକ ପାରାର ସହାୟତା ନେଲେ। ଭିଡିଓରେ ଦେଖିବାକୁ ମିଳୁଛି ଯେ, ଏକ ଷ୍ଟାଡିୟମ୍ରେ ପ୍ରେମିଯୁଗଳ ବସିଛନ୍ତି। କିଛି ସମୟ ପରେ ପାରାଟି ଜେସେଙ୍କ ନିକଟରୁ ଯାଇ ପ୍ରେମିକା ଏରିନ୍ଙ୍କ ହାତରେ ବସୁଛି। ଏବଂ ଏରିନ୍ଙ୍କ ହାତରେ ଏକ ଚିଠି ଦେଇ ପାରାଟି ସେଠାରୁ ପଳାଇଯାଉଛି। ଉକ୍ତ ଚିଠିକୁ ପଢ଼ିବା ପରେ ଏରିନ୍ ଆଶ୍ଚର୍ଯ୍ୟ ହୋଇଯାଉଛନ୍ତି। କାରଣ ଉକ୍ତ ଚିଠିରେ ପ୍ରେମିକ ଜେସେ ତାଙ୍କୁ ବିବାହ ପ୍ରସ୍ତାବ ଦେଇଛନ୍ତି। ଏହା ପରେ ଜେସେ ଏରିନ୍ଙ୍କ ସାମ୍ନାରେ ଆଣ୍ଠେଇ ପଡ଼ି ତାଙ୍କୁ ବିବାହ କରିବାକୁ ଚାହୁଁଥିବା କହୁଛନ୍ତି। ଏହା ଶୁଣିବା ପରେ ଏରିନ୍ ସଙ୍ଗେ ସଙ୍ଗେ ହଁ କରୁଛନ୍ତି। କିଛି ସମୟ ମଧ୍ୟରେ ଷ୍ଟାଡିୟମ୍ରେ ଉପସ୍ଥିତ ଥିବା ସମସ୍ତ ବ୍ୟକ୍ତି ଚିତ୍କାର କରିବା ସହ କରତାଳି ଦେବା ଆରମ୍ଭ କରିଦେଉଛନ୍ତି। ଏହି ଭିଡିଓକୁ ଅଷ୍ଟ୍ରେଲିଆର ଜୁ ନାମକ ଜଣେ ଟ୍ବିଟର ହ୍ୟାଣ୍ଡେଲ ଶେୟାର କରିଛନ୍ତି। ଏବେ ଏହି ଭିଡିଓ ଭାଇରାଲ ହେବାରେ ଲାଗିଛି। ଲୋକମାନେ ଏବେ ଏହି ଭିଡିଓ ଉପରେ ନିଜର ମନ୍ତବ୍ୟ ଦେବାସହ ପ୍ରେମୀଯୁଗଳଙ୍କୁ ଅଭିନନ୍ଦନ ଜଣାଇବାରେ ଲାଗିଛନ୍ତି।