ଲକ୍ଷ୍ନୌ,୧।୯: ଉତ୍ତର ପ୍ରଦେଶର ସୀତାପୁରରେ ଏକ ରୋଚକ ଘଟଣା ଘଟିଛି। ୭ ସନ୍ତାନର ପିତା ଗୁପ୍ତ ଭାବେ ପଞ୍ଚମ ବିବାହ କରିବାକୁ ଯାଉଥିବାବେଳେ ତାଙ୍କର ପିଲାମାନେ ଘଟଣାସ୍ଥଳରେ ପହଞ୍ଚି ହଙ୍ଗାମା ସୃଷ୍ଟି କରିଥିଲେ। ପିଲାମାନେ ବର ବେଶରେ ଆସିଥିବା ପିତାଙ୍କୁ ପିଟାପିଟି ମଧ୍ୟ କରିଥିଲେ। ସମ୍ପୃକ୍ତ ବ୍ୟକ୍ତିଙ୍କୁ ଘଟଣାସ୍ଥଳରୁ ଗିରଫ କରି ପୋଲିସ ପଚରାଉଚରା ଆରମ୍ଭ କରିଛି। ପୋଲିସ ତାଙ୍କ ବିରୋଧରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
କୋଟୱାଲି ଗ୍ରାମାଞ୍ଚଳର ସର୍ଦ୍ଦାର କଲୋନୀ ଅଞ୍ଚଳରେ ଏହି ଘଟଣା ଘଟିଛି। ମୋହଲା ପଟିଆର ବାସିନ୍ଦା ୪୫ ବର୍ଷିୟ ଶାଫି ଅହମ୍ମଦ ତାଙ୍କର ପଞ୍ଚମ ବିବାହର ସ୍ବପ୍ନ ଦେଖିଥିଲେ। ବିବାହ ପ୍ରସ୍ତୁତି ମଧ୍ୟ ଶେଷ ହୋଇଥିଲା। ଏହି ବିଷୟରେ ଜାଣି ବିବାହ ଦିନ ଶାଫିଙ୍କ ୭ଟି ସନ୍ତାନ ନିଜ ନିଜ ମା’ଙ୍କ ସହ ସେଠାରେ ପହଞ୍ଚିଥିଲେ। ସେମାନଙ୍କୁ ଦେଖି ଶାଫି ବିଚଳିତ ହୋଇପଡିଥିଲେ। ସ୍ତ୍ରୀ ଏବଂ ପିଲାମାନେ ବିବାହକୁ ବିରୋଧ କରି ଶାଫିଙ୍କୁ ମାରପିଟ୍ କରିଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ଉଭୟ ପକ୍ଷଙ୍କୁ ଶାନ୍ତ କରି ଶାଫିଙ୍କୁ ଗିରଫ କରିଥିଲା।