ମୁମ୍ବାଇ: କରୋନା ପରେ ଏବେ ପ୍ରବଳ ବର୍ଷା ମୁମ୍ବାଇର ଚିନ୍ତା ବଢ଼ାଇଛି। ବୁଧବାରରୁ ଲଗାତର ହୋଇଥିବା ବର୍ଷା ଯୋଗୁ ସହରର ବିଭିନ୍ନ ସ୍ଥାନ ଜଳାର୍ଣ୍ଣବ ହୋଇଯାଇଛି। ଫଳରେ ଲୋକଙ୍କୁ ଯାତାୟତରେ ଅସୁବିଧା ଉପୁଜିବା ସହ ଜନ ଜୀବନ ଅସ୍ତବ୍ୟସ୍ତ ହୋଇପଡ଼ିଛି। ସେହିପରି ରେଳ ଟ୍ରାକ୍ରେ ପାଣି ଜମାହୋଇଯାଇଥିବାରୁ ସମସ୍ତ ଟ୍ରେନ୍ ମଧ୍ୟ ବାତିଲ ହୋଥିବା ଜଣାପଡ଼ିଛି। ତେବେ ମୁମ୍ବାଇରେ ହେଉଥିବା ପ୍ରବଳବର୍ଷା ଯୋଗୁ କେବଳ ମଣିଷ ନୁହଁନ୍ତି ଜୀବଜନ୍ତୁଙ୍କୁ ମଧ୍ୟ ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି। ଇତିମଧ୍ୟରେ ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେବାରେ ଲାଗିଛି। ଯେଉଁଥିରେ ଏକ ବିଲେଇ ଛୁଆକୁ ଜଣେ ବ୍ୟକ୍ତି ପ୍ରବଳ ବର୍ଷାରୁ କିଭଳି ଉଦ୍ଧାର କରିଛନ୍ତି ତାହା ଦେଖିବାକୁ ମିଳିଛି।
ଏହି ଭିଡିଓଟି ହେଉଛି ମୁମ୍ବାଇ ବଡାଲାର। ବର୍ଷାରେ ଫସିରହିଥିବା ବିଲେଇ ଛୁଆକୁ ଜଣେ ବ୍ୟକ୍ତି ଉଦ୍ଧାର କରି ଏକ ପଲିଥିନ୍ରେ ରଖିଥିଲେ। ଏହାପରେ ତାକୁ ନିଜ ବାଇକ୍ରେ ବସାଇ ଘରକୁ ନେଇଯାଇଥିଲେ। ଉକ୍ତ ବ୍ୟକ୍ତିଙ୍କ ଏଭଳି କାର୍ଯ୍ୟକୁ ଦେଖି ଲୋକେ ବେଶ୍ ପ୍ରଶଂସା କରିଛନ୍ତି। ଅନ୍ୟପଟେ ଏହି ଭିଡିଓ ସୋସିଆଲ ମିଡିଆରେ ଶେୟାର ହେବାର କିଛି ସମୟ ମଧ୍ୟରେ ହିଁ ଏହାକୁ ୧୦ହଜାରୁ ଊର୍ଦ୍ଧ୍ୱ ଲୋକ ଦେଖିସାରିଲେଣି।
