ଜଣେ ବ୍ୟକ୍ତି ଗୋଟିଏ ଫିଲ୍ମକୁ କେତେଥର ଦେଖିପାରିବେ? ଥରେ, ଦୁଇଥର କିମ୍ବା ୧୦ଥର କିନ୍ତୁ ଜଣେ ବ୍ୟକ୍ତି ତିନି ମାସ ମଧ୍ୟରେ ଗୋଟିଏ ଫିଲ୍ମକୁ ୨୯୨ ଥର ଦେଖି ଗିନିଜ ୱାଲର୍ଡ ରେକର୍ଡରେ ସ୍ଥାନ ପାଇଛନ୍ତି।
ଆମେରିକାର ଫ୍ଲୋରିଡାଠାରେ ରହୁଥିବା ରାମିରୋ ଆଲାନିସ ଚଳିତ ବର୍ଷ ଡିସେମ୍ବର ୧୬, ୨୦୨୧ରୁ ମାର୍ଚ୍ଚ ୧୫, ୨୦୨୨ ମଧ୍ୟରେ ଫିଲ୍ମ ‘ସ୍ପାଇଡର୍-ମ୍ୟାନ: ନୋ ୱେ ହୋମ’କୁ ୨୯୨ ଥର ଦେଖିଥିଲେ। ଏହି ସୁପରହିଟ ଫିଲ୍ମ ଦେଖିବା ପାଇଁ ସେ ୭୨୦ ଘଣ୍ଟା ଅର୍ଥାତ୍ ୩୦ ଦିନ ବିତାଇଲେ। ଫିଲ୍ମ ଟିକେଟ ପାଇଁ ପ୍ରାୟ ୩,୪୦୦ ଡଲାର୍ (ପ୍ରାୟ ୨.୫୯ ଲକ୍ଷ ଟଙ୍କା) ଖର୍ଚ୍ଚ କରିଛନ୍ତି। ପ୍ରଥମ କିଛି ସପ୍ତାହ ପାଇଁ, ଆଲାନିସ ପ୍ରତିଦିନ ପାଞ୍ଚଟି ସ୍କ୍ରିନିଂ ଦେଖୁଥିଲେ, ଅର୍ଥାତ୍ ଦିନକୁ ୧୨ ଘଣ୍ଟା ୨୦ ମିନିଟ୍ ପରଦାକୁ ଚାହିଁ ରହୁଥିଲେ। ଏକାଧିକ ଥର ଫିଲ୍ମ ଦେଖିବା ଏକ କଷ୍ଟକର କାର୍ଯ୍ୟ। ରେକର୍ଡ ପାଇଁ କିଛି ର୍ନିଦ୍ଦିଷ୍ଟ ସର୍ତ୍ତ ଅଛି ଯାହା ପୂରଣ ହେବା ଆବଶ୍ୟକ। ରେକର୍ଡ ତିଆରି କରୁଥିବା ବ୍ୟକ୍ତିଙ୍କୁ କେବଳ ସ୍କ୍ରିନିଂ ସମୟରେ ଫିଲ୍ମ ଦେଖିବାକୁ ପଡିବ। ଏହାର ଅର୍ଥ, ବ୍ୟକ୍ତି ଜଣକ ସେମାନଙ୍କ ଫୋନକୁ ଦେଖିପାରିବେ ନାହିଁ, ବାଥରୁମ ବିରତି ନେଇ ପାରିବେ ନାହିଁ କିମ୍ବା ଶୋଇ ମଧ୍ୟ ପାରିବେ ନାହିଁ। ତାଙ୍କୁ ପ୍ରତ୍ୟେକ ଥର ସମ୍ପୂର୍ଣ୍ଣ ଫିଲ୍ମ ଦେଖିବାକୁ ପଡିବ।
ରାମିରୋ ଆଲାନିସ ପୂର୍ବରୁ ୨୦୧୯ରେ ‘ଆଭେଞ୍ଜର୍ସ: ଏଣ୍ଡଗେମ’ ଦେଖିବାର ରେକର୍ଡ ହାସଲ କରିଥିଲେ। କିନ୍ତୁ ସେହି ରେକର୍ଡ ୨୦୨୧ ମସିହାରେ ଅର୍ଣ୍ଣାଉଡ କ୍ଲିନଙ୍କ ଦ୍ୱାରା ଭାଙ୍ଗି ଯାଇଥିଲା, ଯିଏକି ‘କାମେଲଟ: ଫାଷ୍ଟ ଇନ୍ଷ୍ଟଲ୍ମେଣ୍ଟ’ ୨୦୪ ଥର ଦେଖିଥିଲେ।