ଭୋପାଳ,୨।୫: ମଧ୍ୟପ୍ରଦେଶର ଆଦିବାସୀ ବହୁଳ ଅଲିରାଜପୁର ଜିଲାରେ ଏକ ରୋଚକ ଘଟଣା ଘଟିଛି। ଜଣେ ବ୍ୟକ୍ତି ଆଦିବାସୀ ରୀତିନୀତି ଅନୁଯାୟୀ ୩ ପ୍ରେମିକାଙ୍କୁ ବିବାହ କରିଛନ୍ତି। ଏହି ବିବାହରେ ତାଙ୍କର ୬ ସନ୍ତାନ ମଧ୍ୟ ଉପସ୍ଥିତ ଥିଲେ।
ନାନପୁର ଅଞ୍ଚଳରେ ରହୁଥିବା ସମରଥ ମୋର୍ଯ୍ୟା ୩ ପ୍ରେମିକାଙ୍କ ସହ ୧୫ ବର୍ଷ ଲିଭ୍-ଇନ୍ରେ ରହିବା ପରେ ନିକଟରେ ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ତାଙ୍କ ବିବାହ କାର୍ଡରେ ତାଙ୍କ ୩ ପ୍ରେମିକାଙ୍କ ନାଁ ଲେଖା ହୋଇଥିଲା। ସେ ନିଜ ବିବାହରେ ଡ୍ୟାନ୍ସ ମଧ୍ୟ କରିଥିଲେ। ସମରଥ ୩ ସ୍ତ୍ରୀ ଏବଂ ୬ ସନ୍ତାନଙ୍କ ସହ ବେଶ୍ ଖୁସି ଅଛନ୍ତି। ବିବାହ ସମାରୋହରେ ସ୍ଥାନୀୟ ଲୋକେ ମଧ୍ୟ ଯୋଗ ଦେଇଥିଲେ।
ସମରଥଙ୍କ କହିବା ଅନୁଯାୟୀ, ୧୫ ବର୍ଷ ପୂର୍ବରୁ ସେ ବହୁତ ଗରିବ ଥିଲେ। ଏହି କାରଣରୁ ବିବାହ କରିପାରି ନ ଥିଲେ। ଏହି ସମୟରେ ମଧ୍ୟରେ ସେ ତିନି ଯୁବତୀଙ୍କ ପ୍ରେମ କରି ବସିଥିଲେ ଏବଂ ସେମାନଙ୍କ ଘରୁ ଉଠାଇ ଆଣି ଲିଭ୍-ଇନ୍ରେ ରହୁଥିଲେ। ତାଙ୍କ ୬ ସନ୍ତାନ ହେବାରେ ପରେ ଏବେ ସେ ବିବାହ କରିବାକୁ ନିଷ୍ପତ୍ତି ନେଇଥିଲେ। ତାଙ୍କ ବିବାହକୁ ସାମାଜିକ ସ୍ବୀକୃତି ମଧ୍ୟ ମିଳିଛି।
ଭାରତୀୟ ସମ୍ବିଧାନ ଅନୁଚ୍ଛେଦ ୩୪୨ ଅନୁଯାୟୀ ସମରଥଙ୍କ ବିବାହକୁ ବେଆଇନ୍ ବୋଲି ଧରାଯିବ ନାହିଁ।