ବଇଣ୍ଡା,୧୧।୨(ଡି.ଏନ.ଏ.) ଅନୁଗୋଳ ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ ଗୁରୁବାର ଆଠମଲ୍ଲିକ ଓ କିଶୋରନଗର ବ୍ଲକର ବିଭିନ୍ନ ଉନ୍ନୟନ କାର୍ଯ୍ୟ ସମୀକ୍ଷା କରିବା ସହ ପଞ୍ଚାୟତ ନିର୍ବାଚନ କିଭଳି ସ୍ବଚ୍ଛ ଭାବେ ପରିଚାଳନା ହେବ ତାହାର ତଦାରଖ କରିଛନ୍ତି। ଜିଲାପାଳ ପ୍ରଥମେ ଆଠମଲ୍ଲିକ ବ୍ଲକ ପେଡିପଥରସ୍ଥିତ କନକେଇ ଉଚ୍ଚ ବିଦ୍ୟାଳୟର ନିର୍ମାଣାଧୀନ କୋଠରିକୁ ବୁଲି ଦେଖିଥିଲେ। ପରେ ଆଠମଲ୍ଲିକ ମହାବିଦ୍ୟାଳୟକୁ ଯାଇ ଷ୍ଟ୍ରଙ୍ଗ ରୁମ୍ ଓ ଭୋଟ ଗଣତି ଗୃହ ଯାଞ୍ଚ କରିଥିଲେ। ନିର୍ବାଚନ କିଭଳି ପରିଚାଳନା କରିବେ ସେ ନେଇ ଉପସ୍ଥିତ ସମସ୍ତ ସରକାରୀ କର୍ମଚାରୀଙ୍କୁ ପରାମର୍ଶ ଦେଇଥିଲେ। ସେହିପରି କିଶୋରନଗର ବ୍ଲକ ଗସ୍ତରେ ଯାଇ ଜିଲାପାଳ କିଶୋରନଗର କଲେଜ ପରିସରରେ ହୋଇଥିବା ଷ୍ଟ୍ରଙ୍ଗ ରୁମ୍ ଓ ଭୋଟ ଗଣତି ଗୃହ ଯାଞ୍ଚ କରିଥିଲେ। ପରେ ବ୍ଲକ କାର୍ଯ୍ୟାଳୟରେ ଏମ୍ଜିଏନ୍ଆର୍ଇଜିଏସ୍ ଯୋଜନାରେ ହୋଇଥିବା କାର୍ଯ୍ୟ ସମ୍ପର୍କରେ ସମୀକ୍ଷା କରିଥିଲେ। ସମସ୍ତ ନିର୍ବାଚନ ଅଧିକାରୀ କିଭଳି ସ୍ବଚ୍ଛ ଭାବେ କାର୍ଯ୍ୟ ପରିଚାଳନା କରିବେ ସେ ସମ୍ପର୍କରେ କହିଥିଲେ। ତାଙ୍କ ସହ ଆଠମଲ୍ଲିକ ଉପଜିଲାପାଳ ଲଲିତ ମୋହନ ବେହେରା, ଆଠମଲ୍ଲିକ ବିଡିଓ ସନ୍ତୋଷ କୁମାର ସାହୁ, କିଶୋରନଗର ବିଡିଓ ଡ. ସ୍ବରୂପା ନନ୍ଦ ସାହୁ, ଏବିଡିଓ ଜ୍ୟାତି ରଞ୍ଜନ ପ୍ରଧାନ, ତହସିଲଦାର ଶାନ୍ତି ସ୍ବରୂପ ମିଶ୍ର, ଆଇଆଇସି ଆନନ୍ଦ କୁମାର ଡୁଙ୍ଗଡୁଙ୍ଗ, କିଶୋରନଗର ମହାବିଦ୍ୟାଳୟ ଅଧ୍ୟକ୍ଷ ଅକ୍ଷୟ କୁମାର ଦାସ, କିଶୋରନଗର ବ୍ଲକ ଜିପିଓ ଶରତ ବିଶ୍ୱାଳଙ୍କ ସମେତ ବହୁ ସରକାରୀ ଅଧିକାରୀ ଉପସ୍ଥିତ ଥିଲେ।
