ନୂଆଦିଲ୍ଲୀ, ୩।୮(ପି.ଟି.): ସୁରେଶ ରାଇନା ମୋ ପୁଅ ଭଳି। ତେବେ ମୁଁ ତାଙ୍କ ମାଲିକ ନୁହେଁ। ଏକଥା କହିଛନ୍ତି ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ମାଲିକ ଏନ୍ ଶ୍ରୀନିବାସନ। ରାଇନା ହଠାତ୍ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରୁ ଓହରିବା ପରେ ତାଙ୍କ ପ୍ରତ୍ୟାବର୍ତ୍ତନ ନେଇ ଚର୍ଚ୍ଚା ହେଉଛି। ଏ ନେଇ ଶ୍ରୀନିବାସନ ନିଜର ମତ ରଖିଛନ୍ତି। ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ଅଧ୍ୟକ୍ଷତାରେ ଟିମ୍ ମ୍ୟାନେଜମେଣ୍ଟ ରାଇନାଙ୍କ ପ୍ରତ୍ୟାବର୍ତ୍ତନ ନେଇ ନିଷ୍ପତ୍ତି ନେବ ବୋଲି ଶ୍ରୀନିବାସନ ସ୍ପଷ୍ଟ କରିଛନ୍ତି।
ଗତ ସପ୍ତାହରେ ଦୀପକ ଜହରଙ୍କ ସମେତ ସିଏସ୍କେ ଦଳରେ ୧୩ଟି କୋଭିଡ୍-୧୯ କେସ୍ ଦେଖିବାକୁ ମିଳିଥିଲା। ତେବେ ଜୈବ ସୁରକ୍ଷିତ ପରିବେଶ ବା ବାୟୋ ବବଲର ଉଲ୍ଲଂଘନ ନେଇ ବିବାଦ ସୃଷ୍ଟି ହୋଇଥିଲା। ଖେଳାଳିମାନେ ଏହାକୁ ଖଣ୍ଡନ କରିଥିଲେ। ରାଇନା ଓହରିଯିବା ପରେ ପୂର୍ବତନ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ଶ୍ରୀନିବାସନ ଅସନ୍ତୋଷ ଜାହିର କରିଥିଲେ। ତେବେ ପରେ ସେ ନରମ ସ୍ବଭାବ ପ୍ରଦର୍ଶନ କରିଥିଲେ।
ରାଇନାଙ୍କୁ ପୁଅ ଭଳି ଦେଖେ। କ୍ରିକେଟ ମାମଲାରେ ଫ୍ରାଞ୍ଚାଇଜ୍ କେବେ ମୁଣ୍ଡ ପୂରାଏନି। ୬୦ ଦଶକରୁ ଇଣ୍ଡିଆ ସିମେଣ୍ଟ କ୍ରିକେଟ ପରିଚାଳନା କରୁଛି। ଏହି ଆଭିମୁଖ୍ୟକୁ ଆମେ ଆଗକୁ ମଧ୍ୟ ବଜାୟ ରଖିବୁ। ତେବେ ରାଇନାଙ୍କ ପ୍ରତ୍ୟାବର୍ତ୍ତନ ସମ୍ପର୍କରେ ମୋର କିଛି କରିବାର ନାହିଁ ବୋଲି ସେ ସ୍ପଷ୍ଟ କରିଛନ୍ତି। ଏ ନେଇ ନିଷ୍ପତ୍ତି ନେବାର ଅଧିକାର ମଧ୍ୟ ମୋର ନାହିଁ। ଆମେ ଟିମ୍ ତଥା ଫ୍ରାଞ୍ଚାଇଜ୍ର ମାଲିକ। କିନ୍ତୁ ଖେଳାଳିଙ୍କର ନୁହେଁ। ରାଇନାଙ୍କ ସମେତ କୌଣସି ଖେଳାଳିଙ୍କର ମାଲିକ ମୁଁ ନୁହେଁ। ଏ ସମ୍ପର୍କରେ ଟିମ୍ ମ୍ୟାନେଜମେଣ୍ଟ ନିଷ୍ପତ୍ତି ନେବ। ଅଧିନାୟକ ଧୋନୀ ଓ ମୁଖ୍ୟ କାର୍ଯ୍ୟନିର୍ବାହୀ କେ.ଏସ୍. ବିଶ୍ୱନାଥଙ୍କ ଉପରେ ସବୁ କିଛି ନିର୍ଭର କରେ। ମୁଁ କ୍ରିକେଟ ଅଧିନାୟକ ନୁହେଁ। ଦଳରେ କିଏ ଖେଳିବ ଓ ନ ଖେଳିବ ସେ ନେଇ କେବେ ନିଜର ମତ ଦେଇନାହିଁ। କ୍ରିକେଟ ବ୍ୟାପାରରେ ମୁଣ୍ଡ କେବେ ଖେଳାଇନାହିଁ ବୋଲି ସେ କହିଛନ୍ତି। ସିଏସ୍କେ ଆଇପିଏଲ୍ରେ ୩ଥର ଚାମ୍ପୟନ ଓ ଏକାଧିକବାର ରନର୍ସଅପ୍ ହେବାର ସୌଭାଗ୍ୟ ଅର୍ଜନ କରିଛି। କୋଭିଡ୍-୧୯ ମହାମାରୀ କାରଣରୁ ଆଇପିଏଲ୍ ଭାରତରୁ ସ୍ଥାନନ୍ତର ହୋଇ ୟୁନାଇଟେଡ ଆରବ ଏମିରେଟ୍ (ୟୁଏଇ)ରେ ଖେଳାଯିବ।