ରାଉରକେଲା ଅଫିସ,୧୯।୫: ରାଉରକେଲା ସହରରେ ପ୍ରବଳ ତାତି ଯୋଗୁ ଫୁଲ ଶୁଖିଯାଉଛି । ଫଳରେ ବ୍ୟବସାୟ ସମ୍ପୂର୍ଣ୍ଣ ମାନ୍ଦା ହୋଇପଡ଼ିଛି। ସହରର ୩ ଶହରୁ ଊର୍ଦ୍ଧ୍ୱ ସ୍ଥାନରେ ଫୁଲ ବ୍ୟବସାୟ ହୋଇଥାଏ। ହେଲେ ଖରା ଯୋଗୁ ଏବେ ଫୁଲର ଚାହିଦା କମିଛି। ସହରର ବିଭିନ୍ନ ଧାର୍ମିକ ସ୍ଥଳରେ ଲୋକମାନେ ଆଉ ଆଗଭଳି ଫୁଲ ଚଢାଉ ନ ଥିବାରୁ ଧାର୍ମିକ ସ୍ଥଳରେ ଫୁଲର ମହକ ପୂର୍ବଭଳି ଆଉ ଦେଖିବାକୁ ମିଳୁୁନାହିଁା। ବିବାହ ଉତ୍ସବ, ବିଭିନ୍ନ କାର୍ଯ୍ୟକ୍ରମରେ ସ୍ବାଗତ ଜଣାଇବା ପାଇଁ ମଧ୍ୟ ଫୁଲର ଆବଶ୍ୟକତା ପଡ଼ିଥାଏ। ବିଶେଷ କରି ଗୋଲାପ, ଗେଣ୍ଡୁ, ରଜନୀ ଗନ୍ଧା, ଗିଲାଡି, ସୂର୍ଯ୍ୟମୁଖି, ଗୁଲୁବାର, ରଡ଼, ମନ୍ଦାର, କଇଁ ପ୍ରମୁଖ ବିକ୍ରି ହୋଇଥିଏ। ସୂର୍ଯ୍ୟମୁଖି, ମନ୍ଦାର, କଇଁ ଆଦି ଫୁଲ ସ୍ଥାନୀୟ ଅଞ୍ଚଳରୁ ଆସୁଥିବା ବେଳେ ଅନ୍ୟ ସମସ୍ତ ଫୁଲ ବାଙ୍ଗଲୋର, କଲିକତା ଏବଂ ରାୟପୁର ଆଦି ଦୂରଦୂରାନ୍ତରୁ ଆସିଥାଏ। ବର୍ତ୍ତମାନ ବିବାହ କାଳୀନ ମୁହୂର୍ତ୍ତରେ ତଥା ପୂଜାପର୍ବାଣୀ ସମୟରେ ସହରରେ ପ୍ରବଳ ଗ୍ରୀଷ୍ମ ପ୍ରବାହ ଯୋଗୁ ଫୁଲ ଶୁଖିଯାଉଛି। ଯାହାଫ ବି ଫୁଲ ରହୁଛି ସେ ସବୁ ଉଚ୍ଚା ଦରରେ ବିକ୍ରି ହେଉଛି। ଫଳରେ ଲୋକେମାନେ ଆଉ ଫୁଲ ପ୍ରତି ଆଗ୍ରହ ଦେଖାଉ ନାହାଁନ୍ତି। ଏନେଇ ରାଉରକେଲା ସେକ୍ଟର-୨ ଛକ ଫୁଲ ବ୍ୟବସାୟୀ ଶୁକଦେବ ରାଉତଙ୍କୁ ପଚାରିବାରୁ ମାସକ ମଧ୍ୟରେ ମୋର ୫୦ହଜାର ଟଙ୍କାର ଫୁଲ ପ୍ରବଳ ଗରମ ଯୋଗୁଁ ନଷ୍ଟ ହୋଇଯାଇଛି। ବାଙ୍ଗାଲୋର, କଲିକତା ଓ ରାୟପୁରରୁ ଲକ୍ଷାଧିକ ଟଙ୍କାର ଫୁଲ ଆଣିଥିଲି। ମାତ୍ର ସବୁ ଖରାରେ ଶୁଖିଯାଇଛି। ଗୋଟିଏ ପଟେ ଫୁଲ ବାବଦୀୟ ମୂଳରାଶି ଫେରୁନଥିବା ବେଳେ ଫୁଲଗୁଛ, ଫୁଲମାଳା ନିର୍ମାଣ ପାଇଁ ନିୟୋଜିତ ଶ୍ରମିକଙ୍କ ଦେୟ ରାଶି ପ୍ରଦାନରେ କଷ୍ଟ ହେଉଛି। ରାଉରକେଲାରେ ବର୍ତ୍ତମାନ ଫୁଲ ବ୍ୟବସାୟ ସମ୍ପୂର୍ଣ୍ଣ ମାନ୍ଦା ପଡ଼ି ଯାଇଥିବା କହିଛନ୍ତି। ଏନେଇ ହନୁମାନବାଟିକା ଶିବ ମନ୍ଦିରର ପୂଜକ ଶରତ ମିଶ୍ର କୁହନ୍ତି, ପ୍ରବଳ ଗରମ ଯୋଗୁ ଫୁଲ ଶୁଖିଯାଉଛି। ଫଳରେ ଫୁଲ ଦର ଆକାଶ ଛୁଆଁ ହୋଇଛି। ତେଣୁ ଶ୍ରଦ୍ଧାଳୁମାନେ ଆଗଭଳି ଆଉ ମନ୍ଦିରକୁ ଫୁଲ ଆଣୁ ନାହାଁନ୍ତି।