କୁଜଙ୍ଗ, ୨୧ା୩ (ଡି.ଏନ୍.ଏ.):ଖରିଫ୍ ଧାନ ପାଇଁ ଚାଷୀମାନେ ସରକାରି ମଣ୍ଡିରେ ଧାନ ଦେବା ପାଇଁ ପଞ୍ଜୀକରଣ କରି ଟୋକନ ପାଇଥିଲେ। କିନ୍ତୁ ମଣ୍ଡି ଖୋଲୁ ନ ଥିବାରୁ ଚାଷୀମାନେ ଧାନ ବିକ୍ରି କରିପାରୁ ନ ଥିବା ଅଭିଯୋଗ ହୋଇଛି। କୁଜଙ୍ଗ ବ୍ଲକ ଅନ୍ତର୍ଗତ ଗୋପିଆକୁଦ ପ୍ରାଥମିକ ସେବା ସମବାୟ ସମିତରେ ଏଭଳି ଘଟଣା ଦେଖିବାକୁ ମିଳିଛି। ଶେଷ ପର୍ଯାୟରେ ଧାନ ଦେବା ପାଇଁ ସମୟ ସୀମା ଆଉ ମାତ୍ର ୨ ଦିନ ଥିବାବେଳେ ଏନେଇ ଚାଷୀଙ୍କ ଚିନ୍ତା ବଢ଼ିଯାଇଛି।
ଏହି ପର୍ଯାୟରେ ୧୯୦୦ କୁଇଣ୍ଟାଲ ଧାନ ସଂଗ୍ରହ ନିମନ୍ତେ ୭୦ ଜଣ ଚାଷୀଙ୍କୁ ସମବାୟ ସମିତି ତରଫରୁ ଟୋକନ ଦିଆଯାଇଥିଲା। ଏନେଇ ମଣ୍ଡିରେ ଧାନ ଦେବା ପାଇଁ ଚାଷୀ ପହଞ୍ଚତ୍ ଥିଲେ। ମାତ୍ର ସରକାରଙ୍କ ପକ୍ଷରୁ ଟାର୍ଗେଟ ଆସିଲେ ଧାନ ସଂଗ୍ରହ କରାଯିବ ବୋଲି ସମିତି ସମ୍ପାଦକ କହିଥିଲେ। ସେବେଠାରୁ ମଣ୍ଡି ବନ୍ଦ ଥିବାବେଳେ ଚାଷୀମାନେ ସେଠାରେ ଧାନ ରଖି ଜଗି ବସିଥିଲେ। ମାତ୍ର ୪ ଦିନ ପୂର୍ବରୁ ବର୍ଷା ଉଠାଇବାରୁ ପୁନର୍ବାର ଚାଷୀ ଗାଡ଼ି ଭଡ଼ା ଦେଇ ଧାନକୁ ଘରେ ଆଣି ରଖିଛନ୍ତି। ଆସନ୍ତା ୨୨ରେ ପରେ ଚାଷୀକୁ ମିଳିଥିବା ଟୋକନ ଅକାମି ହୋଇଯିବ। ସମ୍ପର୍କରେ ଗୋପିଆକୁଦ ପ୍ରାଥମିକ ସେବା ସମବାୟ ସମିତି ସମ୍ପାଦକ ସରୋଜ ସ୍ବାଇଁଙ୍କୁ ପଚାରିବାରେ କହିଥିଲେ, ସରକାରଙ୍କ ପାଖରୁ ଟାର୍ଗେଟ୍ ଆସିଲେ ଧାନ କ୍ରୟ କରାଯିବ । ଯଦି ଟାର୍ଗେଟ୍ ନ ଆସିଲା ସେମାନେ କିଛି କରିପାରିବେ ନାହିଁ। ଏ ସମ୍ପର୍କରେ ପୂର୍ବତନ ସମବାୟ ସମିତି ସଭାପତି ତଥା ଚାଷି ନେତା ନୂତନ ତ୍ରିପାଠୀ କହିଛନ୍ତି, ସରକାର ଧାନ ସଂଗ୍ରହ ନିମନ୍ତେ ଟୋକନ ଦେଲେ। କିନ୍ତୁ ସମ୍ପାଦକ ଯେଉଁ ଟାର୍ଗେଟ୍ କଥା କହି ଏଡେଇ ଯାଉଛନ୍ତି ତାହା ଆମ ମନ ଭିତରେ ସନ୍ଦେହ ସୃଷ୍ଟି କରୁଛି। ଖାଲି ଗୋପିଆକୁଦ ପଞ୍ଚାୟତ ନୁହେଁ ଅନ୍ୟାନ୍ୟ ମଣ୍ଡିରେ ମଧ୍ୟ ଏହି ସମସ୍ୟା ଉପୁଜିଛି। ଏହାପଛର କାରଣ ସମ୍ପର୍କରେ ବିଧିବଦ୍ଧ ତଦନ୍ତ କରାଯିବା ଉଚିତ ବୋଲି ତ୍ରିପାଠୀ କହିଛନ୍ତି।