ପୋଲସରା,୧୫ା୧୦(ଡି.ଏନ.ଏ.): ଓଡ଼ିଶାର ମିଲେଟ ଖାଦ୍ୟ ପ୍ୟାରିସରେ ବିଦେଶୀମାନଙ୍କ ମନ ମୋହିବ। ଓଡିଶା ମିଲେଟ ମିଶନର ସହଯୋଗରେ ପୋଲସରା ବ୍ଲକ ଚିରିକିପଡା ଶାସନ ଗ୍ରାମର ରାଇମାଳି ମହିଳା ସ୍ବୟଂ ସହାୟକ ଗୋଷ୍ଠୀକୁ ଏହି ସୁଯୋଗ ମିଳିଛି। ଓଡିଶା ସରକାର ପୃଷ୍ଟିସାର ଯୁକ୍ତ ମିଲେଟ ଖାଦ୍ୟ ଶସ୍ୟ ଚାଷ ପାଇଁ ପ୍ରୋତ୍ସାହନ ଯୋଗାଇ ଚାଷଙ୍କ ଆଗ୍ରହ ସୃଷ୍ଟି କରିଥିବା ଯୋଗୁଁ ବିଶ୍ୱ ଖାଦ୍ୟ ସଙ୍ଗଠନ ଓଡିଶା ରାଜ୍ୟ ସରକାରଙ୍କୁ ପ୍ରଶଂସା କରିଛନ୍ତି। ଓଡିଶା ସରକାର ମିଲେଟ ଖାଦ୍ୟ ଶସ୍ୟ ମାଣ୍ଡିଆ ଚାଷର ପ୍ରସାର ପାଇଁ ମିଲେଟ ମିଶନ ଜରିଆରେ ପୋଲସରା ବ୍ଲକର ଦାୟିତ୍ୱ ଅଗ୍ରଣୀ ସ୍ବେଚ୍ଛାସେବୀ ସଙ୍ଗଠନ ‘ଇଣ୍ଡିଆ’କୁ ପ୍ରଦାନ କରାଯାଇଛି। “ଇଣ୍ଡିଆ”ର ଡ଼ାଇରେକ୍ଟର ଡ଼ଃ କୁମୁଦ ଚନ୍ଦ୍ର ବେହେରାଙ୍କ ଉଦ୍ୟମ ଯୋଗୁଁ ପୋଲସରା ବ୍ଲକର ୧୯ ଟି ପଞ୍ଚାୟତର ୭୨ଟି ଗ୍ରାମର ୧୬୦୧ ଜଣ ଚାଷୀ ୭୧୯ ହେକ୍ଟର ଜମିରେ ଜୈବିକ ସାର ପ୍ରୟୋଗ କରି ମାଣ୍ଡିଆ ଚାଷ କରିଛନ୍ତି। ଇଣ୍ଡିଆ ପକ୍ଷରୁ ରାଇମାଳି ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ ବିଭିନ୍ନ ଯନ୍ତ୍ରପାତି ଯୋଗାଇ ମାଣ୍ଡିଆରୁ ଚୁନା, ଲଡୁ, ସେଉ ଓ ଗାଣ୍ଠିଆ ଆଦି ତିଆରି କରିବା ପାଇଁ ତାଲିମ ଦେଇଥିଲେ। ଏ ସମସ୍ତ ଖାଦ୍ୟ ପ୍ୟାରିସରେ ଆନ୍ତର୍ଜାତୀୟ ଖାଦ୍ୟ ପଦାର୍ଥ ପ୍ରଦର୍ଶନୀରେ ବିକ୍ରି କରାଯିବ। ସେଥିପାଇଁ ସ୍ବୟଂ ସହାୟକ ଗୋଷ୍ଠୀର ସଭାନେତ୍ରୀ ଚନ୍ଦ୍ରମା ସାହୁ ଶୁକ୍ରବାର ପ୍ୟାରିସ ସହରକୁ ଯାଇଛନ୍ତି। ଜିଲାରୁ ଏକମାତ୍ର ସ୍ବୟଂ ସହାୟକ ଗୋଷ୍ଠୀକୁ ବିଦେଶରେ ମାଣ୍ଡିଆ ଖାଦ୍ୟ ସାମଗ୍ରୀ ବିକ୍ରିପାଇଁ ସୁଯୋଗ ମିଳିଥିବାରୁ ଶ୍ରମ ମନ୍ତ୍ରୀ ଶ୍ରୀକାନ୍ତ ସାହୁ ଶୁଭେଚ୍ଛା ଜଣାଇଛନ୍ତି।