ଝାରସୁଗୁଡ଼ା ଅଫିସ,୯ା୫: ବ୍ରଜରାଜନଗର ଉପନିର୍ବାଚନ ଆସନ୍ତା ୩୧ ତାରିଖରେ ହେବାକୁ ଥିବାବେଳେ ଦଳୀୟ ପ୍ରାର୍ଥୀ କିଭଳି ସଫଳତାର ସହ ବିଜୟୀ ହେବେ ଏନେଇ ଭାଜପା ତା’ର ରଣନୀତି ପ୍ରସ୍ତୁତ ଚଳାଇଛି। ଏଭଳି ସ୍ଥିତିରେ ଦଳର ଜିଲା ସଭାପତି ମଙ୍ଗଳ ସାହୁ ନିଜର ଅସନ୍ତୋଷ ବ୍ୟକ୍ତ କରି ପଦରୁ ଇସ୍ତଫା ଦେଇଛନ୍ତି। ସେ ତାଙ୍କ ଇସ୍ତଫାପତ୍ର ଦଳର ରାଜ୍ୟ ସଭାପତି ସମୀର ମହାନ୍ତିଙ୍କ ନିକଟକୁ ପଠାଇ ଦେଇଥିବା ଜଣାପଡ଼ିଛି ।
ଏଥିରେ ସେ ଉଲ୍ଲେଖ କରିଛନ୍ତି, ଜିଲାର ଦଳୀୟ ନେତୃବୃନ୍ଦ ମଧ୍ୟରେ ଅନେକ ସମୟରେ ସମନ୍ବୟ ରହୁନାହିଁ। ଫଳରେ ସମସ୍ତଙ୍କୁ ଏକା ସାଙ୍ଗରେ ନେଇ କାମ କରିବା ଅସମ୍ଭବ ହୋଇପଡୁଛି। ସେ ଜିଲା ସଭାପତି ରହିଥିଲେ ମଧ୍ୟ ଦଳରେ ତାଙ୍କୁ ଅନେକ ସମୟରେ ଅଣଦେଖା କରାଯାଉଥିବା ସେ ଇସ୍ତଫାପତ୍ରରେ ଦର୍ଶାଇଛନ୍ତି। ଦୀର୍ଘ ୨୫ବର୍ଷ ଦଳର ବିଭିନ୍ନ ପଦପଦବୀରେ ରହି ସେ ଦଳ ପାଇଁ କାମ କରିଆସିଛନ୍ତି । ଏବେ ଆଉ ଦଳର କୌଣସି ପଦପଦବୀରେ ରହି କାମ କରିବେ ନାହିଁ ବୋଲି କହିଛନ୍ତି।
ସୂଚନାଯୋଗ୍ୟ, ଜିଲା ସଭାପତି ସାହୁ ଚଳିତ ଉପନିର୍ବାଚନରେ ଆଶାୟୀ ପ୍ରାର୍ଥୀ ରହିଥିବାବେଳେ ଦଳର କେନ୍ଦ୍ରୀୟ ଚୟନ କମିଟି ଦଳୀୟ ପ୍ରାର୍ଥୀଭାବେ ପୂର୍ବତନ ବିଧାୟିକା ରାଧାରାଣୀ ପଣ୍ଡାଙ୍କ ନାମ ଘୋଷଣା କରିଛି। ଏଥିରେ ଜିଲା ସଭାପତି ସାହୁ ଅସନ୍ତୋଷ ବ୍ୟକ୍ତ କରି ଏଭଳି ନିଷ୍ପତ୍ତି ନେଇଥିବା ଚର୍ଚ୍ଚା ହେଉଛି।