ରାୟଗଡ଼ା,୧୫।୬(ଆଶିଷ ରଞ୍ଜନ ପଣ୍ଡା): ରାୟଗଡ଼ା ସହରରେ ଲୁଟେରାଙ୍କ ପ୍ରାଦୁର୍ଭାବ ବଢ଼ିବାରେ ଲାଗିଛି। ପ୍ରତିଦିନ କେଉଁଠି ନା କେଉଁ ଚୋରି, ରାହାଜାନି ହେଉଥିବା ଖବର ମିଳୁଥିଲେ ମଧ୍ୟ ପୋଲିସ ପକ୍ଷରୁ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ଅଭିଯୋଗ ହେଉଛି। ଗୁରୁବାର ଜଣେ ବୟସ୍କା ମହିଳା ମର୍ନିଂୱାକ୍ରେ ଯାଉଥିବା ବେଳେ ଜଣେ ଦୁର୍ବୃତ୍ତ ବେକରୁ ସୁନା ମଙ୍ଗଳସୂତ୍ର ଟାଣି ନେଇଥିବା ଅଭିଯୋଗ ହୋଇଛି। ଦୁର୍ବୃତ୍ତ ଲୁଟି ନେଇଥିବା ମଙ୍ଗଳସୂତ୍ର ପ୍ର୍ରାୟ ୬ ଭରି ଓଜନର ହୋଇଥିବାବେଳେ ଯାହାର ଆନୁମାନିକ ମୂଲ୍ୟ ପ୍ରାୟ ୫ଲକ୍ଷରୁ ଊର୍ଦ୍ଧ୍ୱ ଟଙ୍କା ହେବ ବୋଲି ମହିଳା ଜଣକ କହିଛନ୍ତି।
ସୂଚନା ଅନୁଯାୟୀ, ସାଇପ୍ରିୟାନଗର ବାସିନ୍ଦା କେ.ରାମାରାଓ ଓ ତାଙ୍କ ସ୍ତ୍ରୀ ଗୁରୁବାର ସକାଳେ ମର୍ନିଂୱାକ୍ରେ ଯାଇଥିଲେ । ସେମାନେ ଘରୁ ବାହାରି ବାଇପାସ୍ ଦେଇ ବାରିଝୋଲା ରାସ୍ତାରେ ଯିବା ସମୟରେ ରୟତ କଲୋନି ରାସ୍ତା ଛକ ଓ ରେଲୱେ କ୍ରସିଂ ମଧ୍ୟରେ ଜଣେ ଦୁର୍ବୃତ୍ତ ଆସି ତାଙ୍କ ବେକରୁ ମଙ୍ଗଳସୂତ୍ର ଝାମ୍ପିନେଇ ଚମ୍ପଟ ମାରିଥିଲେ । ପରେ ଦମ୍ପତି ଥାନାକୁ ଯାଇ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତିକରି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ ମଧ୍ୟ ଲୁଟେରାଙ୍କ ସମ୍ପର୍କରେ କୌଣସି ଟେର ପାଇନାହିଁ । ସହରରେ ଏହିଭଳି ଚୋରି ଓ ଛିନ୍ତାଇ ବାରମ୍ବାର ଘଟୁଥିଲେ ମଧ୍ୟ ପୋଲିସର ଅବହେଳା କାରଣରୁ ଧରାପଡ଼ୁ ନ ଥିବା ଅଭିଯୋଗ ହେଉଛି। ସେହିପରି ସହରରେ ସିସି କ୍ୟାମେରା ଲାଗାଯାଇଥିଲେ ମଧ୍ୟ ତାହା କାମରେ ଆସୁ ନ ଥିବା କୁହାଯାଉଛି। ତେଣୁ ନୂତନ ଭାବେ ଦାୟିତ୍ୱ ଗ୍ରହଣ କରିଥିବା ଦକ୍ଷିଣ-ପଶ୍ଚିମାଞ୍ଚଳ ଡିଆଇଜି ଚରଣ ସିଂ ମୀନା ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।