ମାଙ୍ଗାଲୁରୁ,୨୦।୧୧: କର୍ନାଟକ ମାଙ୍ଗାଲୁରୁରେ ଶନିବାର ଘଟିଥିବା ଅଟୋରିକ୍ସା ବିସ୍ଫୋରଣ ଘଟଣାରେ ଆତଙ୍କବାଦୀ ଲିଙ୍କ୍ ରହିଥିବା ଜଣାପଡିଛି। କର୍ନାଟକ ପୋଲିସ ଡିଜି ପ୍ରବୀଣ ସୁଦ୍ ଏହି ସୂଚନା ଦେଇଛନ୍ତି। ବିସ୍ଫୋରଣ ସାଧାରଣ ନ ଥିଲା। ଏଥିରେ ଆତଙ୍କବାଦୀଙ୍କ ଷଡଯନ୍ତ୍ର ରହିଥିବା ପାଲିସର ପ୍ରାଥମିକ ତଦନ୍ତରୁ ଜଣାପଡିଛି। କେନ୍ଦ୍ରୀୟ ତଦନ୍ତକାରୀ ସଂସ୍ଥା ସହିତ କର୍ନାଟକ ପୋଲିସ ଘଟଣାର ତଦନ୍ତ କରୁଥିବା ଡିଜିପି କହିଛନ୍ତି।
ଶନିବାର ସନ୍ଧ୍ୟାରେ ମାଙ୍ଗାଲୁରୁ ରାସ୍ତାରେ ଏକ ଅଟୋରିକ୍ସା ଯାଉଥିବା ବେଳେ ହଠାତ୍ ବିସ୍ଫୋରଣ ହୋଇଥିଲା। ଏଥିରେ ଅଟୋ ଡ୍ରାଇଭରଙ୍କ ସମେତ ଜଣେ ଯାତ୍ରୀ ଆହତ ହୋଇଥିଲେ। ତେବେ ଯାତ୍ରୀଙ୍କ ବ୍ୟାଗରେ ଥିବା ସନ୍ଦେହଜନକ ବସ୍ତୁ ବିସ୍ଫୋରଣର କାରଣ ବୋଲି ଆହତ ଅଟୋ ଡ୍ରାଇଭର କହିଛନ୍ତି। ଅନ୍ୟପକ୍ଷେ ପୋଲିସ ଅଟୋରିକ୍ସାରୁ ବ୍ୟାଟେରୀ ଥିବା ଏକ ପୋଡା ପ୍ରେସର କୁକର୍ ଜବତ କରିଛି ।
ଅନ୍ୟପକ୍ଷେ ବିସ୍ଫୋରଣରେ ଆହତ ଶାରିକ୍ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ପ୍ରାଥମିକ ଅନୁସନ୍ଧାନରୁ, ଆହତ ଶାରିକ୍ଙ୍କ ସହ ଆତଙ୍କବାଦୀଙ୍କ ସହ ସମ୍ପର୍କ ଥିବା ଜଣାପଡିଛି। ଏଭଳିସ୍ଥତିରେ ପୋଲିସ ରବିବାର ମିସୁରୁଠାରୁ ୧୩ କି.ମି. ଦୂରରେ ଥିବା ମଦାହଲ୍ଲୀରେ ସେ ରହୁଥିବା ଭଡା ଘରେ ପହଞ୍ଚି ତଦନ୍ତ ଆରମ୍ଭ କରିଛି। ସେତିକିବେଳେ ବୋମା ନିସ୍କିୟକାରୀ ଦଳ ମଧ୍ୟ ଉପସ୍ଥିତ ରହିଥିଲେ। ପୋଲିସ ସୂଚନା ମୁତାବକ, ସେ ଗତ ମାସରେ ମଦାହଲ୍ଲୀକୁ ଆସି ଏକ ଘର ଭଡା ନେଇ ରହୁଥିଲେ। ଏପରି କି ସେ ଘର ମାଲିକଙ୍କୁ ମୋବାଇଲ ମରାମତି ତାଲିମ ନେବାକୁ ଆସିଥିବା କହିଥିଲେ। ଅନ୍ୟପକ୍ଷେ ସେ କୋଏମ୍ବାଟୁରରୁ ଏକ ସିମ୍ କିଣିଛନ୍ତି। ହେଲେ ତାଙ୍କ ନାମରେ ଏହି ସିମ୍ ନ ଥିବା ଜଣା ଜଣାପଡିଛି। ଏନେଇ ପୋଲିସ ଘଟଣାର ଅଧିକ ତଦନ୍ତ ଚଳାଇଛି।