ଥିରୁଭାନନ୍ତପୁରମ୍,୨୭ା୪: କେରଳର ଏକ ଫଳ ଦୋକାନରୁ ଜଣେ ପୋଲିସ କର୍ମଚାରୀ ୧୦ କେ.ଜି. ଆମ୍ବ ଚୋରି କରି ଧରାପଡ଼ିଛନ୍ତି। ପୋଲିସ ବିଭାଗକୁ ଲଜ୍ଜିତ କରିଥିବାରୁ ବୁଧବାର ଏହି ଆମ୍ବ ଚୋରଙ୍କୁ ଚାକିରିରୁ ବରଖାସ୍ତ କରାଯାଇଥିବା ଇଡୁକ୍କି ଏସ୍ପିଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି। ପ୍ରକାଶ ଯେ, ଗତ ସେପ୍ଟେମ୍ବରରେ କୋଟ୍ଟାୟମ ଜିଲା କାଞ୍ଜିରାପଲ୍ଲୀସ୍ଥିତ ଏକ ଦୋକାନରୁ ପୋଲିସ ଅଫିସର ପି.ଭି. ଶାହିବ ଏକ ଦାମୀ ଆମ୍ବ ପେଟି ଚୋରି କରି ନିଜ ବାଇକ୍ରେ ଧରି ପଳାଇଥିଲେ। ଏହି ଦୃଶ୍ୟ ସିସିଟିଭିରେ କଏଦ୍ ହୋଇଥିଲା। ଦୋକାନୀ ଦୋକାନ ଖୋଲିବା ପାଇଁ ଆସି ଦେଖିବାବେଳକୁ ଗୋଟିଏ ପେଟି ଆମ୍ବ ନ ଥିବା ଜାଣିଥିଲେ। ସେ ସିସିଟିଭି ଯାଞ୍ଚ କରିବା ପରେ ଏହି ବିଷୟ ସାମ୍ନାକୁ ଆସିଥିଲା। ସୋସିଆଲ ମିଡିଆରେ ଏହା ଭାଇରାଲ ହେବା ପରେ ଇଡୁକି ଆର୍ମଡ ରିଜର୍ଭ କ୍ୟାମ୍ପ ପୋଲିସ ୟୁନିଟରେ କାର୍ଯ୍ୟରତ ଶାହିବ କିଛିଦିନ ଧରି ଉଭାନ ହୋଇଯାଇଥିଲେ। ଦୋକାନୀ ତାଙ୍କ ବିରୋଧରେ ଏତଲା ଦେଇଥିଲେ। ପୋଲିସ ଅଫିସରଙ୍କୁ ଆମ୍ବ ଚୋରି ଅଭିଯୋଗରେ ଏବେ ଚାକିରିରୁ ବିଦା କରାଯାଇଛି।
