ପାରାଦୀପ,୩୧ା୧୦(ସ୍ବ.ପ୍ର.): ନିଜ ଅଭିନୟରେ ଅନ୍ୟଙ୍କୁ ହସାଉଥିବା କଳାକାରଙ୍କ ଆଖିରୁ ଏବେ ଲୁହ ଝରୁଛି। ଅନେକ ଅପେରାରେ ହାସ୍ୟ କଳାକାର ଭୂମିକାରେ ଅଭିୟନ କରି ପ୍ରସିଦ୍ଧି ଲାଭ କରିଥିବା ଏହି ବ୍ୟକ୍ତି ଜଣକ ହେଉଛନ୍ତି ଓଡ଼ିଆ ଯାତ୍ରା ଜଗତର ସୁପରିଚିତ ନାମ ମଣିଭଦ୍ର ବିଶ୍ୱାଳ(୮୨)। ସମୟ ଚକ୍ରରେ ଏବେ ସେ ପାରାଦୀପ ଉପକଣ୍ଠ ଗଡ ଗ୍ରାମରେ ଥିବା ରତ୍ନମାଳି ଜେମା ଜରାଶ୍ରମରେ ଆଶ୍ରୟ ନେଇଛନ୍ତି। ପରିଣତ ବୟସରେ ପରିବାର ଉପରେ ବୋଝ ହେବେନି ବୋଲି ସେ ଯୁକ୍ତି ବାଢ଼ିଛନ୍ତି। ପ୍ରକୃତରେ ତାଙ୍କ ପୁଅମାନେ ବାପାଙ୍କୁ ଅଣଦେଖା କରିବାରୁ ସେ ଘର ଛାଡି ଏବେ ଜରାଶ୍ରମରେ ପହଞ୍ଚତ୍ବା ସୂଚନା ମିଳିଛି।
ମଣିଭଦ୍ରଙ୍କ ଘର ବାଲେଶ୍ୱର ଜିଲା ଓଳିଆପାଟଣା ଗ୍ରାମରେ। ସେ ମାଟ୍ରିକ ପାସ୍ ପରେ ଶିକ୍ଷକତା କରୁଥିଲେ। ସେତେବେଳେ ତାଙ୍କୁ ଗାଁ ଡ୍ରାମାରେ ଅଭିନୟ କରିବା ପାଇଁ ଜଣେ ଡାକିଥିଲେ। ସେହି ନାଟକକୁ ହରେକୃଷ୍ଣ ମହତାବ ଦେଖି ଖୁସି ହୋଇ ମଣିଭଦ୍ରଙ୍କୁ ରସରାଜ ବୋଲି ସମ୍ବୋଧିତ କରିଥିଲେ। ସେହି ପ୍ରେରଣା ଯୋଗୁ ସେ ଚାକିରି ଛାଡି ଯାତ୍ରା ଦୁନିଆରେ ସାମିଲ ହୋଇଥିଲେ। ପ୍ରଥମେ ବାର୍ଷିକ ୬୦ ଟଙ୍କା ରୋଜଗାର କରିଥିଲେ। ଧୀରେ ଧୀରେ ଲୋକପ୍ରିୟତା ବଢ଼ିବାରେ ତାଙ୍କର ପାରିଶ୍ରମିକ ବୃଦ୍ଧି ପାଇଥିଲା। ୨୦୧୮ ବେଳକୁ ସେ ବାର୍ଷିକ ୧୦ ଲକ୍ଷ ଟଙ୍କା ପାଉଥିଲେ ବୋଲି କୁହନ୍ତି। ୨୦୧୭ ରେ ସ୍ତ୍ରୀ ସୁବର୍ଣ୍ଣମଣିଙ୍କ ପରଲୋକ ହୋଇଥିଲା। ତା’ପରେ ସେ ଅଲେଖ ମହିମା ଧର୍ମରେ ଦୀକ୍ଷିତ ହୋଇ ଅଭିନୟରୁ ସନ୍ନ୍ୟାସ ନେଇଥିଲେ। ଦୁଇ ପୁଅ ହୃଦାନନ୍ଦ, ସଦାନନ୍ଦ ଓ ଗୋଟିଏ ଝିଅକୁ ନେଇ ତାଙ୍କ ସଂସାର। ସାନପୁଅ ପଢ଼ିବା ବେଳେ କିଛି ଭୁଲ କରିବାରୁ ଦଣ୍ଡସ୍ବରୂପ ଆର୍ଥିକ ସହାୟତା ଦେବା ବନ୍ଦ କରିଦେଇଥିଲେ। ବଡପୁଅଙ୍କୁ ଜୀବନର ସମସ୍ତ ରୋଜଗାର ଅର୍ଥ ଦେଉଥିଲେ। ଅଭିନୟ ଛାଡିବା ପରେ ଘରେ ରହିବା ବେଳକୁ ଅର୍ଥାତ୍ ୨ ବର୍ଷ ପୂର୍ବେ ବଡପୁଅ ତାଙ୍କୁ ଘରୁ ବାହାର କରିଦେଇଥିଲେ। ସେତେବେଳେ ଏନେଇ ଥାନାରେ ମାମଲା ହୋଇଥିଲା। ବଡପୁଅଠାରୁ ଅଲଗା ହୋଇ କିଛିଦିନ ବାହାରେ ରହିବା ପରେ ସାନପୁଅ ନେଇ ତାଙ୍କୁ ଘରେ ରଖି ଯତ୍ନ ନେଉଥିଲେ। ମଣିଭଦ୍ର ତାଙ୍କୁ କେବେ କୌଣସି ଆର୍ଥିକ ସାହାଯ୍ୟ କରି ନ ଥିବାରୁ ସାନପୁଅ ଉପରେ ବୋଝ ନ ହେବାକୁ ସ୍ଥିର କରି ପାରାଦୀପର ଏହି ଜରାଶ୍ରମକୁ ଚାଲି ଆସିଥିବା କୁହନ୍ତି।
ଆଗକୁ କ’ଣ ହେବ କହିହେବନାହିଁ ବୋଲି ସେ ଭାବାବେଗର ସହ କହିଥିଲେ। ଏବେ ସରକାରୀ ଭତ୍ତା ବାବଦରେ ମାସିକ ୧୨ଶହ ଟଙ୍କା ଲେଖାଏ ପାଉଛନ୍ତି। ୪୮ ବର୍ଷ କଳାକାର ଜୀବନରେ ୧୫ରୁ ଅଧିକ ଅପେରା ସହ ସେ ଜଡ଼ିତ ରହିଛନ୍ତି। କଳାକାର ଜୀବନର ଶ୍ରେଷ୍ଠ ନାଟକ ‘ହାତୀ ନେ ଘୋଡ଼ା ନେ,ମୋ ପେଁକାଳି ବଜାଇ ଦେ’ ବୋଲି ଲୋକେ କହୁଥିବା ବେଳେ ‘ବାଜୁଛି ମୁରଲୀ ନାଚୁଛି ରାଧା’ ତାଙ୍କର ଶ୍ରେଷ୍ଠ ନାଟକ ବୋଲି ମଣିଭଦ୍ର କୁହନ୍ତି। କଥା ହେବା ବେଳେ ସେ ନିଜକୁ ଦୃଢ ବୋଲି କହୁଥିଲେ ହେଁ ମନ ଭିତରେ କୋହ ଥିଲା। କିଛି ସମୟ ପରେ ଜରାଶ୍ରମର ଗୋଟିଏ ଖଟରେ ବସି ଲୁହ ଗଡାଉଥିବା ଦେଖିବାକୁ ମିଳିଥିଲା। ଏ ସମ୍ପର୍କରେ ଜରାଶ୍ରମର ସଭାପତି ସନ୍ତୋଷ ବେହେରା କୁହନ୍ତି, ୪ ଦିନ ତଳେ ସେ ଜଣେ କଳାକାରଙ୍କ ସହ ଏଠାକୁ ଆସି ରହିଛନ୍ତି। ପରିବାର ଓ ପିଲାମାନଙ୍କ ଅର୍ଥ ତାଡନା ତାଙ୍କୁ ବାଧିଛି ବୋଲି ସେ କୁହନ୍ତି। ଦିନେ ରଙ୍ଗମଞ୍ଚରେ ଅଭିନୟ ଦ୍ୱାରା ଦର୍ଶକଙ୍କୁ ହସାଉଥିବା ଏହି କଳାକାରଙ୍କ ପରିଣତ ବୟସର ଦୁଃଖ ଠିକ ନାଟକ କାହାଣୀ ପରି ଜଣାପଡ଼ୁଥିଲା।