ନୂଆଦିଲ୍ଲୀ, ୬ା୬: ମଣିପୁର ହିଂସାକାଣ୍ଡର ତଦନ୍ତ ଲାଗି କେନ୍ଦ୍ର ସରକାର ୩ ଜଣିଆ କମିଟି ଗଠନ କରିଛନ୍ତି। ଗୁଆହାଟୀ ହାଇକୋର୍ଟର ପୂର୍ବତନ ମୁଖ୍ୟ ବିଚାରପତି ଆଜାଇ ଲାମ୍ବାଙ୍କ ଅଧ୍ୟକ୍ଷତାରେ ଗଠିତ ତଦନ୍ତ କମିଶନରେ ଅବସରପ୍ରାପ୍ତ ପ୍ରଶାସନିକ ଅଧିକାରୀ ହିମାଂଶୁ ଶେଖର ଦାସ ଏବଂ ପୂର୍ବତନ ଗୋଇନ୍ଦା ଅଧିକାରୀ ପ୍ରଭାକର ଆଲୋକ ସଦସ୍ୟ ଅଛନ୍ତି। ମେ’ ୩ ପରେ ମଣିପୁରରେ ଘଟିଥିବା ଏକାଧିକ ହିଂସାରେ ୯୮ ଜଣଙ୍କ ମୃତ୍ୟୁ ଘଟିବା ସହ ୩୧୦ ଜଣ ଆହତ ହୋଇଛନ୍ତି। ବିଭିନ୍ନ ସମ୍ପ୍ରଦାୟ ସଦସ୍ୟଙ୍କୁ ଟାର୍ଗେଟକରି ହିଂସାକାଣ୍ଡ ଓ ଦଙ୍ଗା ବ୍ୟାପିବାର କାରଣ ସମ୍ପର୍କରେ କମିଟି ତଦନ୍ତ କରିବ। କେଉଁ କାର୍ଯ୍ୟର ପରିଣାମ ସ୍ବରୂପ ହିଂସା ବ୍ୟାପିଲା ଏବଂ ଏହା ପଛର ସମସ୍ତ ସତ୍ୟତା ଖୋଜି ବାହାର କରିବାକୁ କମିଶନ ଉଦ୍ୟମ କରିବ। ସରକାର କିମ୍ବା କୌଣସି ବ୍ୟକ୍ତିବିଶେଷଙ୍କ ପକ୍ଷରୁ କର୍ତ୍ତବ୍ୟରେ ତ୍ରୁଟି ଥିଲା କି ନାହିଁ, ହିଂସା ରୋକିବାକୁ ପ୍ରଶାସନ ପକ୍ଷରୁ ପର୍ଯ୍ୟାପ୍ତ ପଦକ୍ଷେପ ନିଆଯାଇଥିଲା କି ନାହିଁ, ତାହା ତଦନ୍ତ ପରିସରଭୁକ୍ତ ହେବ ବୋଲି ଜଣାପଡ଼ିଛି।