ଇମ୍ଫାଲ,୫।୧୦: ମଣିପୁରରେ ପୁଣି ହିଂସା ଆରମ୍ଭ ହୋଇଛି। ରାଜ୍ୟର ଇମ୍ଫାଲ ପଶ୍ଚିମ ଜିଲାରେ ଦୁଇଟି ଘରେ ନିଆଁ ଲଗାଇ ଦିଆଯାଇଥିବା ଗୁରୁବାର ପୋଲିସ କହିଛି। ଏହା ବ୍ୟତୀତ ଏହି ସମୟରେ ଅନେକ ରାଉଣ୍ଡ ଗୁଳି ଚାଳନା ମଧ୍ୟ କରାଯାଇଛି। ପୋଲିସ କହିଛି, ଏହି ଘଟଣା ବୁଧବାର ରାତି ପ୍ରାୟ ୧୦ଟା ସମୟରେ ପଟସାଇ ପୋଲିସ ଷ୍ଟେଶନ ଅଞ୍ଚଳର ନ୍ୟୁ କିଥେଲମନବିରେ ଘଟିଛି। ଆକ୍ରମଣ ପରେ ଅଭିଯୁକ୍ତ ତୁରନ୍ତ ଘଟଣାସ୍ଥଳରୁ ଫେରାର ହୋଇଯାଇଥିଲେ। ପୋଲିସ ଆହୁରି ମଧ୍ୟ କହିଛି ଯେ, ଆମେ ଅଗ୍ନିଶମ ସେବା ସହିତ ମିଶି ସଙ୍ଗେ ସଙ୍ଗେ ନିଆଁକୁ ନିୟନ୍ତ୍ରଣକୁ ଆଣିଛୁ। ପୂରା ଘଟଣା ପରେ ଏହି ଅଞ୍ଚଳରେ ଉତ୍ତେଜନା ପରିସ୍ଥିତି ଦେଖାଦେଇଥିଲା, କିନ୍ତୁ ବର୍ତ୍ତମାନ ଏହା ନିୟନ୍ତ୍ରଣରେ ରହିଛି। ଏହା ବ୍ୟତୀତ ଉକ୍ତ ଅଞ୍ଚଳର ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ଅତିରିକ୍ତ ସୁରକ୍ଷା ବାହିନୀ ନିୟୋଜିତ କରାଯାଇଛି।