‘ଇଣ୍ଡିଆ’ ଆଶା କରୁଛି ଯେ ଆପଣ ସଂସଦରେ ମଣିପୁର ଉପରେ ଜବାବ ଦେବେ, ପ୍ରଧାନମନ୍ତ୍ରୀଙ୍କୁ ଏଭଳି କହିଲେ ଖାର୍ଗେ

ନୂଆଦିଲ୍ଲୀ,୨୧।୭: ମଣିପୁରରେ ୨ ଜଣ ମହିଳାଙ୍କୁ ଉଲଗ୍ନ କରି ରାସ୍ତାରେ ବୁଲାଇବା ଘଟଣାର ଏକ ପୁରୁଣା ଭିଡିଓ ସାମ୍ନାକୁ ଆସିବା ପରେ ସାରା ଦେଶରେ ଉତ୍ତେଜନା ଦେଖାଦେଇଛି। ଏହି ପ୍ରସଙ୍ଗରେ ବିରୋଧୀ ମଧ୍ୟ ଭାଜପା ସରକାରକୁ ଘେରିରହିଛନ୍ତି। ସଂସଦର ମୌସୁମୀ ଅଧିବେଶନର ପ୍ରଥମ ଦିନରେ ମଣିପୁର ହିଂସାକୁ ନେଇ ଅନେକ ଆଲୋଡ଼ନ ଦେଖାଦେଇଥିଲା, ଯେଉଁଥିପାଇଁ ଉଭୟ ଗୃହକୁ ସ୍ଥଗିତ ରଖିବାକୁ ପଡିଥିଲା। ବର୍ତ୍ତମାନ ସଂସଦ ଅଧିବେଶନର ଦ୍ୱିତୀୟ ଦିନରେ ମଣିପୁରରେ ଘଟିଥିବା ଘଟଣାକୁ ନେଇ ବିରୋଧୀ ସରକାରଙ୍କୁ ଘେରିବା ନେଇ ସମ୍ଭାବନା ରହିଛି। ସେପଟେ କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ ଟୁଇଟ୍‌ କରି ପ୍ରଧାନମନ୍ତ୍ରୀ ମୋଦିଙ୍କୁ ଟାର୍ଗେଟ କରିଛନ୍ତି।

ମଣିପୁର ଘଟଣା ସମ୍ପର୍କରେ ରାଜ୍ୟ ସଭାରେ ବିରୋଧୀ ଦଳର ନେତା ତଥା କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ ଟୁଇଟ୍‌ରରେ ଲେଖିଛନ୍ତି, ନରେନ୍ଦ୍ର ମୋଦି ଜୀ, ଆପଣ ଗତକାଲି ସଂସଦ ଭିତରେ କୌଣସି ବିବୃତ୍ତି ଦେଇନାହଁ। ଯଦି ଆପଣ ପ୍ରକୃତରେ ରାଗିଥିଲ, କଂଗ୍ରେସ ଶାସିତ ରାଜ୍ୟମାନଙ୍କ ସହିତ ମିଥ୍ୟା ସମାନତା ସୃଷ୍ଟି କରିବା ପରିବର୍ତ୍ତେ, ଆପଣ ପ୍ରଥମେ ମଣିପୁର ମୁଖ୍ୟମନ୍ତ୍ରୀଙ୍କୁ ବରଖାସ୍ତ କରିଥାନ୍ତେ। ଭାରତ ଆପଣଙ୍କଟାରୁ ଆଶା କରୁଛି ଯେ, ଆଜି ସଂସଦରେ ଆପଣ ମଣିପୁର ସମ୍ପର୍କରେ ଜବାବ ଦେବେ। କେବଳ ଏହି ଗୋଟିଏ ଘଟଣା ଉପରେ ନୁହେଁ, ୮୦ ଦିନର ହିଂସା ଉପରେ ଜବାବ ଦେବାକୁ ପଡ଼ିବ।