ଇମ୍ଫାଲ,୪।୫: ମଣିପୁରରେ ଲାଗି ରହିଥିବା ହିଂସା ଘଟଣା ମଧ୍ୟରେ କଠୋର ହୋଇଛନ୍ତି ସରକାର। ଦଙ୍ଗା କରୁଥିବା ଲୋକଙ୍କୁ ଦେଖିଲେ ଗୁଳି କରିବାକୁ ସରକାର ନିର୍ଦ୍ଦେଶ ଦେଇଛନ୍ତି। ସରକାରଙ୍କ ପକ୍ଷରୁ ଜାରି କରାଯାଇଥିବା ନିର୍ଦ୍ଦେଶରେ ସ୍ପଷ୍ଟ ଭାବେ ଉଲ୍ଲେଖ କରାଯାଇଛି କି ସରକାର ବିଷମ ପରିସ୍ଥିତିରେ ଏଭଳି ପଦକ୍ଷେପ ନେଇଛନ୍ତି।
ମଣିପୁରରେ ଆଦିବାସୀ ଓ ସଂଖ୍ୟା ଗରିଷ୍ଠତା ଥିବା ମେଇତି ସମ୍ପ୍ରଦାୟ ମଧ୍ୟରେ କିଛି ଦିନ ହେବ ଉତ୍ତେଜନା ଲାଗି ରହିଛି। ବୁଧବାର ଏହି ପରିସ୍ଥିତି ହିଂସାର ରୂପ ନେଇଛି। ଏହାପରେ ସ୍ଥିତିକୁ ନିୟନ୍ତ୍ରଣକୁ ଆଣିବାକୁ ରାତାରାତି ସେନା ଓ ଆସାମ ରାଇଫଲ୍ସର କିଛି ଦଳଙ୍କୁ ନିୟୋଜିତ କରାଗଲା। ହିଂସା କାରଣରୁ ୯ହଜାରରୁ ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ନିଆଯାଇଛି।
ଜଣେ ଅଧିକାରୀ କହିଛନ୍ତି, ସ୍ଥିତିକୁ ଦେଖି ଅଣ-ଆଦିବାସୀ ବହୁଳ ଇମ୍ଫାଲ ପଶ୍ଚିମ, କାକଚିଂଗ, ଥୌବଲ, ଜିରିବାମ ଓ ବିଷ୍ଣୁପୁର ଜିଲା ତଥା ଆଦିବାସୀ ବହୁଳ ଚୁରାଚାନ୍ଦପୁର,କାଂଗପୋକପି ଓ ତେଂଗନୋପାଲ ଜିଲାରେ କର୍ଫ୍ୟୁ ଲଗାଯାଇଛି। ସେ କହିଛନ୍ତି କି ସମ୍ପୂର୍ଣ୍ଣ ରାଜ୍ୟରେ ମୋବାଇଲ ଇଣ୍ଟରନେଟ ସେବା ବନ୍ଦ କରି ଦିଆଯାଇଛି।
