ଇମ୍ଫାଲ/ନୂଆଦିଲ୍ଲୀ,୨୯।୯:ଜୁନ୍ ୩ରୁ ଜାତିଆଣ ହିଂସାରେ ଜଳୁଥିବା ମଣିପୁରରେ ମେଇତି ସମ୍ପ୍ରଦାୟର ନିଖୋଜ ଛାତ୍ରୀ ଲୁଓ୍ବାଙ୍ଗ୍ବି ହିଜାମ୍ ଏବଂ ଛାତ୍ର ଫିଜାମ୍ ହେମନ୍ଜିତଙ୍କୁ ଅପହରଣ ଓ ହତ୍ୟା ଘଟଣା ଉତ୍ତେଜନା ବୃଦ୍ଧିର କାରଣ ହୋଇଛି। ମଣିପୁରର ୨୦ରୁ ଊର୍ଦ୍ଧ୍ୱ ବିଧାୟକ ଗୁରୁବାର ନୂଆଦିଲ୍ଲୀରେ ଡେରା ପକାଇଛନ୍ତି। ସେମାନେ ଏହି ଛାତ୍ରୀ ଓ ଛାତ୍ରଙ୍କ ହତ୍ୟାକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ପାଇଁ ସେମାନେ କେନ୍ଦ୍ର ସରକାରଙ୍କ ନିକଟରେ ଦାବି ଜଣାଇଛନ୍ତି। ଏଥିସହ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)ର ତଦନ୍ତ ତ୍ୱରାନ୍ବିତ କରିବା ପାଇଁ ମଧ୍ୟ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କୁ ଅନୁରୋଧ କରିଛନ୍ତି।
ମଣିପୁରର ଭାଜପା ବିଧାୟକ ରାଜକୁମାର ଇମୋ ସିଂ ଏକ୍ସ’ରେ ଲେଖିଛନ୍ତି, ଆଗାମୀ କିଛିଦିନ ଭିତରେ ଅପରାଧୀଙ୍କୁ ଗିରଫ କରି ମୃତ ଛାତ୍ରୀ ଓ ଛାତ୍ରଙ୍କ ପରିବାରକୁ ତୁରନ୍ତ ନ୍ୟାୟ ପ୍ରଦାନ କରାଯାଉ। ସେହିପରି ସଶସ୍ତ୍ର ବଳକୁ ମଧ୍ୟ ମାନବୀୟ ଢଙ୍ଗରେ ସ୍ଥିତିର ଉଚିତ ପରିଚାଳନା ପାଇଁ ନିର୍ଦ୍ଦେଶ ଦିଆଯାଉ ବୋଲି ସେ ଦାବି କରିଛନ୍ତି। ଇତିମଧ୍ୟରେ କେନ୍ଦ୍ର ସରକାର ଶ୍ରୀନଗର ଏସ୍ଏସ୍ପି ରାକେଶ ବିଲାଓ୍ବଲଙ୍କୁ ମଣିପୁରକୁ ବଦଳି କରିଛନ୍ତି। ୨୦୧୨ ବ୍ୟାଚ୍ର ମଣିପୁର କ୍ୟାଡର ଆଇପିଏସ୍ ଅଧିକାରୀ ବିଲାଓ୍ବଲ ଅନେକ ଆତଙ୍କବାଦ ନିରୋଧୀ ଅପରେଶନ୍ର ନେତୃତ୍ୱ ନେଇଛନ୍ତି। ତେଣୁ ଏହି ଉତ୍ତର-ପୂର୍ବାଞ୍ଚଳ ରାଜ୍ୟରେ ହିଂସା ନିୟନ୍ତ୍ରଣରେ ତାଙ୍କ ଅଭିଜ୍ଞତା ସହାୟକ ହେବ ବୋଲି ଆଶା କରାଯାଉଛି।
ଅନ୍ୟପକ୍ଷେ ହତ୍ୟାର ଶିକାର ହୋଇଥିବା ଲୁଓ୍ବାଙ୍ଗ୍ବି ଏବଂ ଫିଜାମ୍ଙ୍କ ପରିବାର ଲୋକେ ନିଜ ନିଜ ପିଲାଙ୍କ ମୃତଦେହ ଠାବ ସହ ହସ୍ତାନ୍ତର କରିବା ପାଇଁ ଅନୁରୋଧ କରିଛନ୍ତି। ସିବିଆଇ ତଦନ୍ତ ଦ୍ୱାରା ପ୍ରକୃତ ସତ ପଦାକୁ ଆସିବ ବୋଲି ୧୮ ବର୍ଷୀୟା ଝିଅ ଲୁଓ୍ବାଙ୍ଗ୍ବିଙ୍କ ବାପା ହିଜାମ୍ କୁଲାଜିତ୍ ଆଶାବ୍ୟକ୍ତ କରିଛନ୍ତି।