ଚେନ୍ନାଇ,୧୦।୨: ଇଂଲଣ୍ଡ ବିପକ୍ଷ ଚାରି ଟେଷ୍ଟ ମ୍ୟାଚ୍ ସିରିଜ୍ର ପ୍ରଥମ ଟେଷ୍ଟରେ ଲଜ୍ଜାଜନକ ଭାବେ ୨୨୭ ରନ୍ରେ ଭାରତ ପରାସ୍ତ ହୋଇଛି। ଏହି ବିଜୟ ସହ ଇଂଲଣ୍ଡ ୪ ମ୍ୟାଚ୍ ବିଶିଷ୍ଟ ଏହି ସିରିଜରେ ୧-୦ ଅଗ୍ରଣୀ ହାସଲ କରିଛି। ଅଷ୍ଟ୍ରେଲିଆ ବିପକ୍ଷ ସିରିଜରେ ବିଜୟକୁ ନେଇ ଉଲ୍ଲସିତ ଥିଲା ଭାରତୀୟ ଟିମ୍। ଏବେ ଏହି ହାର୍ ଖୁସିକୁ ଫିକା କରିଛି। ଏପରିକି ଉଭୟ ପାଳିରେ ଇଂଲଣ୍ଡ ବୋଲରଙ୍କ ସମ୍ମୁଖରେ ଭାରତୀୟ ବ୍ୟାଟ୍ସମ୍ୟାନ୍ଙ୍କ ଖରାପ ପ୍ରଦର୍ଶନକୁ ନେଇ ସମାଲୋଚନା କରାଯାଉଛି। ଏହି କ୍ରମରେ ଭାରତୀୟ ଟିମ୍ର ପୂର୍ବ ବ୍ୟାଟ୍ସମ୍ୟାନ୍ ସଞ୍ଜୟ ମାଞ୍ଜରେକର ଉପଅଧିନାୟକ ଅଜିଙ୍କ୍ୟ ରାହାନେଙ୍କୁ କଟାକ୍ଷ କରିଛନ୍ତି।
ସେ ଟୁଇଟ୍ କରି କହିଛନ୍ତି, ବ୍ୟାଟ୍ସମ୍ୟାନ୍ ଭାବେ ରାହାନେଙ୍କ ପ୍ରଦର୍ଶନ ଭଲ ନ ଥିଲା। ମେଲବର୍ନରେ ଶତକ ପରେ ସେ ଅପରାଜିତ ୨୭, ୨୨, ୪, ୩୭,୨୪, ୧ ଏବଂ ୦ ରନ୍ କରିଛନ୍ତି। ଶତକ ପରେ ଜଣେ ଲୟରେ ଥିବା ଖେଳାଳିଙ୍କଠାରୁ ଭଲ ଖେଳ ଆଶା କରାଯାଇଥାଏ। ଏହାଦ୍ୱାରା ସେମାନେ ଖରାପ ଫର୍ମରେ ଚାଲୁଥିବା ଖେଳାଳିଙ୍କ ଉପରେ ଚାପ କମ୍ କରିଥାନ୍ତି। ହେଲେ ରାହାନେ ଏପରି କରିବାରେ ବିଫଳ ହୋଇଛନ୍ତି ବୋଲି ସେ କହିଛନ୍ତି।
ଗତ ୭ ପାଳିରେ ରାହାନେ ହାରାହାରି ୧୯ ଅନୁପାତରେ ୧୧୫ରନ୍ କରିଛନ୍ତି। ବ୍ୟାଟ୍ସମ୍ୟାନ୍ ଭାବେ ଏହାକୁ କୌଣସି ସ୍ଥିତିରେ ଭଲ କୁହାଯାଇପାରିବ ନାହିଁ। ହେଲେ ଅଧିନାୟକ ବିରାଟ କୋହଲି ରାହାନେଙ୍କ ସପକ୍ଷରେ ବାହାରିଛନ୍ତି। ଅଜିଙ୍କ୍ୟ ଏବଂ ପୂଜାରା ଦଳର ମହତ୍ୱପୂର୍ଣ୍ଣ ଟେଷ୍ଟ ବ୍ୟାଟ୍ସମ୍ୟାନ୍। ତାଙ୍କ ଖେଳ ଉପରେ ଦଳକୁ ବିଶ୍ୱାସ ରହିଛି ବୋଲି କୋହଲି କହିଛନ୍ତି।