ଭୁବନେଶ୍ୱର,୧୪।୩: ବିଜୁ ଜନତା ଦଳ (ବିଜେଡି) ଏବଂ ଭାରତୀୟ ଜନତା ପାର୍ଟି (ଭାଜପା) ମଧ୍ୟରେ ମେଣ୍ଟ ଖବର ଆହୁରି ଘନୀଭୂତ ହୋଇଛି। ଗୁରୁବାର ନବୀନ ନିବାସରେ ବିଜେଡି ନେତାଙ୍କ ବୈଠକ ପରେ ଦଳର ନେତା ମେଣ୍ଟ ଖବରକୁ ନେଇ ଚୁପ୍ ରହିଛନ୍ତି।
ଏହା ପୂର୍ବରୁ ଗୁରୁବାର ସକାଳୁ ଦିଲ୍ଲୀରୁ ଫେରି ଭାଜପା ରାଜ୍ୟ ସଭାପତି ମନମୋହନ ଗଣମାଧ୍ୟମ ଆଗରେ ପ୍ରତିକ୍ରିୟା ରଖିବା ସହ ଏକ୍ସରେ ପୋଷ୍ଟ କରି ରାଜ୍ୟରେ ଭାଜପା ଏକାକୀ ଲଢ଼ିବ ବୋଲି ସେ କହିଥିଲେ ଏବଂ ସରକାର ଗଠନ କରିବାକୁ ଦାବି କରିଥିଲେ। ତେବେ ପରେ ସେ ଏହି ପୋଷ୍ଟଟି ଏକ୍ସରୁ ଡିଲିଟ କରିଦେଇଥିଲେ। ଏଥିସହିତ ତାଙ୍କୁ ଦଳର କେନ୍ଦ୍ରୀୟ ନେତୃତ୍ୱ ନୂଆଦିଲ୍ଲୀରେ ଆଲୋଚନା ପାଇଁ ଡକାଇଥିବା ଜଣାପଡିଛି।
ଅନ୍ୟପକ୍ଷରେ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁବାର ସନ୍ଧ୍ୟାରେ ତାଙ୍କ ବାସଭବନରେ ଏକ ଗୁରୁତ୍ୱପୂର୍ଣ୍ଣ ବୈଠକ ଡାକିଥିଲେ। ଏଥିରେ ଦଳର ବହୁ ବରିଷ୍ଠ ନେତା ଯୋଗ ଦେଇଥିଲେ।
ଆଶା କରାଯାଉଥିଲା ଯେ ବିଜେଡି ଭାଜପା ସହ ମେଣ୍ଟ ସମ୍ପର୍କରେ ଚୂଡ଼ାନ୍ତ ଘୋଷଣା କରିବ। ତେବେ ଏହି ବୈଠକରେ ଯୋଗ ଦେଇଥିବା ବିଜେଡି ଉପାଧ୍ୟକ୍ଷ ଦେବୀ ମିଶ୍ର ସୂଚନା ଦେଇଛନ୍ତି ଯେ ଦଳର ସୁପ୍ରିମୋ ଏହି ବୈଠକରେ ନିର୍ବାଚନ ରଣନୀତି ଏବଂ ତୃଣମୂଳ ସ୍ତରରେ ଲୋକଙ୍କ ନିକଟରେ କିପରି ପହଞ୍ଚିବେ ସେ ବିଷୟରେ ଆଲୋଚନା କରିଥିଲେ।
