ଧୂଷୁରୀ,୧୪।୧୦: ଭଦ୍ରକ ଜିଲା ଧାମନଗର ଉପନିର୍ବାଚନ ପାଇଁ ଭାଜପା ପକ୍ଷରୁ ପ୍ରଚାର ଜୋରସୋରରେ ଚାଲିଛି। ଭାଜପା ପ୍ରାର୍ଥୀ ସୂର୍ଯ୍ୟବଂଶୀ ସୂରଜଙ୍କ ଲାଗି ପ୍ରଚାର ମଇଦାନକୁ ଓହ୍ଲାଇଛନ୍ତି ଦଳର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ମନମୋହନ ସାମଲ। ପ୍ରାର୍ଥୀ ଚୟନ ଓ ପ୍ରଚାରରେ କଂଗ୍ରେସ ଏବଂ ବିଜେଡିଠାରୁ ଆଗରେ ଭାଜପା ରହିଥିବା ବେଳେ ଗୁରୁବାର ମନମୋହନ ଧାମନଗର ବ୍ଲକର ରଇପୁର ଓ ପାଳସାହି ପଞ୍ଚାୟତରେ ଘର ଘର ବୁଲି ସୂରଜଙ୍କ ପାଇଁ ଭୋଟ ଭିକ୍ଷା କରିଛନ୍ତି। ପୂର୍ବରୁ ବିଜେଡି, ଭାଜପା ମେଣ୍ଟ ସରକାରରେ ମନମୋହନ ଧାମନଗର ବିଧାନସଭା ଆସନରୁ ବିଜୟୀ ହୋଇ ରାଜସ୍ବ ମନ୍ତ୍ରୀ ହୋଇଥିଲେ। ମେଣ୍ଟ ଭାଙ୍ଗିବା ପରେ ଧାମନଗର ଆସନ ଅନୁସୂଚିତ ଜାତି ପାଇଁ ସଂରକ୍ଷିତ ରହିଥିବାରୁ ତାଙ୍କୁ ଆସନ ଛାଡ଼ିବାକୁ ପଡ଼ିଥିଲା। କିନ୍ତୁ ତାଙ୍କ ପତିଆରା ଏବେବି ଧାମନଗରରେ ଅକ୍ଷୁଣ୍ଣ ରହିଛି। ବିଶେଷକରି ମହିଳା ଭୋଟ୍ ଦଳ ସପକ୍ଷକୁ ନେବା ପାଇଁ ସେ ବୁଥ୍ ସ୍ତରୀୟ କର୍ମକର୍ତ୍ତାମାନଙ୍କ ସହ ଆଲୋଚନା କରିଛନ୍ତି। ତାଙ୍କ ସହ ଭାଜପା ରାଜ୍ୟ ସମ୍ପାଦକ ଅଭିମନ୍ୟୁ ସେଠୀ, ବିଭିନ୍ନ ପଞ୍ଚାୟତର ସରପଞ୍ଚ ଓ ବରିଷ୍ଠ କର୍ମକର୍ତ୍ତାମାନେ ମଧ୍ୟ ପ୍ରଚାରରେ ସାମିଲ ହୋଇଛନ୍ତି। ଘରକୁ ଘର ଯାଇ କେନ୍ଦ୍ର ସରକାରଙ୍କ ଜନକଲ୍ୟାଣକାରୀ ଯୋଜନା ସମ୍ପର୍କରେ ଲୋକଙ୍କୁ ବୁଝାଇବା ସହ ଦିବଂଗତ ବିଧାୟକ ବିଷ୍ଣୁ ସେଠୀଙ୍କ ପ୍ରତି ଥିବା ଶ୍ରଦ୍ଧା ତାଙ୍କ ପୁଅ ସୂରଜଙ୍କ ପାଇଁ ଭୋଟ୍ରେ ପ୍ରତିଫଳିତ କରିବାକୁ ଭୋଟରମାନଙ୍କୁ ନିବେଦନ କରିଛନ୍ତି।
