‘ମନ କି ବାତ’ର ୧୦୦ ତମ ଏପିସୋଡ ପ୍ରସାରଣ ପୂର୍ବରୁ ମୋଦି କହିଲେ, ସତରେ ବହୁତ ନିଆରା ଥିଲା ଯାତ୍ରା

ନୂଆଦିଲ୍ଲୀ,୩୦।୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ରେଡିଓ କାର୍ଯ୍ୟକ୍ରମ ‘ମନ କି ବାତ’ର ୧୦୦ତମ ଏପିସୋଡ ରବିବାର ଅର୍ଥାତ୍‌ ୩୦ ଏପ୍ରିଲରେ ପ୍ରସାରଣ କରାଯିବ। ଏହି ଦିନକୁ ଐତିହାସିକ କରିବାକୁ ଭାରତୀୟ ଜନତା ପାର୍ଟି(ଭାଜପା) ଜୋରଦାର ପ୍ରସ୍ତୁତ କରିଛି। ପ୍ରଧାନମନ୍ତ୍ରୀ ମୋଦି ୧୦୦ ଏପିସୋଡ ପର୍ଯ୍ୟନ୍ତ ପହଞ୍ଚିବା ଯାତ୍ରାକୁ ଖୁବ୍‌ ନିଆରା ଯାତ୍ରା ବୋଲି କହିଛନ୍ତି।

ମୋଦି ଟୁଇଟ କରି ଲୋକଙ୍କୁ ଦିନ ୧୧ଟାରେ ଏହି କାର୍ଯ୍ୟକ୍ରମକୁ ଶୁଣିବାକୁ ଅପିଲ କରିଛନ୍ତି। ଭାଜପାର ଅନ୍ୟ ନେତାମାନେ ବି କାର୍ଯ୍ୟକ୍ରମକୁ ନେଇ ଉତ୍ସାହିତ ଥିବା ଦେଖାଯାଇଛି। ପ୍ରଧାନମନ୍ତ୍ରୀଙ୍କ ଏହି ରେଡିଓ କାର୍ଯ୍ୟକ୍ରମ ପ୍ରତିମାସର ଶେଷ ରବିବାର ପ୍ରଚାରିତ ହୋଇଥାଏ।
ମୋଦି ଟୁଇଟ କରି ଲେଖିଛନ୍ତି, ମନ କି ବାତର ୧୦୦ ତମ ଏପିସୋଡ ପାଇଁ ସକାଳ ୧୧ଟାରେ ଟ୍ୟୁନ ଇନ କରନ୍ତୁ, ଏହା ବାସ୍ତବରେ ଏକ ବିଶେଷ ଯାତ୍ରା। ଯେଉଁଥିରେ ଆମେ ଭାରତର ଲୋକଙ୍କ ସାମୁହିକ ଭାବନାର ପର୍ବ ପାଳନ କରିଛୁ ଓ ପ୍ରେରକ ଜୀବନଯାତ୍ରା ଉପରେ ଆଲୋକ ଦେଖାଇଛୁ।
ଏହି କାର୍ଯ୍ୟକ୍ରମକୁ ନେଇ ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ଲେଖିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ‘ମନ କି ବାତ’ କାର୍ଯ୍ୟକ୍ରମର ୧୦୦ ତମ ଏପିସୋଡ, ରବିବାର ସକାଳ ୧୧ଟାରେ ପ୍ରଚାରିତ କରାଯିବ। ଜନସମ୍ବାଦ ଦୁନିଆରେ ଏହି କାର୍ଯ୍ୟକ୍ରମ ‘ଏକ ମାଇଲ ଷ୍ଟୋନ’ ହୋଇଯାଇଛି। ଏହି କାର୍ଯ୍ୟକ୍ରମ ମାଧ୍ୟମରେ ମୋଦି ଦେଶବାସୀଙ୍କ ସହ ସିଧା ସମ୍ପର୍କ ସ୍ଥାପନ କରି, ସେ ଅନେକ ବିଷୟକୁ ନେଇ କେବଳ ସଚେତନା ସୃଷ୍ଟି କରିଛନ୍ତି ତା’ନୁହେଁ, ବରଂ ସେମାନଙ୍କୁ ପ୍ରେରଣା ବି ଦେଇଛନ୍ତି। ସେ ସ୍ବଚ୍ଛତା କଥା ହେଉ ଅବା କୋଭିଡ ଯୋଦ୍ଧାଙ୍କୁ ପ୍ରୋତ୍ସାହିତ କରିବା ହେଉ, ବେଟି ବଚାଓ ବେଟି ପଢାଓର ପ୍ରେରଣା ଦେବା ହେଉ, ମେକ ଇନ ଇଣ୍ଡିଆ କଥା ହେଉ, ଅବା ଜଳ ସଂରକ୍ଷଣର ବିଷୟ, ମୋଦି ରାଜନୈତିକ ବିଷୟକୁ ବାଦ ଦେଇ ସାର୍ବଜନିକ ଜୀବନ ସହ ଜଡିତ ପ୍ରାୟ ସମସ୍ତ ବିଷୟ ଉପରେ ତାଙ୍କ କଥାକୁ ବଡ ପ୍ରଭାବି ଢଙ୍ଗରେ ଉପସ୍ଥାପନ କରିଛନ୍ତି।