ନୂଆଦିଲ୍ଲୀ, ୨୦।୯ : ମଦ୍ୟପାନ ଅଭିଯୋଗରେ ପଞ୍ଜାବର ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ୍ ଜର୍ମାନରେ ଲୁଫଥାନ୍ସା ଏୟାର ଲାଇନ୍ସ ବିମାନ ଅବତରଣ କରିବା ଘଟଣାର ଯାଞ୍ଚ କରାଯିବ। କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ମଙ୍ଗଳବାର କହିଛନ୍ତି ଯେ ଏହି ଘଟଣା ଆମ ମାଟିରେ ନୁହେଁ ବରଂ ବିଦେଶରେ ଘଟିଛି, ତେଣୁ ଆମକୁ ଘଟଣାର ଅନୁସନ୍ଧାନ କରିବାକୁ ପଡିବ।
ସୋମବାର ଖବର ଆସିଥିଲା ଯେ ମାନ୍ଙ୍କର ମଦ୍ୟପାନ ଯୋଗୁ ଫ୍ରାଙ୍କଫର୍ଟରୁ ଦିଲ୍ଲୀକୁ ଆସୁଥିବା ଏକ ଲୁଫଥାନ୍ସ ା ବିମାନ ଉଡ଼ାଣରେ ବିଳମ୍ବ ହୋଇଥିଲା। ଏହି ବିଷୟରେ ପଚରାଯିବାରୁ କେନ୍ଦ୍ର ବିମାନ ଚଳାଚଳ ମନ୍ତ୍ରୀ ସିନ୍ଧିଆ କହିଛନ୍ତି ଯେ ଏହି ଘଟଣା ସମ୍ପର୍କରେ ଲୁଫଥାନ୍ସାଠାରୁ ସୂଚନା ଲୋଡ଼ା ଯାଇଛି। ଏହାକୁ ଉପଲବ୍ଧ କରାଇବା କମ୍ପାନୀ ନିର୍ଭର କରେ। ମୋତେ ପଠାଯାଇଥିବା ଅନୁରୋଧକୁ ଆଧାର କରି ଏହି ଘଟଣାର ଅନୁସନ୍ଧାନ କରାଯିବ।
ତେବେ ଏହି ଘଟଣା ନେଇ ଆଲୋଚନା ହେବା ପରେ ଲୁଫଥାନା୍ସ ଏୟାରଲାଇନ୍ସ ପକ୍ଷରୁ ସ୍ପଷ୍ଟୀକରଣ ଜାରି ହୋଇଛି। ଆଗାମୀ ବିମାନ ଏବଂ ବିମାନ ପରିବର୍ତ୍ତନରେ ବିଳମ୍ବ ଯୋଗୁ ଫ୍ରାଙ୍କଫର୍ଟରୁ ଦିଲ୍ଲୀ ଅଭିମୁଖେ ଆସୁଥିବା ବିମାନ ଯାତ୍ରାରେ ବିଳମ୍ବ ହୋଇଛି ବୋଲି କମ୍ପାନୀ କହିଛି।
ଅପରପକ୍ଷରେ କଂଗ୍ରେସ ନେତା ପ୍ରତାପ ସିଂ ବାଜୱା କେନ୍ଦ୍ର ମନ୍ତ୍ରୀ ସିନ୍ଧିଆଙ୍କୁ ଲୁଫଥାନ୍ସାରୁ ତଥ୍ୟ ସଂଗ୍ରହ କରି ଏହାକୁ ସାର୍ବଜନୀନ କରିବାକୁ ଦାବି କରିଛନ୍ତି। ପଞ୍ଜାବର ବିରୋଧୀ ଦଳ ଶିରୋମଣି ଅକାଳୀ ଦଳ ମଧ୍ୟ ମୁଖ୍ୟମନ୍ତ୍ରୀ ମାନ୍ଙ୍କ ବିରୋଧରେ ଅଭିଯୋଗ ଆଣିଛନ୍ତି।
ଗଣମାଧ୍ୟମ ରିପୋର୍ଟରେ କୁହାଯାଇଥିଲା ଯେ ଜର୍ମାନ ଏୟାରଲାଇନ୍ସର ବିମାନ ଉଡାଡ଼ରେ ବିଳମ୍ବ ହୋଇଥିଲା କାରଣ ଜଣେ ଯାତ୍ରୀ ମଦ୍ୟପାନ କରି ପ୍ରବେଶ କରିଥିଲେ। ଏ ସମ୍ପର୍କରେ ଅକାଳୀ ନେତା ସୁଖବୀର ସିଂ ବାଦଲ, ତାଙ୍କ ସ୍ତ୍ରୀ ହରିସିମରନ କୌର ବାଦଲ ଏବଂ କଂଗ୍ରେସ ନେତା ବାଜୱା ଅଭିଯୋଗ କରିଛନ୍ତି ଯେ ବିମାନରୁ ଓହ୍ଲାଇଥିବା ଯାତ୍ରୀ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ୍ଙ୍କ ବ୍ୟତୀତ ଅନ୍ୟ କେହି ନୁହଁନ୍ତି। ଏହି ନେତାମାନେ ତାଙ୍କ ଇସ୍ତଫା ଦାବି କରିଥିଲେ।