ପାଟନା,୪ ।୧୦: ବିହାର ରାଜନୀତିରେ ଆଜିକାଲି କଥା କଟାକଟି ଯୋରସୋରରେ ଚାଲିଛି । ଶବ୍ଦର ଏହି ଯୁଦ୍ଧ ମଧ୍ୟରେ ରାଷ୍ଟ୍ରୀୟ ଜନତା ଦଳ ନେତା ମନୋଜ ଝା ବି ଏଣ୍ଟ୍ରି ମାରିଛନ୍ତି । ମନୋଜ ଝା ସୋମବାର ରାନୀତିର ଚାଣକ୍ୟ କୁହାଯାଉଥିବା ପ୍ରଶାନ୍ତ କିଶୋରଙ୍କୁ ଟାର୍ଗେଟ କରିଛନ୍ତି । ପ୍ରଶାନ୍ତ କିଶୋର ଗୋଟିଏ ଦିନ ପୂର୍ବରୁ କହିଥିଲେ ୧୯୯୦ ପରେ ବିହାରରେ କିଛି ବଦଳି ନାହିଁ । ଏବେ ଏହାର ଜବାବ ଦେଇ ମନୋଜ ଝା କହିଛନ୍ତି, ରାଜନୀତିର ଚାଣକ୍ୟ ବିହାରକୁ ସ୍ପେଶାଲ ଷ୍ଟାଟସ ଦେବା କଥାକୁ ଦବାଇ ଦିଆଯିବାକୁ ନେଇ ଚୁପଥିବା ବେଳେ ମହତ୍ୱହିନ କଥା ଉଠାଉଛନ୍ତି ।
ଏମପି ମନୋଜ ଝା କହିଛନ୍ତି, ମୋତେ ଲାଗିଲା କେନ୍ଦ୍ର ସରକାର ବିହାରକୁ ସ୍ପେଶାଲ ଷ୍ଟାଟସ ଦେବାକୁ ବାରମ୍ବାର ମନା କରୁଥିବା ଘଟଣାକୁ ନେଇ ପ୍ରଶାନ୍ତ କିଶୋର କଥା ଉଠାଇବେ । ହେଲେ ସେ ଏବେ ଯେଉଁ କଥା ଉଠାଇଛନ୍ତି ତାହାର କୌଣସି ମହତ୍ୱ ନାହିଁ । ଯାହା କହିବା କଥା ତାକୁ ନେଇ ପ୍ରଶାନ୍ତ ଚୁପ ଥିବା ବେଳେ ଯାହାର କୌଣସି ମହତ୍ୱ ନାହିଁ ସେହି କଥାକୁ ଉଠାଉଛନ୍ତି ରାଜନୀତିର ଏହି ଚାଣକ୍ୟ । ମନୋଜ କହିଛନ୍ତି ପ୍ରଶାନ୍ତ କିଶୋରଙ୍କ ପଟକଥାକୁ ବୁଝିବାକୁ କୌଣସି ରକେଟ ସାଇନ୍ସ ବୁଝିବା ଜରୁରୀ ନୁହେଁ ।
ମନୋଜ ଆହୁରି ମଧ୍ୟ କହିଛନ୍ତି, ବିହାରକୁ ବୁଝିବାକୁ ଆପଣଙ୍କୁ ପ୍ରଥମେ ଏହାର ବିଶ୍ଳେଷଣ କରିବା ଦରକାର । ଯେତେବେଳେ ଝାଡ଼ଖଣ୍ଡ ଅଲଗା ହେଲା ସେତେବେଳେ ବିହାରକୁ କ’ଣ ମିଳିଲା ବୋଲି ସେ ପ୍ରଶ୍ନ କରିଛନ୍ତି । ଝାଡ଼ଖଣ୍ଡ ଯୋଗୁ ଆମ ଉଦ୍ଦ୍ୟୋଗର ମୂଳଦୁଆ ମଜଭୁତ ଥିଲା । ଝାଡ଼ଖଣ୍ଡ ଅଲଗା ହେବା ପରେ ସରକାର ବିହାରକୁ କାହିଁକି ସ୍ପେଶାଲ ଷ୍ଟାଟସ ଦେଲେ ନାହିଁ ବୋଲି ସେ ପ୍ରଶ୍ନ କରିଛନ୍ତି । ଗୋଟିଏ ବିଶେଷ ପ୍ୟାକେଜ କାହିଁକି ଦିଆଗଲା ନାହିଁ ବୋଲି ସେ କହିଛନ୍ତି । ପ୍ରଧାନମନ୍ତ୍ରୀ କାହିଁକି ଚୁପ ବସିଛନ୍ତି । ଝା କହିଛନ୍ତି, ସେ ଚେତାବନୀ ଦେଉଛନ୍ତି ଯେ ବିହାର ଏକ ଜ୍ୱାଳାମୁଖୀ ଉପରେ ବସିଛି ।