ଭୁବନେଶ୍ବର, ୨ା୬(ବ୍ୟୁରୋ): ୨୦୨୪ ସାଧାରଣ ନିର୍ବାଚନକୁ ଆଉ କମ୍ ସମୟ ଥିବାବେଳେ ବିଜେଡିର ଏକାଧିକ ନେତା ଓ ବିଧାୟକ ସମ୍ପର୍କରେ ଥିବା ନେଇ ବହୁ ଭାଜପା ନେତା ବାରମ୍ବାର ଦାବି କରିବା ଆରମ୍ଭ କରିଦେଇଛନ୍ତି। ତେବେ ନିର୍ବାଚନ ଆସିଲେ ବହୁ ନେତା ଦଳ ଅଦଳବଦଳ କରିଥାଆନ୍ତି। ସେହି ଦୃଷ୍ଟିରୁ ଏବେ ନିର୍ବାଚନ ପାଖେଇ ଆସୁଥିବା ବେଳେ ଏଭଳି ଚର୍ଚ୍ଚା ପୁଣି ଚାଲିଲାଣି। ଭାଜପା ନେତାଙ୍କ ଏହି ଦାବି ପରେ ଏହାକୁ ନେଇ ରାଜନୈତିକ ମହଲରେ ଭିନ୍ନ ଚର୍ଚ୍ଚା ଜୋର୍ ଧରିଛି। କେଉଁ ନେତାମାନେ ଭାଜପା ସମ୍ପର୍କରେ ଅଛନ୍ତି ଏବଂ ସେମାନଙ୍କ ଏହି ଦାବିର କେତେ ସତ୍ୟତା ରହିଛି ତାହା ମଧ୍ୟ ଚର୍ଚ୍ଚାର ପ୍ରସଙ୍ଗ ପାଲଟିଛି। ହେଲେ ଭାଜପା ଏହାକୁ ସେତେଟା ଗୁରୁତ୍ୱ ଦେଇ ନାହିଁ। ପ୍ରଥମେ ଭାଜପା ରାଜ୍ୟ ସଭାପତି ମନମୋହନ ସାମଲ ବିଜେଡିର ୧୧୭ ବିଧାୟକ ତାଙ୍କ ଦଳ ସହିତ ସମ୍ପର୍କରେ ଥିବା କଥା କହିଥିଲେ। ଏହାପରେ ଏହି କଥାକୁ ଭାଜପା ଏମ୍ପି ଜୁଏଲ୍ ଓରାମ, କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ ଏବେ ଦଳର ବରିଷ୍ଠ ନେତା ପୃଥ୍ବୀରାଜ ହରିଚନ୍ଦନ କହିଛନ୍ତି।
ଜୁଏଲ୍ କହିଛନ୍ତି, ବିଜେଡିର ଏମ୍ପି ଏବଂ ବିଧାୟକମାନେ ସେମାନଙ୍କ ସରକାରର କାର୍ଯ୍ୟରେ ଅସନ୍ତୁଷ୍ଟ ଅଛନ୍ତି। ସରକାରୀ କାର୍ଯ୍ୟ ଉପରେ ସେମାନେ ବିଶେଷତଃ ଅସନ୍ତୁଷ୍ଟ। ସେହି ଅସନ୍ତୋଷ କେବେ ବିସ୍ଫୋରଣର ରୂପ ନେବ ତାହା କହିହେବ ନାହିଁ। ଯେଉଁମାନେ ବିଜେଡି ସରକାର ଉପରେ ଅସନ୍ତୁଷ୍ଟ ଅଛନ୍ତି ସେମାନଙ୍କ ସହ ସାଙ୍ଗଠନିକସ୍ତରରେ କଥାବାର୍ତ୍ତା ଚାଲିଛି ବୋଲି ସେ କହିଛନ୍ତି। ପୃଥ୍ବୀରାଜ କହିଛନ୍ତି, ବିଜେଡି ସରକାରରେ ଯେପରି ଭ୍ରଷ୍ଟାଚାର, ଅନାଚାର ଏବଂ ଏକଚ୍ଛତ୍ରବାଦ ଚାଲିଛି ତାକୁ ଶେଷ କରିବାକୁ ସେମାନଙ୍କ ଦଳରୁ ୧୦୦ରୁ ଅଧିକ ବିଭୀଷଣ ହୋଇ ବିଭିନ୍ନ ନେତୃତ୍ୱ ବାହାରିବେ ଏବଂ ଧର୍ମର ସାଥ୍ ଦେବେ। ସେକଥା ସିଧାସଳଖ ଭାବେ ସେହି ରାସ୍ତାରେ ହିଁ ଚାଲିଛି। ବିଜେଡିରେ ୮୦ ପ୍ରତିଶତ ନେତୃତ୍ୱ ଦଳ ଛାଡ଼ିବା ଲାଗି ମାନସିକସ୍ତରରେ ପ୍ର୍ସ୍ତୁତ ହୋଇ ରହିଛନ୍ତି ବୋଲି ସେ କହିଛନ୍ତି। ଅପରପକ୍ଷେ ବିଜେଡି ନେତା ତଥା ମନ୍ତ୍ରୀ ପ୍ରତାପ କେଶରୀ ଦେବ କହିଛନ୍ତି, ତାଙ୍କ ବିଧାୟକମାନେ ଆମ ଲିଙ୍କ୍ରେ ଏବଂ ଆମ ବିଧାୟକମାନେ ସେମାନଙ୍କ ସମ୍ପର୍କରେ ଅଛନ୍ତି। ନିର୍ବାଚନ ଯେତେବେଳେ ଆସିବ ବିଭିନ୍ନ ଚର୍ଚ୍ଚା ଓ ଆଲୋଚନା ସୃଷ୍ଟି ହେବ। ସେମାନେ ଆଗରୁ କହୁ ନ ଥିଲେ କି ୧୨୦ ଆସନ ନେବେ, ବଙ୍ଗୋପସାଗରରେ ପକେଇଦେବେ, ପୋଡ଼ା ଟ୍ରାନ୍ସଫର୍ମର ବି କହୁଥିଲେ। କ’ଣ ହେଲା, ପୋଡ଼ା ଟ୍ରାନ୍ସଫର୍ମର ବିଜୁଳି ଦେଲା। ୧୨୦ ସିଧା ୨୨ରେ ପରିଣତ ହେଲା। ଏବେ ସେମାନେ ସେହିଭଳି କଥା କହୁଛନ୍ତି ବୋଲି ପ୍ରତାପ କହିଛନ୍ତି।