ରାୟଗଡ଼ା,୧୭।୮(ଆଶିଷ ରଞ୍ଜନ ପଣ୍ଡା): ରାୟଗଡ଼ା ନିର୍ବାଚନମଣ୍ଡଳୀର ଶତାଧିକ ବିଜେଡି କର୍ମୀ ଶୁକ୍ରବାର ବିଧିବଦ୍ଧ ଭାବେ ଭାଜପାରେ ଯୋଗଦେଇଛନ୍ତି। ରାୟଗଡ଼ା ନିର୍ବାଚନମଣ୍ଡଳୀର ବିଜେଡି କର୍ମୀ ୟାଲା ଭେଙ୍କଟେଶ୍ୱର ରାଓ ଓରଫ୍ କୋଣ୍ଡାବାବୁଙ୍କ ନେତୃତ୍ୱରେ ରାୟଗଡ଼ା ଓ କାଶୀପୁର ବ୍ଲକ୍ର ବହୁ ଜଣ ଦଳ ଛାଡ଼ି ଭାଜପାରେ ମିଶିଛନ୍ତି। ଭୁବନେଶ୍ୱରସ୍ଥିତ ଭାଜପା ରାଜ୍ୟ କାର୍ଯ୍ୟାଳୟଠାରେ ଦଳର ରାଜ୍ୟ ସଭାପତି ମନମୋହଲ ସାମଲ ଉତ୍ତରୀୟ ଦେଇ ସମସ୍ତଙ୍କୁ ଦଳକୁ ସ୍ବାଗତ କରିଥିଲେ। ଏହି ମିଶ୍ରଣ ପର୍ବରେ ଲ୍ୟାମ୍ପସ ସଭାପତି ଚକ୍ରଧର ବିଡ଼ିକା, ପୂର୍ବତନ ଜିଲା ପରିଷଦ ସଭ୍ୟ କମଳଲୋଚନ ସାଉଁତା, ଆଇନଜୀବୀ ବିରଜା ପ୍ରସାଦ ପାତ୍ର, କେରେଡ଼ା ସରପଞ୍ଚ, ମୀନାରାଓ ତାଡ଼ିଙ୍ଗିଙ୍କ ସମେତ ଶତାଧିକ କର୍ମୀ ଭାଜପାରେ ଯୋଗଦେଇଛନ୍ତି। ମିଶ୍ରଣ ପର୍ବ ସମୟରେ ଭାଜପାର ରାୟଗଡ଼ା ଜିଲା ଉପସଭାପତି ପଦ୍ମନାଭ ଦାସ ଓ ଅନ୍ୟମାନେ ଉପସ୍ଥିତ ଥିଲେ ା
ପ୍ରକାଶ ଥାଉକି, ଭେଙ୍କଟେଶ୍ୱର ରାଓ ବିଜେଡିର ଜଣେ ପୁରାତନ କର୍ମୀ ଥିଲେ। ଗତ ଦିନରେ ଦଳରେ ଏକପ୍ରକାର ଗୋଷ୍ଠୀକନ୍ଦଳ ତୀବ୍ର ରୂପ ନେବାରୁ ୨୦୨୪ ସାଧାରଣ ନିର୍ବାଚନ ପୂର୍ବରୁ ଭେଙ୍କଟେଶ୍ୱର ରାଓଙ୍କୁ ଜିଲା ପର୍ଯ୍ୟବେକ୍ଷକ ଦଳରୁ ବହିଷ୍କୃତ କରିଥିଲେ। ଭେଙ୍କଟେଶ୍ୱରଙ୍କ ବହିଷ୍କାରକୁ ନେଇ ତାଙ୍କ ସମର୍ଥକମାନେ ଅସନ୍ତୋଷ ପ୍ରକାଶ କରିବା ସହ ବିଜେଡିରେ ତୁମ୍ବିତୋଫାନ ଦେଖାଦେଇଥିଲା। ବିଜେଡିର ଏହି ଗୋଷ୍ଠୀ କନ୍ଦଳ ଯୋଗୁ ସାଧାରଣ ନିର୍ବାଚନରେ ଦଳ କୋରାପୁଟ ଲୋକ ସଭା ଆସନ ହରେଇବା ସହିତ ଜିଲାର ୩ଟି ବିଧାନସଭା ଆସନ ମଧ୍ୟ ହାତରୁ ଖସିଯାଇଥିଲା। ଏବେ ଭେଙ୍କଟେଶ୍ୱର ରାଓ ଭାଜପାରେ ଯୋଗଦାନ କରିବା ପରେ କୋଣ୍ଡାବାବୁଙ୍କୁ ଜିଲାରେ ଗୁରୁତ୍ୱପୂର୍ଣ୍ଣ ପଦବୀ ମିଳିପାରେ ବୋଲି ସମର୍ଥକଙ୍କ ମଧ୍ୟରେ ଚର୍ଚ୍ଚା ଚାଲିଛି। ବହୁ କର୍ମୀଙ୍କ ଭାଜପାରେ ଯୋଗଦାନ ନେଇ ଜିଲା ଭାଜପା ସଭାପତି ଶିବ ପଟ୍ଟନାୟକଙ୍କୁ ପଚାରିବାରୁ କୋଣ୍ଡାବାବୁ ତାଙ୍କ ସହ ଏକ ମାସ ହେବ ପରାମର୍ଶରେ ରହିଥିଲେ ଏବଂ ଦଳରେ ମିଶିବା ନିଷ୍ପତ୍ତି ହୋଇଥିଲା ବୋଲି ସେ କହିଛନ୍ତି । ଏଥିସହ ଆଗାମୀ ଦିନରେ ରାୟଗଡା, ବିଷମକଟକ ଓ ଗୁଣପୁର ନିର୍ବାଚନମଣ୍ଡଳୀର ଆଗଧାଡ଼ିର ବହୁ ନେତା ଓ କର୍ମୀ ଭାଜପାରେ ଯୋଗଦେବେ ବୋଲି ସେ ସଙ୍କେତ ଦେଇଛନ୍ତି।