ପାରାଦୀପ,୧ା୩(ସ୍ବ.ପ୍ର.)ଆସନ୍ତା ମାର୍ଚ୍ଚ ୨୪ ତାରିଖରେ ପାରାଦୀପ ପୌରାଞ୍ଚଳରେ ନିର୍ବାଚନ ହେବ ବୋଲି ନିର୍ବାଚନ କମିଶନ ଘୋଷଣା କରିଛନ୍ତି। ଏଥିପାଇଁ ମାର୍ଚ୍ଚ ୨ ରୁ ୭ ତାରିଖ ମଧ୍ୟରେ ପ୍ରାର୍ଥତ୍ପତ୍ର ଦାଖଲ ହେବ। ପ୍ରମୁଖ ରାଜନୈତିକ ଦଳ ମଧ୍ୟରେ ପ୍ରାର୍ଥୀ ଚୟନକୁ ନେଇ ଘନଘନ ବୈଠକ ଚାଲିଛି। ଏପରିସ୍ଥିତିରେ ପୌରାଞ୍ଚଳର ୫ ନଂ. ଓ୍ବାର୍ଡ ବାଲିଝରା ବସ୍ତିର ବହୁ ବାସିନ୍ଦା ରବିବାର ସାରେ ଏକତ୍ରିତ ହୋଇ ବିଭିନ୍ନ ରାଜନୈତିକ ଦଳକୁ ବିରୋଧ କରିଛନ୍ତି। ବସ୍ତିର ୧୩ଟି ପଡ଼ାକୁ ନେଇ ୨୬ ଜଣିଆ କମିଟି ଗଠନ କରାଯାଇଛି। ଏହାର ନାମ ରହିଛି ଆମ ସମ୍ପର୍କ ଆମ ଏକତା ରଖାଯାଇଛି। ଏହି କମିଟିର ମାର୍ଗଦର୍ଶକ ଭାବେ ପାରାଦୀପ ଏରସମା ଶିଳ୍ପାଞ୍ଚଳ ଶ୍ରମିକସଂଘ ସଭାପତି ଅରିନ୍ଦମ (ବାପି)ସର୍ଖେଲଙ୍କୁ ମନୋନୀତ କରାଯାଇଛି। ଆସନ୍ତା ପୌର ନିର୍ବାଚନରେ ଏହି ଓ୍ବାର୍ଡର ଜଣଙ୍କୁ ସ୍ବାଧୀନ ପ୍ରାର୍ଥୀ ଭାବେ ଚୟନ କରାଯିବ। କୌଣସି ରାଜନୈତିକ ଦଳକୁ ଏଠାରେ ପ୍ରବେଶ କରାଇ ଦିଆଯିବନାହିଁ ବୋଲି କମିଟିର ସଦସ୍ୟ ଦୀପକ ସ୍ବାଇଁ ସୂଚନା ଦେଇଛନ୍ତି। ବୈଠକରେ ବିଭିନ୍ନ ବର୍ଗର ଲୋକେ ସାମିଲ ହୋଇଥିଲେ।
ଏପରି ଏକତା ହେବା ସମ୍ପର୍କରେ ବସ୍ତିର ସହଦେବ ସେନାପତି କୁହନ୍ତି, ଆମ ବସ୍ତିର ଜଣେ ଆଗଧାଡିର ବିଜେଡି କର୍ମୀ ଏକ ରାଷ୍ଟ୍ରାୟତ କମ୍ପାନୀରେ ଠିକା ଶ୍ରମିକ ଭାବେ କାମ କରୁଥିଲେ।ତାଙ୍କୁ ସମ୍ପୃକ୍ତ ଠିକାଦାର ବିନା କାରଣରେ ବାହାର କରିଦେଲେ। ଉକ୍ତ ଘଟଣାରେ ସେହି ଶ୍ରମିକ ଓ ମୁରବି ମାନେ ଏକ ନିର୍ଦ୍ଦିଷ୍ଟ ରାଜନୈତିକ ଦଳର ନେତାଙ୍କ ପାଖକୁ ଯାଇଥିଲେ। ସମ୍ପୃକ୍ତ ନେତା ଶ୍ରମିକଙ୍କୁ ଅଣଦେଖା କରି ଠିକାଦାରଙ୍କ ସମର୍ଥନ କରିଥିଲେ। ଏହି ଘଟଣା ବସ୍ତିର ଲୋକଙ୍କୁ ବାଧିଥିଲା। ତା’ପରଠାରୁ ସେମାନେ ବିକଳ୍ପ ପନ୍ଥା ଅବଲମ୍ବନ କରି ସର୍ଖେଲଙ୍କୁ ସମର୍ଥନ କରିଥିଲେ।