ନୂଆଦିଲ୍ଲୀ,୨୯।୬: ଦେଶର ସର୍ବବୃହତ ବ୍ୟାଙ୍କ ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ(ଏସ୍ବିଆଇ) ଆସନ୍ତା ଜୁଲାଇ ପହିଲାରୁ ଅନେକ ପରିବର୍ତ୍ତନ କରିବାକୁ ଯାଉଛି। ବ୍ୟାଙ୍କ ନଗଦ ପ୍ରତ୍ୟାହାର, ଶାଖାରୁ ନଗଦ ଟଙ୍କା ଉଠାଇବା ଏବଂ ଚେକ୍ ବୁକ୍ ପାଇଁ ଏହାର ଶୁଳ୍କକୁ ସଂଶୋଧନ କରିବାକୁ ଯାଉଛି। ଜାଣିରଖନ୍ତୁ…
ବ୍ୟାଙ୍କ ଶାଖାରେ ଏସ୍ବିଆଇ ନଗଦ ଟଙ୍କା ପାଇଁ ଶୁଳ୍କ:
ଏବେ ମାଗଣା ଟଙ୍କା ଉଠାଣ ୪ରେ ସୀମିତ ରହିବ। ଏହାଠାରୁ ଅଧିକଥର ଟଙ୍କା ଉଠାଇବା ଲାଗି ଏସ୍ବିଆଇ ଆକାଉଣ୍ଟଧାରୀମାନଙ୍କୁ ଜୁଲାଇ ୧ରୁ ଦେୟ ଦେବାକୁ ହେବ। ଗ୍ରାହକଙ୍କୁ ଶାଖା କିମ୍ବା ଏଟିଏମ୍ରୁ ପ୍ରତ୍ୟେକ ନଗଦ ଟଙ୍କା ଉଠାଇବା ଉପରେ ୧୫ ଟଙ୍କା ସହ ଜିଏସ୍ଟି ଦେବାକୁ ପଡ଼ିବ।
ଏସି୍ବିଆଇ ପକ୍ଷରୁ ଏଟିଏମ୍ ଟଙ୍କା ଉଠାଣ ସୀମା:
ଜୁଲାଇ ୧ରୁ ଏସ୍ବିଆଇ ଏଟିଏମ୍ରୁ ନଗଦ ଟଙ୍କା ଉଠାଣ ନିୟମ ଲାଗୁ ହେଉଛି। ତଦନୁଯାୟୀ ପ୍ରଥମ ୪ ମାଗଣା ନେଣଦେଣ ପରେ ପ୍ରତ୍ୟେକ କାରବାର ଉପରେ ଏସ୍ବିଆଇ ଏବଂ ଅନ୍ୟ ଏଟିଏମ୍ ଉଭୟ ପାଇଁ ୧୫ଟଙ୍କା ସହ ଜିଏସ୍ଟି ମିଶାଇ ଆଦାୟ କରାଯିବ।
ଏସ୍ବିଆଇ ଚେକ୍ ବୁକ୍ ଚାର୍ଜ:
ଜୁଲାଇ ୧ରୁ ଲାଗୁ ହେବାକୁ ଥିବା ନୂତନ ଏସ୍ବିଆଇ ଚେକ୍ ବୁକ୍ ଚାର୍ଜ ଅନୁଯାୟୀ, ବିଏସ୍ବିଡି ଖାତାଧାରକଙ୍କୁ ଗୋଟିଏ ଆର୍ଥିକ ବର୍ଷରେ କେବଳ ୧୦ଟି ଚେକ୍ ସ୍ଲିପ୍ ମାଗଣାରେ ବ୍ୟବହାର କରିବାକୁ ଅନୁମତି ରହିଛି। ଏହାପରେ ୧୦ ପୃଷ୍ଠାର ଚେକ୍ ବୁକ୍ ପାଇଁ ୪୦ଟଙ୍କା ପ୍ଲସ ଜିଏସ୍ଟି ଏବଂ ୨୫ ପୃଷ୍ଠାର ଚେକ୍ ବୁକ୍ ପାଇଁ ୭୫ ଟଙ୍କା ପ୍ଲସ୍ ଜିଏସ୍ଟି ଆଦାୟ କରାଯିବ। ତେବେ ବରିଷ୍ଠ ନାଗରିକଙ୍କୁ ଚେକ୍ବୁକ୍ ବ୍ୟବହାର ପ୍ରତିବନ୍ଧକରୁ ମୁକ୍ତ କରାଯାଇଛି।