ଭୁବନେଶ୍ୱର,୧୩।୩(ବ୍ୟୁରୋ):୨୦୨୦ରେ ରାଜ୍ୟରେ ମାଓବାଦୀ କାର୍ଯ୍ୟକଳାପ ହ୍ରାସ ପାଇଛି। ଶୁକ୍ରବାର ବିଧାନସଭାରେ ଉପସ୍ଥାପିତ ଗୃହ ବିଭାଗର ଷ୍ଟାଣ୍ଡିଂ କମିଟି ରିପୋର୍ଟରେ ଏହା କୁହାଯାଇଛି। ଏହି ବର୍ଷରେ ରାଜ୍ୟରେ ୪୧ଟି ମାଓବାଦୀ ହିଂସାକାଣ୍ଡ ଘଟିଛି। ସେଥିରେ ୨୭ଟି ଘଟଣାରେ ମାଓବାଦୀ ଓ ପୋଲିସ ମଧ୍ୟରେ ଗୁଳି ବିନିମୟ ହୋଇଛି। ଏଥିରେ ୭ ସାଧାରଣ ଲୋକ ଏବଂ ୨ ଜଣ ସୁରକ୍ଷା କର୍ମୀ ନିହତ ହୋଇଛନ୍ତି। ମାଓବାଦୀ ଦମନରେ ସୁରକ୍ଷା କର୍ମୀଙ୍କୁ ବଡ଼ ସଫଳତା ମିଳିଛି। ପୋଲିସ ସହ ଗୁଳି ବିନିମୟରେ ୧୬ କୁଖ୍ୟାତ ମାଓବାଦୀଙ୍କୁ ଜୀବନ ହରାଇବାକୁ ପଡିଛି। ସେଥିରେ ଜଣେ ରାଜ୍ୟ କମିଟି ସଦସ୍ୟ ଥିବାବେଳେ ଜଣେ ଡିଭିଜନାଲ କମିଟି ଓ ଜଣେ ଏରିଆ କମିଟି ସଦସ୍ୟ ରହିଛନ୍ତି। ଗ୍ରାମବାସୀଙ୍କ ସହ ଧସ୍ତାଧସ୍ତିରେ ଜଣେ ମାଓବାଦୀଙ୍କର ମୃତ୍ୟୁ ହୋଇଛି। ଏହାଛଡ଼ା ୪ ଜଣଙ୍କୁ ଗିରଫ କରାଯାଇଛି। ସେହିପରି ୨୧ ଜଣ ମାଓବାଦୀ ପୋଲିସ ନିକଟରେ ଆତ୍ମସମର୍ପଣ କରିଛନ୍ତି। ୬୦ ବନ୍ଧୁକ, ୨୬ ମାରଣାସ୍ତ୍ର ସମେତ ବହୁମାତ୍ରାରେ ବିସ୍ଫୋରକ ଜବତ କରାଯାଇଥିବା ରିପୋର୍ଟରେ କୁହାଯାଇଛି। ସୁରକ୍ଷା କର୍ମୀ ଓ ସ୍ଥାନୀୟ ପ୍ରଶାସନ ଯୋଗୁ ମାଲକାନଗରି, କନ୍ଧମାଳ, ରାୟଗଡା ଜିଲାରେ ବିକାଶ କାର୍ଯ୍ୟ ତ୍ୱରାନ୍ବିତ ହୋଇପାରିଥିବା କମିଟି ରିପୋର୍ଟରେ ଉଲ୍ଲେଖ କରାଯାଇଛି।
