ଭବାନୀପାଟଣା,୧୦ା୧୨(ସ୍ବ.ପ୍ର.): କଳାହାଣ୍ଡି ଜିଲା ବିଜେପୁର ଥାନା ଅଞ୍ଚଳର ପାହାଡ଼ପଦର ସଂରକ୍ଷିତ ଜଙ୍ଗଲରେ ମାଓବାଦୀ ଗତିବିଧି ଥିବା ଖବର ପାଇ କଳାହାଣ୍ଡି ଏସ୍ପି ଅଭିଳାଷ ଜୀ’ଙ୍କ ନିର୍ଦ୍ଦେଶ କ୍ରମେ ପୋଲିସ ଓ ଏସ୍ଓଜି ଯବାନ ଅଞ୍ଚଳରେ କମ୍ବିଂ ଅପରେଶନ କରିଥିଲେ। ଏହି ସମୟରେ କାଞ୍ଚନମୁହିଁ ଗ୍ରାମ ନିକଟରେ ସେମାନେ ଏକ ମାଓବାଦୀ କ୍ୟାମ୍ପ ଠାବ କରିଥିବାବେଳେ ଯବାନଙ୍କୁ ଦେଖି ମାଓବାଦୀମାନେ ସେଠାରୁ ଛତ୍ରଭଙ୍ଗ ଦେଇଥିଲେ। ଅନ୍ୟପଟେ ମାଓବାଦୀ କ୍ୟାମ୍ପରୁ ବହୁ ସାମଗ୍ରୀ ଜବତ ହୋଇଥିବା ଏସ୍ପି ଏକ ବିବୃତିରେ ସୂଚନା ଦେଇଛନ୍ତି।
ପ୍ରକାଶ ଯେ,ଉପରୋକ୍ତ ଅଞ୍ଚଳରେ ଏସ୍ଓଜି ଯବାନ ଓ ପୋଲିସ ଦ୍ୱାରା ଗତ ୯ ତାରିଖରୁ କମ୍ବିଂ ଅପରେଶନ ଆରମ୍ଭ କରାଯାଇଥିଲା। କାଞ୍ଚନମୁହିଁ ଗ୍ରାମ ନିକଟରେ ମାଓବାଦୀଙ୍କ ଏକ କ୍ୟାମ୍ପ ଚାଲିଥିବା ଦେଖିବାକୁ ପାଇଥିଲେ। ଯବାନମାନଙ୍କୁ ଦେଖି କ୍ୟାମ୍ପ ଛାଡ଼ି ମାଓବାଦୀମାନେ ଜଙ୍ଗଲ ଭିତରକୁ ଚାଲିଯାଇଥିଲେ। ଯବାନମାନେ ଉକ୍ତ କ୍ୟାମ୍ପକୁ ନଷ୍ଟ କରିଦେଇଥିଲେ। ଉକ୍ତ କ୍ୟାମ୍ପରୁ ତଲାସି କରିବା ସମୟରେ ୯ଟି ଡିଟୋନେଟର, ୨ଟି ଆଇଇଡି, କମ୍ବଳ, ବିୁଦ୍ୟତ୍ତାର, ଔଷଧ ଆଦି ସହିତ ବହୁ ମାଓବାଦୀ ସାମଗ୍ରୀ ଓ ମାଓବାଦୀ ପୁସ୍ତିକା ଜବତ କରାଯାଇଥିଲା। ଏହି କ୍ୟାମ୍ପରେ ୧୦ରୁ ଊର୍ଦ୍ଧ୍ୱ ମାଓବାଦୀ ଥିବା ଜଣାପଡ଼ିଛି। ଏହି ମାଓବାଦୀ କ୍ୟାମ୍ପ କଳାହାଣ୍ଡି ଜିଲାର ବିଜିଏମ ଡିଭିଜନ ଓ ନିୟମଗିରି ଡିଭିଜନ ଦ୍ୱାରା ପରିଚାଳିତ ହେଉଥିବା ପୋଲିସ ଜବତ କରିଥିବା ମାଓବାଦୀ ଲିଫ୍ଲେଟ୍ ଜାଣିବାକୁ ପାଇଛି। ଏହି କ୍ୟାମ୍ପରେ ନିୟମଗିରି ଡିଭିଜନର ଦୁର୍ଦ୍ଦାନ୍ତ ମାଓବାଦୀ ନେତା ଇନ୍ଦୁ ମାଝି ଓ କୁନୀ ମାଝି ଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ବର୍ତ୍ତମାନ ଉକ୍ତ ଅଞ୍ଚଳ ଓ ତା’ର ଆଖପାଖ ଜଙ୍ଗଲକୁ ଯବାନମାନେ ଘେରାଉ କରି ରଖିବା ସହିତ ସର୍ଚ୍ଚ ଅପରେସନ ଜୋରଦାର କରିଥିବା ଏସ୍ପି କହିଛନ୍ତି।
